Read Casuarina Coast Asmat AEMAARIS PAK 4 Bible Online

AEMAARIS PAK 4 - Casuarina Coast Asmat bible

AEMAARIS PAK 4

¹Emesare. Petrus anama Yohanes, atakam era ajarisiemes owe aememtamemisen. “Yesus ajaorwasite. Erarawa era dambir oweam ajaorwasittemas.” Emes atakam aesimemisen. Are atakam akoreemis, Allah Tame pak baem oweam, Allah Tame polisi Kapar ipitam, Saduki oweam, ambaromesen. Are era atakam aporesen. Emesare are jak ambap aememesen.

³Era owerawa, era Yesus atakam bakoretam bamirimemom ipit amnuk ban akimomesen. Are ju jiiti apores, erarawa era ipit amnuk buji tame bomon ajitaapomesen. Are ajoferawa, era buji tame bomon aemapemisen.

⁴Me Petrus anama Yohanes, aatakam jane ajies owe damon, wan owe tanane Yesus eemnak ambesemkoromesen. Era Yesus ambesemes owe kaiema kaiema ajiesen. Are oorey owe takes, 5.000 ajiire apaye aememesen.

⁵Emesare. Ajoferawa, Yahudi agama Atakam Basakamtii Owe daytuam, Yahudi duturu oweam, Musa Basakamtam Atakam baememtam oweam, Yerusalem ajarisiapesen.

⁶Allah Tame pak baem ipit daytu juas Hanasam, Kayafasam, Yohanesam, Aleksandaram, Allah Tame pak baem ipit daytu asamane owe takesam, era asan ajarisiapesen.

⁷Are era Yesus atakam bakoretam bamirimemom ipit amnuk, waut asumemes, wanam ajateporesen. “Era aemekem pak, era fiak pak, tao tetamen? Ara aemekem atakam tao sakamtamen?” Emes atakam aesimesen.

⁸Emesare, Allah Jip Petrus aoemomemkoromen. Erarawa Petrus era owe atep ajiten. “Aemapakam kapar owee, duturu owee!

⁹Dare era kam ipit asan akot aemomum. Tararawa, era ajaoreme fiak pak, waa dara ajatepormaroakam.

¹⁰Emesare, Nasaret Ipit juas Yesus Kristus afiak pak, era kam ipit ajaoromtaere. Tare, Yesus, salib wus oup atatopomekem. Allah ere, Yesus ajaoromwasumtume. Emesare, Yesus afiak pak, kam ipit ajaoromtaere. Tare ara aememmakam owe takesam, Israel owe takesam, emes atakam jane pajiekoromay.

¹¹Alkitabam: ‘Tame baeapom owe, eka taka pota aporekem, wanam era eka aeremtiiekem. Era eka ere, tame eka anakotnak aemanse.’ Emes atakam akorem. Era eka, ere Yesus.

¹²Wan ipit asamot owe baemejortaer asan apok. Allah, wan ara aemansa tapirmi ipit, asamot bajortaer ipit bataemom apok.” Petrus emes atakam aesimen.

¹³Petrusam, Yohanesam, jak fiak owe araren. Ararawa, sekolah daytu bae apoknak owe araren. Are bambi owe taka araren. Era atakam basakamtii owe emes apores, wanam jinim aeesen. Are era ipit amnuk, Yesus ajamkaiaarimis owe aporesen.

¹⁴Era ajaoreme ipitam era ipit amnuk takan aememesen. Era owe apores arawa, are atep baemejit asan apoken.

¹⁵Era owe era ipit amnuk atakam basakamtii owe asan bajis atakam asakamtamesen. Ararawa, armamon atakam ajamkoramesen.

¹⁶“Dare era ipit amnuk wama pak emtam? Atakamnak, are jinim bae pak daytinak aemes. Era Yerusalem owe takesam, emes atakam jane emejies. Danom emes pak baemepatim asan apok.

¹⁷Dare era ipit amnuk Yesus atakam wan owe bokoretam atii atomamo. Wan owe era atakam jane bajie-ombar.” Emes atakam aesimesen.

¹⁸Emesare, era owe, era ipit amnuk ajates, wanam atakam akoromesen. “Tare Yesus atakam bokore bas. Tare era atakam wan owe boememtam bas.” Emes atakam aesimesen.

¹⁹Me Petrus anama Yohanes ere, atep ajitemisen. “Allah, dare taatakam ji bae, wanam aatakam baoo, emes akot ape? Bimak binip tamba atetaramporay.

