Read Casuarina Coast Asmat AEMAARIS PAK 28 Bible Online

AEMAARIS PAK 28 - Casuarina Coast Asmat bible

AEMAARIS PAK 28

¹Emesare, dare asan akot asokuom. Era woo aemapes oweam atakam akoromeroes. “Ara aemapa woo juas Malta.” Emes atakam aesimtameroes.

²Era oweam asan akot dara aemeroes. Emesare, te andae. Dararawa damo jufu aememom. Era owe emes apores arawa, jisimak atuokomtiitameroes. Are asan akot aemeroes.

³Paulusam jis ban atoome, wanam jis atuokome. Jis atuokomerawa, amber jis bomon aejise. Amber jis ambap apore are. Emesare, era amber Paulus ban sisi ajate.

⁴Era woo aemapes oweam amber Paulus ban ambatatepe apores, wanam atakam ajamkorames. “Ara aemema ipit sanao baetii ipit arare apeno. Are itimbup bwi dambir baem apok aeme. Me, are juein taot juas ‘Biti Bajie Armat Taot’ ara ipit atatiitem.” Emes atakam aesimes.

⁵Paulus ere, amber apatapimosome. Era amberam jisimak bomon akoromtukume. Paulusam bajirisem apoknak.

⁶Era owerawa, Paulus ban sapu apaye, dambir bandaebuames apaye, banamek apeomes. Are banamek a taka apeomes, me, Paulus bajirisem apok apores. Erarawa era owe ai bimak binip atetarames, wanam atakam akores. “Ara aemema ipit, juein ipit.” Emes atakam aesimes.

⁷Wan tapirmiam ase tamen apok aemanse. Era tapirmi armat ipit juas Publius. Are era woo kapar ipit. Armat ipit asan akot dara atoo.

⁸Are ise asan aemansen. Paulus, armat ipit kamar ajiie, wanam atakam Allah ajanime. Are ban, armat ipit damo ten ataetiie, wanam are era ipit ajaoromtaere.

⁹Emes aemerawa, era woo damo pota owe takes ajinaoa ajaies. Paulusam era owe ajaoromtaera ajaie.

¹⁰Era oweam, pak tanane bambi atetameroes. Dare bandaejuu aememom, are era waut banda pak takes atetameroes.

¹¹Dare era asan pir bamintep aemapaarum, wanam kota Aleksandria aejinaoe kapal ajamjuuom. Era kapal Malta jufu bwi aemesaarir. Era kapal timen juas eto wao aptam. Era eto wao “Kapom Ipit Amnuk”.

¹²Emesare, dare kota Sirakusa aseteom, wanam era asan ise bamintep aemansom.

¹³Danom aondaejuuom, wanam kota Regium aseteom. Ajofe ere, bui itimbup ajinaoe. Dararawa, bare jamnuk aemesom, wanam kota Putioli aseteom.

¹⁴Dare era asan Yesus bajamkai owe bimnuk aemantaerom. Are dare atame ise poman ban jamnuk baisit atakam ajanimeroes. Emesare, dare era asan aesosom, dare kota Roma ambaremom.

¹⁵Roma Yesus bajamkai oweam, daatakam jane emejies. Ararawa, asan juas pasar Apiusam, Jaki Owe Baemap Tame Bamintepam, era asan dara bawotomtaer ajinaoes. Paulus, era owe bi apore are terima kasih atakam Allah akorome. Are jak fiak aememe.

¹⁶Emesare. Dare Roma ambaremom, pemerintah Paulus apa tame baemap atetames. Are tentara ipit taka, armat ipit banamek batai atakam asakamtames.

¹⁷Bare bamintep arawa, Paulus Yahudi kapar owe ajate. Era owe ajarisiapes ere, Paulus atakam akorome. “Biitia! Aykuna! Dere dajoo owe pota pak baem apok. Denom darfais ataetioses pak tai baoo apok. Me, Yerusalem aememo, era owe ajipirtaerenis, wanam are Roma pemerintah aotasimemomtamenis.

¹⁸Era pemerintah oweam aoorporenis, wanam dera basurum akot ajies. Are ere dambir baem, jaos pak baem apok, apores.

¹⁹Yahudi owe ere, emes potan. Emesare, ‘Kaisar amba baoorportan,’ emes atakam ajanimo. Me, Yahudi owe ere, desaman. Era atakam ajanimo ere, ‘Yahudi owe ere, jaos,’ emes bajie apok.

²⁰Emesare, Israel owe, Bajortaer Ipit jiirey aeemas. Denom era Ipit jiirey aeemin. Emesare, owe rantai banam ajikapomenis. Emesamare, dere tabi baporam, atakam tara bakoromam, emes atakam ajanimo.” Paulus emes atakam aesime.

²¹Era owerawa, atakam Paulus akoromes. “Yudea owe, woatakam surat, dara bataendaem apok. Me dajoo oweam, woatakam pota, ara asan batoomjinao apok.

²²Dare ere, wobimak binip atetaramarem, atakam jane bajie akot. Era samaniin samaniin owe, ara ajamkaimarem agama atakam, pota atakam akoremas apormarom.” Emes atakam aesimes.

²³Era owerawa, bojarisiap bare atakam Paulusajie ajamsakamamtiies. Emesare, era bare aemanse ere, owe tanane Paulus aemape tame ajinaoteteres. Paulus arawa, Allah owe aobaomep, atakam fiak, era owe akoretame. Are atakam tom aetaere, wanam poro ju atimome. Are Musa Basakamtam Atakam buku atakamam, Allah Atakam Bakoretam Owe Aeapomes Buku atakamam, aetaere. Erarawa are Yesus atakam, atakamnak, emes atakam era owe akoretampore.

²⁴Me wan owe, emes atakam eemnak apores. Me wan owe ere, emes atakam eemnak apok ajiesen.

²⁵Emesare, era owe aoesoses ere, are atakam awar apok. Bonak ere, Paulus atakam era owe akorome. “Allah Jip, atakamnak, Allah atakam bakoretam ipit juas Yesaya akoromen. Armat ipit arawa, aatakam, tarfais aokoretamen:

²⁶‘Wonom emes atakam ara owe akoretamey: “Tanom atakam jane ajiaartemakam, me, tare ara atakam tamsam apok aemtemakam. Tanom aporaartemakam, me, tanom bapor apok aemtemakam.

²⁷Ara aemapes owe jane apok. Are ajane jafa akapiapes. Are abanamek akapiapes. Are atakam bapor-ombar. Are atakam jane bajie-ombar. Are bimak binip baso baemomem, wanam bimin bawaiem-ombar. Denom ara owe damo baoromtam-ombar.” Emes atakam ara owe akoretamey.’ Yesaya Allah Jip akoretame atakam emes atakam akoren.” Paulus emes atakam aesime.

²⁸Emes arawa, Paulusam, “Allah owe era bajortaer atakam bakoretam, Yahudi apok owe, ambirimemome. Yahudi apok oweam era atakam ji aekoromtemas.” Paulus emes atakam aesime.

²⁹Paulus emes atakam akorerawa, Yahudi owe aesoses. Are atakam daytu ajamkorames.

³⁰Emesare. Paulus apa tame tahun jamnuk aemapaarir. Are, era tame armat ipit, uang atetamaarir. Are jaki owe takes, era tame atoomjiiaarir.

³¹Are Allah owe aobaomep atakam, akoretamaarir. Are Tuhan Yesus Kristus atakam, jak fiak aptam, aememtamaarir. Oweam are era atakam bakoretam atii bata apok.