Read Casuarina Coast Asmat AEMAARIS PAK 23 Bible Online

AEMAARIS PAK 23 - Casuarina Coast Asmat bible

AEMAARIS PAK 23

¹Paulus arawa, atakam basakamtii owe, banamek apeome, wanam atakam akorome. “Dejoo owe akot! Dere waa aemansar Allah bipu aemkoromaaru pak, emesare jak asan akotnak aememmin.” Emes atakam aesime.

²Me Allah Tame pak baem ipit daytu juas Ananias arawa, Paulus setep aememes owe, armat ipit okone wusup bata, atakam asakamtame.

³Paulus arawa, atakam armat ipit akorome. “Wore pir bae ipit. Allah wusup wora ateteman. Wore Musa Basakamtam Atakam jipu dera aoorpormanim? Era owe wusup deokone bajaper atakam asakamtammarem, emesare ara Basakamtam Atakam aoomarem.” Emes atakam aesime.

⁴Era setep aememes owe ere, atakam Paulus akoromes. “Wore, Allah Tame pak baem ipit daytu, pota atakam akoremmareme?” Emes atakam aesimes.

⁵Paulus arawa, “Dejoo owe akot! Dere ara ipit Allah Tame pak baem ipit daytu demsam apok. Emesare, Alkitabam, ‘Tare takapar owe, pota atakam bas.’ Emes atakam aeapoma.” Paulus emes atakam aesime.

⁶Emesare. Wan atakam basakamtii owe Saduki owe. Me wan ere, Parisi owe. Paulus emes apore, wanam era atakam basakamtii tame bomon, atakam afaketaae. “Dere Parisi ipit. Denom Parisi owe andep. Dere dambir owe ajaorwasittas atakam ambesemmin. Denom era atakam, jiirey aeemin. Erarawa ara aemapes owe dera aoorpormanis.” Emes atakam aesime.

⁷Paulus emes atakam aesime, Parisi oweam, Saduki oweam, atakam daytinak ajamkorames. Erarawa ajirisiapes owe, atakam awar apok. Wan owe apa atakam akores. Wan oweam apa atakam akores.

⁸Saduki owe abimak binip ere, “Dambir owe bojaorwasit apok. Malaikatam anom apoknak. Asamot oweam, damwip aptam apok.” Emes atakam aesimemas. Me, Parisi owe ere, dambir owe ajaorwasittas atakamam, malaikat tananenak aemapes atakamam, asamot owe damwip aptam atakamam, takes ambesemes.

⁹Emesare, basawuam daytu aemes. Me wan Parisi Musa Basakamtam Atakam baememtam owerawa, awasites, wanam atakam fiak ajamkorames. “Dare ara ipit pota pak baem apok apormarom. Damwip apaye, malaikat apaye, atakam ara ipit etekoromes apeno.” Emes atakam aesimes.

¹⁰Emesare, Parisi oweam, Saduki oweam, atakam daytinak ajamkorames. Erarawa tentara kapar ipit era owe Paulus damo dasa batitirikokomamtaa ombare aememe. Erarawa are tentara owe Paulus bamare ere sumtaer, wanam ara tentara tame bomon botoomjii, atakam asakamtame.

¹¹Emesare. Eam arawa, Tuhan, Paulus setep aememe, wanam atakam akoromen. “Wonom jak fiaka! Wore deateman Yerusalem atamarem. Wonom emes ateman Roma atamtemarem.” Emes atakam aesimen.

¹²Emesare, jo apue, Yahudi owe atakam asakamtiiesen. Ararawa, Allah bipu, emes ataaji aeesen. “Dare amos anama bwi bonda apok. Me Paulus ato takamtatiitam, dare amos anama bwi aondetemarom.” Emes atakam aesimesen.

¹³Emes atakam asakamtiies owe 40am, wan owe bokaimam, emes owe aren.

¹⁴Ara owerawa, Allah Tame pak baem owe daytuam, duturu oweam, abipu ambaromes, wanam atakam ajamkoramesen. “ ‘Dare Allah bipu ataaji aeearom. Dare pak bonda apok. Me Paulus ato takamtatiitam ere, pak aondetemarom.’ Emes atakam aesimarom.

¹⁵Tare ere, Yahudi Agama Atakam Basakamtii Owejie, atakam era tentara kapar ipit bakoromporay. Are Paulus tabipu batoomtin, atakam bakoromporay. Tare Paulus booorporkorom tamen aemay. Dararawa, armat ipit era waut atatiitemarom.” Emes atakam aesimesen.