²⁰Dararawa, era aporaarum pakam, jane ajiaarum atakamam, atakam owe bakoretam baemekariem asan apok.” Emes atakam aesimemisen.

²¹Era ipit ajaoreme, ere jinim bae pak eraren. Are umur tahun 40am, wan tahun bakaimam, emes ajiireen. Era owe tanane era pak aporesen. Erarawa Allah tere aeomesen. Era atakam basakamtii owerawa, era owe ombare aememesen. Erarawa are era ipit amnuk bambi jokoman atakam akoromes, wanam asurumesen. Are era ipit amnuk baemejurusum asan apoken.

²³Era owe, Petrus anama Yohanes, asurumemes arawa, era ipit amnuk ajoo owepu aoesosemisen. Wanam, are Allah Tame pak baem owe daytuam, duturu oweam, era akoromes atakam, ajoo owe aesimtamemisen.

²⁴Era owe emes atakam jane ajies arawa, jak takan, atakam Allah Ajanimesen. “Tuhan! Wore wonamo oupam, tapirmiam, itimbup bwiam, era pakiin pakiin takesam, akenemapomkoromem.

²⁵Wore darerokor juas Daut, atakam bakoretam, atakam asakamtamem. Are wobambi karai baetam ipit. Allah Jipam, Daut, emes atakam bimak binip atetamen: ‘Era Yahudi apok saman, jokoman atakam apa jamkorames? Era oweam, bambi atakam apa jamsakamamtiies?

²⁶Tapirmi raja owe jii bajamom akukuramtiies. Kapar oweam ajarisiemes. Are Tuhanam, era Aeremtaere Ipitam, jii bajamom aememes.’ Daut emes atakam aeapomen.

²⁷Atakamnak, Herodesam, Pontius Pilatusam, era Yahudi apok samanam, Israel owe takesam, ara aemanse kota ajarisiemes. Are Yesus bajurusum akukuramtiies. Emesare, Yesus, wobambi karai baetam turunak Ipit. Wore era Ipit aeremtaerem.

²⁸Era owe, bonak atakam asakamtiiem pak baem, ajarisiemes. Emesare, Wore fiak. Wore emes baem akot aporem. Emesare, emes atakam basakamtii, ere wopak erare.

²⁹Tuhan! Waa ere, Wore era akorammas jokoman atakam baporey. Wore wobambi karai baetam owe, woatakam bakoretam jak fiak atetamey.

³⁰Wonom, wofiak pak ajamporomey, wanam damo pota owe ajamjaoromtaaey. Me wobambi karai baetam turunak Ipit, ere Yesus are. Wore Armat Ipit afiak pak atetamaro. Erarawa dare jinim bae pak aemtemarom.” Yesus bajamkai owe emes atakam ajanimesen.

³¹Emes atakam ajanimes arawa, era ajarisiapes tame awawarimen. Allah Jipam era owe aemomemkoromen. Era owerawa, Allah atakam, jak fiak aptam akoromesen.

³²Yesus eemnak ambesemkoromes owe takes jak takan aemomesen. Era owe, “Ara pak depak,” emes bajie apoknaken. Me, era pak takes takan aemomesen.

³³Era Yesus atakam bakoretam bamirimemom owe, Tuhan Yesus ajaorwasite atakam, ateman fiaknak atamesen. Allaham era owe asan akotnak atetamen.

³⁴Era owe aememes, pak apok owe, tamen apoknaken. Tapirmi armat owe takesam, tame armat owe takesam, era pak uang aouumamtaera ajiaarisin. Wanam era uang ataera ajiaaris,

³⁵erarawa era Yesus atakam bakoretam bamirimemom owe baipu ataetiia ajiaaris. Era Yesus atakam bakoretam bamirimemom owerawa, era uang, pak apok owe asaietama ajiaaris.

³⁶Lewi ipit takaam juas Yusuf emes aemen. Are Siprus tapirmi ajisamse ipit araren. Era Yesus atakam bakoretam bamirimemom owe, era ipit, wan juas Barnabas aemesen. “Barnabas” daatakam jow bauumamtaer, “Owe jak fiak baem ipit”in.

³⁷Armat ipitam tapirmi aemomen. Are tapirmi, uang aouumamtaere, wanam era uang Yesus atakam bakoretam bamirimemom owe baipu ataetiien.