Read Casuarina Coast Asmat ROMA 10 Bible Online

ROMA 10 - Casuarina Coast Asmat bible

ROMA 10

¹Dejoo owe akotnak! Dere Yahudi owe bajorem, jak aseserommin. Dere emes atakam Allah ajanimmin.

²Era owe, karai Allah baetam, akot aeemas. Dere eteporo. Me, era karai baetam pak amsamnak apok.

³Are Allah turunak owe basakamtii atakamam, amsam apok. Are turunak owe amba baemem aempores. Erarawa are, Allah, turunak owe atakam basakamtii pak, awotapemes.

⁴Kristus ere, Musa aeapome Basakamtam Atakam, akarimtiie. Erarawa Allah Kristus eemnak ambesemkorommas owe takes, turunak owe, emes atakam asakamtiim.

⁵Owe era Basakamtam Atakam ji aetas, Allah era owe, turunak owe, emes atakam basakamtii apaye? Apok apaye? Emesare, Musa era pak buku aeapomen. “Era Basakamtam Atakam ji baekorom owe, jiinenak aememaartemas.” Emes atakam aeapomen.

⁶Alkitab ere, Allah Kristus eemnak ambesemkorommas owe, turunak owe, emes atakam basakamtii, ere, emes atakam akorem: “ ‘Era wonamo oup tao tametto?’ emes bimak binip batetaram bas.” Emes atakam akorem. (Emes bimak binip, Kristus ara aemansa tapirmipu batoomdae bimak binip.)

⁷Wanam: “ ‘Era dambir owe asan tao daeto?’ emes bimak binip batetaram bas.” Alkitab emes atakam akorem. (Emes bimak binip, Kristus bajaoromwasumtum bimak binip.)

⁸Me, Alkitabam: “Allah aatakam, ere wore setep aemansa. Wonom era atakam ir pitina. Wonom era atakam jak bomona.” Emes atakam akorem. Emes atakam, Kristus eemnak bamesemkorom akoretammarom atakam are.

⁹Wore atakamnak akoretem, “Yesus, ere Tuhan. Are owe baomep Ipit,” emes atakam aesimtem, wanam wore, Allah, Yesus ajaoromwasumtume, emes atakam eemnak aportem ere, Allah wora ajortaerteman.

¹⁰Emesare, owe Yesus eemnak ambesemkoromtas, Allah, era owe, turunak owe, emes atakam asakamtiitem. Wanam, Are emes atakamnak akoretas, Allah era owe ajortaertem.

¹¹Me Alkitabam: “Armat Ipit eemnak ambesemkorommas owe takes, damke apok aememtemas.” Emes atakam akorem.

¹²Era Yahudi oweam, era Yunani oweam, ere awar. Ere takes aTuhan, takakor, Armat Ipit, era atakam Ara ajanimtas owe takes, asan akotnak atetamtem.

¹³Emesare, owe atakam Tuhan ajanimtas, Armat Ipit era owe ajortaertem.

¹⁴Me Armat Ipit bamesem apok owe ere, atakam Armat Ipit wama emejanimtas? Wanam, Armat Ipit atakam jane bajie apok owe, Armat Ipit wama emebesemtas? Wanam era atakam bakore owe apok emtas, are jane wama emejitas?

¹⁵Wanam, owe, atakam bakoretam owe bamirimemom apok aemtas, owe, Armat Ipit atakam wama emekoretas? Ere Alkitab atakam jipu: “Owe, Allah Akot Atakam atoomjinaotas, ere akotnak!” Emes atakam akorem.

¹⁶Wan owe ere, Allah Akot Atakam, ji bae apok. Yesayaam: “Tuhan! Era akoremarom atakam, tao owe besemtas?” Emes atakam aesimen.

¹⁷Emesare, owe Kristus atakam akoretas, owe era atakam jane ajitemas. Wanam are Kristus eemnak ambesemkoromtemas.

¹⁸Dere ere, bajatepora. Era owe, era atakam jane bajie apok apaye? Emesare, jane emejies. Alkitabam: “Owe, era atakam, era tapirmi owe takes etekoromes. Owe takes era atakam jane etejies.” Emes atakam akorem.

¹⁹Denom bojatepora. Era Israel owe era atakam amsam apok ape? Are amsam. Me Musa, era ajatepormin atakam atep bonak ajiten. Are Allah atakam akoromen: “Dere, deowenak apok ajortaertemin. Tararawa, itim akemtemakam. Dere janda owe ajortaertemin. Tararawa, jak ambap aememtemakam.” Allah emes atakam aesimen.

²⁰Yesayaam jak fiak aptam, atakam akoromen: “Allaham: ‘Me Dera bandimarpor apok owe, ere ataermanis. Denom dera bajatepor apok owe bipu ajisomo.” ’ Emes atakam akorem.

²¹Armat ipit ere, Israel atakam akorome. “Allah emes atakam akorem. ‘Ju ajiraomar, Dere era owe bataer, ban ajiraomemin. Era owe ere, atakam baoo owe. Are jane apok owe.” ’ Emes atakam akorem.