Read Casuarina Coast Asmat AEMAARIS PAK 24 Bible Online

AEMAARIS PAK 24 - Casuarina Coast Asmat bible

AEMAARIS PAK 24

¹Emesare. Bare ban takarawa, Allah Tame pak baem ipit daytu juas Ananiasam, wan duturu oweam, pemerintah basakamtii atakam tastu ipit juas Tertulusam, era asan aesosesen. Are gubernur bipu aememes, wanam Paulus pota pak aeme atakam akoresen.

²Owe Paulus ajates, wanam Tertulus, Paulus pota aeme pak, emes atakam akorome. “Feliks akotnak! Wore atakam akot asakamtamaarim. Erarawa datapirmi owe asan akot aemapaarum. Wonom bimak binip aptam ipit. Erarawa wan asan pota aemapmas, asan akot aemeroem.

³Danom datapirmi samaniin samaniin emes aporaarum. Dararawa, terima kasih atakam wora akorommarom.

⁴Dere wora akorommin atakamkope, jane asan akot bajiepor, atakam wora ajanimpormin. Ara atakam karokope. Wore damo jip baemap-ombar.

⁵Emesare, dare ara aemema ipit, owe bajurusum ipit aporom. Are ara tapirmiin tapirmiin Yahudi owe, jokoman baemem, atakam ajomtamaarir. Are Nasaret atakam bajamkai owe akapar ipit.

⁶Are Allah Tame pota baemapom aempore. Dararawa, armat ipit ajipirtaerom, wanam daagama Basakamtam Atakam jipu baoorpor, aemom.

⁷Tentara kapar ipit juas Lisias ere, ara aemema ipit, daban atirikomtaere.

⁸Are, ara aemema ipit apota pak atakam akores owe, wobipu bajinao, atakam asakamtame. Emesare, wonom era ipit womba aoorportem, ara akoremmarom pota pak takes atakamnak aportemarem.” Tertulus emes atakam aesimen.

⁹Yahudi owe takesam, “Paulus potanak. Ara akoremarom atakam, ere atakamnak.” Emes atakam aesimesen.

¹⁰Emesare. Era gubernur ipit, atakam Paulus akoromen. “Emesare, wonom atakam pakorey.” Emes atakam aesimen. Paulus arawa, atakam akoren. “Wore tahun tanane, atakam ara tapirmi owe asakamtamaarim. Dere era pak apormin. Erarawa ara aemanis jaos pak, ere wobipu atep bajit, akot ajimin.

¹¹Bare 12 aemanse, dere Allah basitim Yerusalem aesoso. Wonom emes atakam, atakamnak aportemarem.

¹²Allah tame bomonam, Yahudi owe samayen tame bomon takesam, kota wan asanam, dere owe atakam bamkore apok. Denom owe jokoman baemem, atakam bajomtam apok. Ara aemapes owe dere emes pak baem bapor apok.

¹³Me depota pak aemo atakam wora akorommanis, are anakot atakam baemekore asan apok.

¹⁴Dere ere, emes atakam wora akorommin. Ara aememes owe, ara ajamkaimin pak pote agamaen. Dere ere, darfais aAllah asitimmin. Emesare, dere Tuhan asamot owe bajortaer akukuretiie atakam eemnak ambesemkorommin. Ere Yesus atakam are. Dere Musa Basakamtam Atakam buku atakam takesam, Allah atakam bakoretam owe aeapomes buku atakam takesam, eemnak ambesemkorommin.

¹⁵Ara aememes owe, Allah aemto pak, banamek apemes. Denom era pak banamek apemmin. Emesare, era dambir aemes turunak owe tekesam ajaorwasittemas. Era dambir aemes jaos owe takesam ajaorwasittemas. Dare emes banamek takan apemmarom.

¹⁶Emesare, dere Allah bipu aememin pakam, asamot owe bipu aememin pakam, turunak baem aemporaaremin. Dere emes aememin pak takes, dejak anakot atet apok aemporaaremin.

¹⁷Dere tahun bamintep aesosaaru. Derarawa, uang desaman owe bambi batetam aofasio. Denom pak Allah bataetiitam aofasio.

¹⁸Dere emes aemo ere, ara aemapes owe, dere Allah Tame bomon aporenis. Bonak ere, denom era atet apok baemem pak tai asirkoromo. Emesare, denom owe tanane damon apok. Basawuam apok.

¹⁹Me, Asia tapirmi aejinaoes wan Yahudi owe era asan aememes. Era owe wobipu amba bamarem, ere akotnak. Are depota pak akoremas atakam, atakam amba bakore, ere akotnak.

²⁰Wanam dere Yahudi Agama Atakam Basakamtii Owe bipu aememo, aemapes owe, depota pak aporenis apaye, are atakam bakoretas.

²¹Emesare, dere atakam takakope akoreo. ‘Dere, dambir owe ajaorwasittemas, emes atakam ambesemmin. Erarawa era owe dera aoorpormanis.’ Emes atakam aesimo.” Paulus emes atakam akoren.

²²Me Feliks ere, Tuhan asamot owe bajortaer akukuretiie atakam amsamnaken. Armat ipitam, “Dare waa ara atakam ajiire. Tentara kapar ipit juas Lisias ajinaoto, dere wopota pak, atakam asakamtiitemin.” Emes atakam aesimen.

²³Armat ipit arawa, atakam, komandan ipit asakamtame. “Wore ara aemema ipit banamek bataiey. Me, armat ipit tasan bajarkope atii bata bas. Ajoo owe, pak ara bafaafetam, atii bata bas.” Emes atakam aesimen.

²⁴Emesare. Asep bare ere, Feliks aremotin ajinaoemisen. Aremo juas Drusilaen. Are Yahudi saman taoten. Emesare, Feliks Paulus ajaten. Ararawa, Paulus Kristus Yesus bamesem atakam akoretame atakam jane ajien.

²⁵Paulus, turu owe baemem atakamam, jak fiak baemem atakamam, Allah era aemamesto dosa atakam basakamtii bare atakamam, emes atakam akoretamen. Feliks arawa, ombare aememen. “Wonom baesosey. Asan akot aportey, dere wora aojatetemin.” Emes atakam aesimen.

²⁶Are, Paulus, uang, ara batetam, akoten. Erarawa are Paulus bare tanane ajatea ajaien. Are atakam Paulus akoroma ajaien.

²⁷Emesare tahun jamnuk aemapesen. Tahun jamnuk aemapes arawa, Perkius Festus, Feliks, gubernur baem pak jow auuemen. Feliks ere, Yahudi owe jak akot baemapom aememen. Erarawa are Paulus, buji tame bomon, beken ajiapomen.