Read Casuarina Coast Asmat AEMAARIS PAK 3 Bible Online

AEMAARIS PAK 3 - Casuarina Coast Asmat bible

AEMAARIS PAK 3

¹Emesare. Bare taka, Petrus anama Yohanes, Allah Tame aesosemisen. Are poro jam 3 atakam Allah bajanim aren.

²Era asan are, owe, kam ipit atoomes aporemisen. Era ipit jak bomon aemomjise, aemape kam taka aren. Juiin afaafeaarir era owe era ipit Allah Tame jimsappu, emes taka ataapoma ajiaarisin. Era jimsap juas “Akot”. Era kam ipit arawa, Allah Tame bajii, owe uang atakam ajanima ajiaaririn.

³Armat ipit, Petrus anama Yohanes, Allah Tame ajiiemis apore, wanam uang atakam ajanimen.

⁴Petrus anama Yohanes, banamek era ipit aooromemisen. Atakamam akoromemisen. “Banamek dara apeomeporaro.” Emes atakam aesimemisen.

⁵Era kam ipit arawa, era ipit amnuk banamek apeompen. Are era owe pak ara batetam, emes jiraoemen.

⁶Petrus arawa, atakam aokoromen. “Dere uang apoknak aememey. Ara aemomey pak, wora batetam aemin. Emesare, Yesus Kristus Nasaret ipit. Are wodamo bajaoromtam fiak pak aoemome. Erarawa wore bajarey.” Petrus emes atakam aesimen.

⁷Petrus arawa, era kam ipit abo ban ajimompe, wanam awasimemomen. Emesare, era kam ipit, akamtanam, bai komaneam, fiak ameteememen.

⁸Are asopieme, wanam atawejaren. Ararawa, Petrus anama Yohanes, Allah Tame takan ajiiesen. Are aemjaren. Are asoosojaren. Are Allah tere aeomen.

⁹Emesare, era owe takes, era ipit ajaream, Allah tere aeomeam, banamek asiromesen.

¹⁰Era ipit, Allah Tame jimsap juas “Akot,” uang atakam ajanima ajiaarir ipit aporesen. Are era ipit, aeme pak apores wanam jinim daytu aeesen. Are okone akamimapesen.

¹¹Era ipit Petrus anama Yohanes, batir ajipiren. Era owe takesam, era owe baminteppu ametefojomesen. Era asan, tameko juas “Salomo”en. Emesare, era owe takes jinim daytinak aeesen.

¹²Petrus emes aporerawa, atakam akoromen. “Ara aememakam Israel owee! Tare ara aemema ipit era aemar pak, jinim apa eemakam? Tare banamek apa sirommaroakam? Tare da fiak pak apaye, da akot pak apaye, era ipit ajaoromtaermarom, emes are peno.

¹³Allah, Abrahamam, Ishakam, Yakubam, darfais duturu oweam, ere are aAllah. Allaham abambi karai baetam Ipit oup atamsemtame. Era Ipit Yesus are. Tare era Ipit Pilatus aotasimemomtamekem. Pilatus arawa, era Ipit basurumtam atakam asakamtiie. Tare ere, era Ipit Pilatus bipu apatimekem.

¹⁴Era Ipit, ere turunakam, akotnakam, aememe. Me, tare ere, Armat Ipit apatimekem. Tararawa, Pilatus owe batatii ipit taka, tara basurumtam, atakam ajanimekem.

¹⁵Wanam tare jiinenak batetam Ipit atatiiekem. Allah ere, era Ipit ajaoromwasumtume. Danom era pak aporom.

¹⁶Emesare, era kam ipit Yesus eemnak ambesemkoroma. Erarawa Yesus era ipit fiak aemtama. Tanom era ipit apormakam. Era ipit tamsam. Are Yesus eemnak ambesemkoroma. Erarawa Yesus era ipit damo turu tabipu aemtama.

¹⁷Ara aememakam owee! Tanom, takapar oweam, jane ajiemekem. Erarawa tare pota pak Yesus aemekem. Dere emes apormin.

¹⁸Bonaknak ere, Allah, atakam, aatakam bakoretam owe, akoretamen. ‘Era Aeremtaere Ipit ajirisemtem.’ Emes atakam aesimen. Era oweam emes atakam owe aokoretamesen. Japen ere, Allah era atakam aokoretam atakam jipu aemkorome.

¹⁹Emesare tanom dosa ambakemteteray. Wanam Allah atakam ji aeay. Tanom Allahpu awaiemteteray. Allahrawa, tadosa akokomosomtamteman.

²⁰Erarawa Tuhan jak akot pak atetamteman. Are Yesus aotaendaemtem. Bonaknak ere, Are Armat Ipit aeremtaeren.

²¹Yesusam era Surga oup atotakamemaptem— Allah era pak takes, ai pak aoemto bare ajiire. Bonak ere, Allah emes atakam, aatakam bakoretam turu owe, akoretamen. Era owerawa, emes atakam owe aokoretamesen.

²²Musaam emes atakam akoren. ‘Emesare, Allah taTuhan. Armat Ipit, aatakam bakoretam ipit, tara ataendaemtamteman. Denom Allah atakam bakoretam ipit. Era ipitam de tamen aememtem. Anom taipit. Emesare, tanom aatakam takes jane ajikoromay.

²³Wan owe Allah atakam bakoretam ipit atakam ji bae apok aemtemas. Allahrawa, era owe Allah aowe bomon apakapimosomtem.’ Musa emes atakam aeapomen.

²⁴Era bonaknak Allah atakam akoretames owe takes, waa apormas pak, emesare atakam emeokoretamesen. Bonak atakam bakoretam ipit juas Samuel. Me wan atakam bakoretam owerawa, asepen.

²⁵Emesare, tare Allah atakam bakoretam owe arurupis. Allaham ataaji era darfais owe aeetamen. Are atakam Abraham akoromen. ‘Era wururupis andakaimaartas owe, asan akot, era saman takes aoemtemas.’ Emes atakam aesimen. Era ataaji aee atakam, ere ta ataaji.

²⁶Emesare, Allah, abambi karai baetam Ipit ajaoromwasumtume. Are Armat Ipit tare tadosa beak sos basotam atakamtaendaeme. Era pak tare asan akot batetam pak.” Petrus emes atakam aesimen.