Read Casuarina Coast Asmat AEMAARIS PAK 25 Bible Online

AEMAARIS PAK 25 - Casuarina Coast Asmat bible

AEMAARIS PAK 25

¹Emesare. Festus era propinsi ambaremen. Bare bamintep aemaperawa, are kota Kaisarea beken ajiose wanam Yerusalem aesosen.

²Era asan ere, Allah Tame pak baem owe daytuam, era Yahudi kapar oweam, Paulus pota pak aeme, emes atakam Festus aesimtamesen.

³Are atakam fiak Festus ajanimesen. “Wore owe Paulus Yerusalem batoomjinao atakam asakamtamey.” Emes atakam aesimesen. Bonak ere, are Paulus waut batatii atakam akukuramtiiesen.

⁴Festus ere, atep ajiten. “Paulus Kaisarea buji tame aapeta. Denom era asan fefkope aoesostemin.

⁵Erarawa, taduturu owe, dera bajamesostanis. Era ipit potanak pak aeme apaye, era owe era pota pak aeme atakam amba bakoretas.” Emes atakam aesimen.

⁶Emesare, Festus, bare poman ban bamintep apaye, bare ban amnuk apaye, era asan aemape, wanam Kaisarea aesosen. Ajoferawa, are owe baoorpor asan ajiiapen. Are owe Paulus batoomji atakam asakamtamen.

⁷Paulusam era asan ambareme ere, Yerusalem aejinaoes Yahudi owe, Paulus afojomesen. Are Paulus pota pak tanane atakam akoresen. Era atakam ere, anakot atakam apoken.

⁸Emesare, Paulus atep amba ajiten. “Dere Yahudi basakamtam atakamam, Kaisar basakamtam atakamam, baoo apok. Denom Allah Tame pota baem apok.” Emes atakam aesimen.

⁹Festus ere, jak akot Yahudi owe baemapom aemen. Erarawa are Paulus ajateporen. “Wore Yerusalem baesos, wanam dere era asan, ara atakam akoremas pota pak wora baoorpor, akot ape?” Emes atakam aesimen.

¹⁰Paulus ere, “Dere, Kaisar, owe baoorpor asan aememmin. Are doemo pak baoorpor asan anakot arare. Dere pota pak era Yahudi owe baem apok. Wonom emes womsam.

¹¹Dere pemerintah atakam aoo apaye, wanam pemerintah dera batatii aememmas apaye, emesare denom pemerintah dera batatii bas, emes atakam bajanim apok. Me, ara aemapes owe depota pak atakam akorommanis. Era atakam, pote atakam apaye, owe, dere ara aemapes owe ban ten baemeotasimemomtam asan apok. Emesare, dere Kaisar amba dera baoorpor atakam ajanimmin.” Emes atakam aesimen.

¹²Me Festus arawa, aatakam basakamtii owe, atakam ajamkoramesen. Atakam ajamkorames arawa, Festus atep ajiten. “Wore Kaisar, wora baoorpor, atakam ajanimmarem. Emesare. Wonom Kaisarpu aesostemarem.” Emes atakam aesimen.

¹³Emesare. Bare bamintep aemapes ere, raja Agripa anama Bernike kota Kaisarea ambarapesen. Are Festus atakam akot bamkore jaki ajitesen.

¹⁴Are era asan bare arke aemapes, Festus, Paulus atakam, era raja aesimtamen. “Feliks jipit taka ara asan buji tame bomon beken ajiose.

¹⁵Denom Yerusalem aemapo, Allah Tame pak baem owe daytuam, Yahudi duturu oweam, era ipit potanak pak aeme atakam aesimtamenis. Are dere era ipit bajurusum atakam basakamtii atakam ajanimenis.

¹⁶Derarawa, atakam era owe akoromo. ‘Owe, jipit taka jaos pak atakam akoretas apaye, Roma pemerintah era ipit era owe bameteotasimemomtam apok aemmarom. Jokoman pak atakam bakoretam oweam, era jokoman pak aeme ipitam, bimnuk ato batakamemamtaertas. Erarawa ara jokoman pak aeme ipit, era jaos atakam baesimtam owe, atep ajitim. Dare Roma pemerintah emes taka are.’ Emes atakam aesimo.

¹⁷Era oweam ara asan ajarisiapes. Ajarisiapes arawa, bootasisie apok aemo. Dere owe baoorpor asan ajiiapo, wanam era ipit batoomjii atakam asakamtamo.

¹⁸Era ipit potanak pak atakam akoretames oweam awasites. Era atakam aesimtames pota pak ere, debimak binip atetaramo pak awar apok.

¹⁹Are aagama atakam ajamkorames. Are dambir aeme ipit juas Yesus atakam ajamkorames. Paulusam, ‘Yesus ajaorwasite,’ emes atakam aesime.

²⁰Dere ere, emes baoorpor demsam apok. Erarawa, dere era ipit ajateporo. ‘Wore Yerusalem baesos, wanam era asan dere wora baoorpor, akot ape?’ Emes atakam aesimo.

²¹Me Paulus ere, atakam ajanimen. ‘Pemerintah banamek dera bataitanis. Kaisar, dere jokoman apaye, atakam amba basakamtiito.’ Emes atakam aesime. Derarawa, owe atakam asakamtamo. ‘Tare ara aemema ipit banamek ataiay. Dere ara ipit Kaisarpu ataejirimtey bare ajiire.’ Emes atakam aesimo.” Festus emes atakam Agripa akoromen.

²²Me Agriparawa, atakam Festus akoromen. “Dere armat ipit atakam bakore, jane dema bajie akote.” Emes atakam aesimen. Festus arawa, “Emesare, wore to armat ipit atakam akoreto, jane womba ajitemarem.” Emes atakam aesimen.

²³Emesare. Ajofe ere, Agripa anama Bernike, ara owe bajarisiap tame ajiiapemisen. Are owe baomep ipit tere baeom pak tai aptam ajiiapesen. Era tentara kapar oweam, era kota duturu oweam, takan ajiiapesen. Festus arawa, atakam asakamtame, wanam owe Paulus atoomjiiesen.

²⁴Festusam atakam akoren. “Raja Agripa! Ara aemapakam owee! Tare ara aememe ipit apormakam. Me ara asan Yahudi owe takesam, Yerusalem Yahudi owe takesam, ara ipit jokoman pak aeme, emes atakam akoretamenis. Ara ipit dambir baemto. Emes atakam afaketaaenis.

²⁵Derarawa, ara ipit, batatii jaos pak baem apok aporo. Kaisar, are jokoman pak baem apaye amba baoorpor, atakam ajanimen. Emesare, dere ara ipit, Kaisarpu bataejirim, atakam asakamtiio.

²⁶Dere ere, ara ipit atakam anakot bapor apok. Erarawa dere ara ipit atakam anakot surat Kaisar baemetam asan apok. Emesare, dere ara ipit ara aemapakam owe takes bipu atoomdaemin. Raja Agripa! Denom ara ipit wobipu bonak atakamtoomdaemin. Wore ara ipit aooportem, denom ara atakam anakot jane ajitemin. Derarawa, era atakam surat Kaisar aetamtemin.

²⁷Dere buji tame baemap ipit bataejirim, wanam apota pak aeme atakam anakot apok, ere pota.” Festus emes atakam aesimen.