Read Casuarina Coast Asmat AEMAARIS PAK 6 Bible Online

AEMAARIS PAK 6 - Casuarina Coast Asmat bible

AEMAARIS PAK 6

¹Emesare. Era barerawa, Yesus bajamkai owe betema betema ajiesen. Era Yunani atakam Yahudi saman oweam, Ibrani atakam Yahudi saman oweam, atakam ajamkoramesen. Era Yunani atakam owe, atakam akoramesen. “Tare juiin afaafemar asaietammakam amos, datano tapes, koser emes ataatammakam. Wanam Ibrani tano tapes, daytu emes ataatammakam.” Emes atakam aesimesen.

²Era Yesus atakam bakoretam bamirimemom owe 12 arawa, era Yesus bajamkai owe takes ajatesen. Are atakam akoromesen. “Dare Allah atakam bajanimtii, wanam era amos sai basaietam taka, ere potanak.

³Dejoo owe akot! Tare, taowe damon, turu owe poman ban jamnuk paereremartaay. Era owe Allah Jip aemomemkorommar owea. Are tastu owea. Dararawa, amos sai basaietam karai era owe atetamtemarom.

⁴Dararawa, atakam Allah bajanimam, bakoretamam, era taka aemtemarom.” Emes atakam aesimesen.

⁵Era owe takes arawa, emes atakam akot aporesen. Stefanus aeremtaeresen. Stefanus, Allah eemnak bamesemkorom ipitin. Allah Jipam, era ipit aemomemkoromen. Wan ere Filipus, Prokorus, Nikanor, Timon, Parmenas, Nikolaus, emes owe aereremartaaesen. Me Nikolaus, Antiokia saman ipitin. Bonaknak ere, are Yahudi agama amba afien.

⁶Era owe aereremartaaes owe, era owe poman ban jamnuk, era Yesus atakam bakoretam bamirimemom owe bipu atoomtinesen. Era Yesus atakam bakoretam bamirimemom owerawa, aban era, owe damo ten ataetiiesen. Erarawa atakam Allah ajanimesen.

⁷Emesare, owe Allah atakam apatomasaarisin. Yerusalem Yesus bajamkai owerawa, betema betema ajiaarisin. Allah Tame pak baem owe tananeam, Yesus ambesemaarisin.

⁸Emesare, Stefanus Allah atetamar asan akotam, fiak pakam, ataetkoromen. Armat ipit arawa, jinim bae pak daytinak era owe bipu aemen.

⁹Wan Yahudi owe samayen tame juas Basurumem Owe Tame era agama fiak owe ere, Stefanus, atakam ajamkoramesen. Kota Kirene oweam, kota Aleksandria oweam, Kilikia tapirmi oweam, Asia tapirmi oweam era owe aren.

¹⁰Allah Jip arawa, bimak binip basonak Stefanus atetamen. Erarawa era owe Stefanus atep baemejit asan apoken.

¹¹Era owerawa, uang wan owe atetamesen. Erarawa, era owe pote ateman atamesen. “Era ipit, Allaham, Musaam, tame ate. Danom ara atakam jane ajiom.” Emes atakam aesimesen.

¹²Era bambi oweam, era duturu oweam, Musa Basakamtam Atakam baememtam oweam, emes atakam jane ajies, wanam jak ambap aememesen. Are Stefanus afojomes, wanam ban akimomesen. Ararawa, armat ipit era Yahudi Agama Atakam Basakamtii Owe bipu atoomjiiesen.

¹³Are, pote ateman batamtam owe, atoomjiiesen. Era owerawa, pote ateman atamesen. “Ara aemema ipit Allah Turunak Tameam, Allah Musa ataetiitame basakamtam atakamam, tame atakam akoreme.

¹⁴Danom era ipit atakam jane ajiom. Are, ‘Era Nasaret Ipit juas Yesus, daAllah Tame ajumdaemtiitem. Are Musa ataetiiose pak tai, jow aouumtiitamtemaren.’ Emes atakam aesime.” Era pote ateman batam owe emes atakam aesimesen.

¹⁵Era Yahudi Agama Atakam Basakamtii Owerawa, Stefanus banamek fiak aemompesen. Abi malaikat bi awar aporesen.