¹⁶Paulus arpit andep ere, era ajamsakamamtiies atakam, jane ajien. Armat ipitam tentara tame ajiie, wanam emes atakam Paulus akoromen.

¹⁷Paulus arawa, komandan ipit taka ajaten. “Wore ara aemema ai ipit, tentara kapar ipitpu atoomtiney. Are armat ipit atakam bakoromen.” Emes atakam aesimen.

¹⁸Komandan ipit arawa, era ai ipit kapar ipitpu atoomtine, wanam atakam akoromen. “Era buji tame bomon ataapomom ipit juas Paulus aojatean, wanam aemema ai ipit wora batoomtin, atakam dera ajaniman. Are atakam wora bakoromen.” Emes atakam aesimen.

¹⁹Kapar ipit arawa, era ipit ban atoomen. Are armat ipit setep apok asan atoomtine, wanam ajateporen. “Wore dere apa atakam koromtanem?” Emes atakam aesimen.

²⁰Era ipit arawa, “Yahudi owe atakam ajamsakamamtiiares. Are wore Paulus Yahudi Agama Atakam Basakamtii Owe asan, to batoomtin, atakam ajanimesen. Are armat ipit booorporkorom tamen baem aren.

²¹Wore ere, era owe aatakam jane bajie bas. Owe 40am, wan owe bokaimam, asaiamesmas. Ere bawasiomit aren. Era owe takes Allah bipu ataaji aeeares. Are amos anama bwi bonda apoken. Me Paulus ato takamtatiitas, are amos anama bwi aondetemasen. Emesare, are etejasosoemmares. Are wosakamtiitem atakam jane bajie aemapares.” Emes atakam aesimen.

²²Tentara kapar ipit arawa, “Wore ara akoromanim atakam, owe oesimtamtem.” Emes atakam aesimen.

²³Armat ipit arawa, komandan ipit amnuk ajaten. “Tare tentara owe 200am, kuda oup ajartas tentara owe 70am, wurini aptam tentara owe 200am, pak bataakenem atakam basakamtamay. Are jam 9 eam, kota Kaisarea baesostas.

²⁴Tanom Paulus oup batemetap kuda bamintep ataakenemay. Tare, Paulus, asan akot aptam, gubernur Felikspu atomasay.” Emes atakam aesimen.

²⁵Armat ipit arawa, emes surat aeapomen:

²⁶“Gubernur Feliks akotnak! Selamat. Dere Klaudius Lisias derare.

²⁷Yahudi owe ara aemapa ipit ban akimomes. Are armat ipit batatii aemes. Derarawa, ‘Armat ipit Roma ipit,’ emes atakam jane ajio. Emesare denom, tentara oweam, era owe ambaromom, wanam armat ipit ajortaerom.

²⁸Era owe, ara aemapa ipit pota pak aeme, emes atakam akores. Derarawa, era akores pota pak atakam jane bajiekorom aemo. Erarawa dere, armat ipit, era owe Yahudi Agama Atakam Basakamtii Owepu atoomtino.

²⁹Era owe, ara aemapa ipit, Yahudi basakamtam atakam aooe, emes atakam akores. Era pak ere, ara ipit batatii pak apok. Are buji tame bomon bataapom pak apok. Dere emes aporo.

³⁰Denom era owe Paulus batatii ajamsakamamtiies atakam jane ajio. Jane ajiorawa, dere armat ipit wora ametebirimemo. Denom armat ipit pota atakam akores owe, era pota atakam, ere wobipu bakore, atakam asakamtamo.” Emes surat aeapomen.

³¹Emesare. Tentara owe, kapar ipit atakam ji aeesen. Eam ere, are Paulus kota Antipatris ajiire, atoomtinesen.

³²Ajoferawa, bambi tentara owe atame aofasiesen. Are kuda oup ajares tentara owe, Paulus takan bajar, beken ajiosesen.

³³Are kota Kaisarea ambaremes, era surat gubernur atetamesen. Are Paulus era ipit aotasimemomtamesen.

³⁴Gubernur era surat baca aeme, wanam Paulus ajateporen. “Wore ete propinsi ipitim?” Emes atakam aesimen. Paulus arawa, “Dere Kilikia ipit.” Emes atakam aesimen.

³⁵Gubernur arawa, “Me woemem pota pak atakam akores oweam ara asan ajinaotas, dere era aemem pak aoorportemin.” Emes atakam aesimen. Armat ipit arawa, tentara owe Paulus Herodes aeapome raja tame bomon banamek batai, atakam asakamtame.