Read Casuarina Coast Asmat ROMA 15 Bible Online

ROMA 15 - Casuarina Coast Asmat bible

ROMA 15

¹Dare Kristus bajamkai fiak owe, era bajamkai fiak apok owe, bajamkaikorom aemapomay. Danom dapa jak akot pak jipu baem bas.

²Me, dare, oweo aememayom, Kristus takan bajamkai owe, jak akot baemapom. Dare era owe asan akot pak baem. Era pak owe Kristus bajamkai fiak baemapom are.

³Kristus, ere ajak akot pak baem apok aemaarir. Me, ere Alkitab atakam jipu: “Era owe tame atakam wora bata, ere tame atakam dera atenis.” Emes atakam akorem.

⁴Ere bonaknak buku aeapomes atakam takes, ere dara baememtam are. Alkitab atakam, dare jak jiraoam, jak fiakam, baemapom are. Erarawa dare jiirey Allah baee are.

⁵Era jak jiraoam, jak fiakam, emes atetamemar Allah, bimak binip awar tara batetamtan— Yesus Kristus aememtamaarir pak jipua.

⁶Emesare, tare bimak binip awaram, atakam takanam, Allah tere aeomtemakam. Armat Ipit, Yesus Kristus daTuhan, Aritipitam.

⁷Emesare, Kristus asan akot ataerteteren. Tanom tarmamon, owe asan akot ataerteteray. Era pak baem ere, Allah basitim are.

⁸Emesare, dere atakam tara akoretammin ere, Kristus Yahudi saman owe bambi karai baetam Ipit aememe. Era pak aeme ere, Allah pote apok Ipit baporom are. Ere, Allah, ataaji darfaisomar aee jipu baem are.

⁹Era pakam. Yahudi apok owe, Allah basitim are— era owe Allah owe soro ajiome apores are. Emesare, ere Alkitab atakam jipu: “Emesare, dere Yahudi apok owe damon, tere Wora aeomtemin. Dere, tere wora baeom so aetemin.” Emes atakam akorem.

¹⁰Me wan atakam arawa, “Tare Yahudi apok owee! Tare, Allah aereremartaae owe, jak akot takan aememay.” Emes atakam akorem.

¹¹Wanam, “Tare Yahudi apok owe takese! Tanom Tuhan tere aeomay. Era samane takes, Armat Ipit tere baeomtas.” Emes atakam akorem.

¹²Wanam, Yesayaam: “Isai wurpis ipit ajinaotem. Allah, Armat Ipit, era Yahudi apok owe atakam basakamtam, ataemomtem. Era oweam Armat Ipit jiirey aeetemas.” Alkitab emes atakam akorem.

¹³Allah tare A jiirey baee, emes bimak binip atetamemar Ipit. Tanom Armat Ipit eemnak ambesemkorommakam. Erarawa Armat Ipit, jak akotam, ji baem jakam, tara batetamtan. Me Allah Jip arawa, era jiirey baee pak tara akakaimtamaarteman.

¹⁴Dejoo owe akotnak! Dere tare owe akotnak aporkorommin. Tanom era akot pak baem tamsamnak aporkorommin. Tanom tarmamon ataane baoweam tamsam aporkorommin.

¹⁵Dere ere, aemansa surat wan atakam, jak fiak aptam akoremin. Era atakam, bimak binip tara bajanimomemtam are. Emesare, Allah emes pak baem akotnak dera atetamen. Erarawa dere atakam fiak tara akorommin.

¹⁶Era atetamen pak baem ere, Kristus Yesus karai baetam pak baem are. Denom Allah atakam bakoretam owe, emes pak baem aememmin. Derarawa, Allah Akot Atakam, Yahudi apok owe akoretammin. Erarawa dere era owe Allah atetammin. Ara owe pak Allah bataetiitam pak emes tamen atetammin. Allah, era owe, era pak emes tamen, akot aporem. Me Allah Jipam, era owe, turunak owe aemapomum.

¹⁷Kristus Yesusam dere takan ajamememman. Erarawa Allah aetamaaru karai ere, akot.

¹⁸Era aemaaru pak ere, Kristus dere karai takan ajameaaru. Erarawa, ere Kristus aemaarir pak are. Derarawa, emes atakam taka tara bakoretam jak fiak aememmin. Emesare, Yahudi apok owe, era aemaaru pak aporaaris. Are era akoreaaru atakam, jane ajiaaris. Anom era jinim bae aemaaru pak aporaaris. Allah Jipam, afiak pak dera atetamaarin. Erarawa Yahudi apok owe, Kristus atakam ji aees. Emesare, dere Yerusalem tapirmi aetaero, wanam Ilirikum tapirmi ajiire afasijio, dere Kristus Akot Atakam akoretamkoromo.

²⁰Dere Allah Akot Atakam, Kristus atakam jane bajie apok owe bakoretam, jak aseseromaaru. Dere, tame, owe ajirimapomes fesis ten baeapom emes tamen, baem-ombar.

²¹Ere Alkitab atakam jipu: “Owe, Armat Ipit atakam, era owe bakoretam apok aemaaris. Era owe ere, Armat Ipit atakam jane ajitemas. Era atakam jane bajie apok owe, jane ajiekoromtemas.” Emes atakam akorem.

²²Emesare, dere bare tanane tara bajarpor aema ajaio. Dere ere, tara baemejarpor asan apok.

²³Waa ere, dere karai ara asan aetiikoromo. Denom tahun tanane, tabi bapor, jak aseseromaaru.

²⁴Emesare, dere Spanyol tapirmi ajirtey, dere pir bamintep asan akot jaki tara bajit aemin. Denom tare wan owe Spanyol tapirmi takan bajar, akot ajimin.

²⁵Dere ere, Yerusalem bimin ajiomemmin. Denom waa era waut are. Dere uang, era asan turu owe batetam atoommin.

²⁶Me wan Yerusalem turu owe, ere pak apok. Erarawa, Makedonia owe, Akaya owe, uang era owe sai basaietam emes atakam amba ajamsakamamtiies.

²⁷Emesare, are era atakam amba ajamsakamamtiies. Era Yahudi owe, Kristus atakam, Yahudi apok owe aememtames. Erarawa Yahudi apok owe, Yahudi owe biti bajie akot. Are era owe pak batetamtas.

²⁸Me dere waa era pak baem ere, era uang, Yerusalem owe batetam atoomemtammin. Dere era ajarisisimes uang era Yerusalem owe atetamtey, dere Spanyol tapirmi ajirtemin. Dere ere, tatapirmiam asetetemin.

²⁹Dere tara ajarportey ere, dere Kristus era atetamemaro asan akot, atakam atoomjinaotemin.

³⁰Dejoo owe akotnak! Dare Yesus Kristus daTuhan eemnak ambesemkorommarom. Allah Jipam bafamfaimam jak atetamero. Erarawa dere atakam fiak tara ajanimmin. Tare Allah asan akot dera batetam, atakam fiak ajanimay. Denom era pak atakam tare takan Allah ajanimtemin.

³¹Me Yudea tapirmi Kristus atakam baoo owe, dera bajurusum bas. Wanam, Yerusalem turu owe, era atoomjirtey uang, jak akot aptam bataertas. Emes atakam Allah ajanimay.

³²Emesare, Allah akot aporto, dere jak akot aptam, tara ajarportemin. Denom jaki taasan ajittey, dere kais asan akot andetemin.

³³Allah ere, daji baem jak batetam Ipit. Armat Ipitam tare takes takan baemtan. Ara atakam, ere atakamnak.