Read Casuarina Coast Asmat ROMA 16 Bible Online

ROMA 16 - Casuarina Coast Asmat bible

ROMA 16

¹Me Febe, dajoo taot. Are era kota Kengkrea Yesus basitim bajarisiap owe, karai aetamum. Era taot, ere akot.

²Are Tuhan ataot. Erarawa armat taot bataeray— dare Yesus bamesem owe, owe bataer emes awara. Armat taot ere, pi owe tanane ajate. Anom pi dera ajaten. Emesare, are pak apok aemapto, pak afaafetamay.

³Tare selamat atakam Priska anama Akwila, baesimtamay. Araye deraye Kristus Yesus karai takan aetamemarom.

⁴Are, dera bajortaer, asan pota aemapes. Emesare, dere terima kasih atakam era owe akorommin. Me, de taka apok. Era Yahudi apok Yesus basitim bajarisiap owe takesam terima kasih atakam era owe akorommas.

⁵Tanom selamat atakam Priska anama Akwila tame Yesus basitim bajarisiap owe baesimtamay. Emesare, Epenetus dejoo ipit. Dere era ipit afaimmin. Are Asia tapirmi owe damon, Kristus bonak ajamkaie ipit arare. Tanom selamat atakam armat ipit baesimtamay.

⁶Tanom selamat atakam Maria baesimtamay. Armat taot karai fiak tara aetamen.

⁷Tanom selamat atakam Andronikus anama Yunias, baesimtamay. Are desaman owe. Are buji tame bomon takan aemapom owe arare. Era Yesus atakam bakoretam bamirimemom owe, era owe amsamnak. Are Kristus bonak ajamkaies. Derarawa asep ajamkaio.

⁸Tanom selamat atakam Ampliatus baesimtamay. Armat ipit Tuhan bajamkai ipit. Erarawa dere armat ipit afaimmin.

⁹Tanom selamat atakam Urbanus baesimtamay. Armat ipit, dare Kristus karai takan aetamemarom. Tanom selamat atakam Stakis baesimtamay. Denom armat ipit afaimmin.

¹⁰Tanom selamat atakam Apeles baesimtamay. Armat Ipit Kristus bajamkainak aporom. Tanom selamat atakam Aristobulus atame owe baesimtamay.

¹¹Tanom selamat atakam Herodion baesimtamay. Armat ipit desaman ipit. Tanom selamat atakam Narkisus tame Kristus ajamkaimas owe baesimtamay.

¹²Tanom selamat atakam Trifena anama Trifosa baesimtamay. Are Tuhan karai aetamemas owe arare. Tanom selamat atakam Persis baesimtamay. Dere armat taot afaimmin. Are Tuhan karai fiak aetame.

¹³Tanom selamat atakam Rufus baesimtamay. Armat ipit Tuhan karai akotnak aetamum. Tanom selamat atakam arsoot baesimtamay. Are dersoot tamen.

¹⁴Tanom selamat atakam Asinkritusam, Flegonam, Hermesam, Patrobasam, Hermasam, era owe takan aemapmas Yesus bajamkai oweam, baesimtamay.

¹⁵Tanom selamat atakam Filologusam, Juliaam, Nereusam, Nereus arpitam. Olimpasam, era owe takan aemapmas owe turuam, baesimtamay.

¹⁶Tanom tarmamon batir ajamjipiramay. Era asan takes Yesus basitim bajarisiap owe selamat atakam tara akoromman.

¹⁷Dejoo owe akotnak! Dere ataane fiak tara aoweommin. Tare era apapantaamas owe turuar. Era owe, wan owe Kristus bajamkai akoromporemas. Are aememaarukum atakam aoomas. Tare era owe beaksos asotamay.

¹⁸Era owe, Kristus daTuhan, karai baetam apok. Are ajak basenomem pak jipu karai aeemas. Era owe atakam afaimemas. Are era owe, owe akot, emes atakam akoromemas. Ere, bwea atakam taka. Me are era pota pak amsam apok owe, pote atakam akoromemas.

¹⁹Owe takes, tare Allah Akot Atakam ji aemakam pak, jane etejies. Emesare, tare dejak akot aememommankum. Dere tare era akot pak baporkorom, akot ajimin. Tanom era dosa pak basamo bata apok, emes, akot ajimin.

²⁰Allah ere, dare ji baem jak batetam Ipit. Armat Ipit, Bii Kapar Ipit, tabai bomon danais fef aemtiitamteman. Me daTuhan Yesus, asan akot, tara batetamtan.

²¹Timotius dere karai takan bae ipit. Armat ipit selamat atakam tara akoromman. Lukiusam, Yasonam, Sosipateram, desaman owe. Are selamat atakam tara akoromman.

²²Emesare, dere Tertius. Dere, Paulus akoremar atakam, surat aeapomtammin. Denom tare Tuhan takan bajamkai ipit. Dere selamat atakam tara akorommin.

²³Ara asan ere, dere Gayus tame ajamememo. Era asan Yesus basitim bajarisiap owe armat ipit tame bomon ajarisiapemas. Me armat ipitam selamat atakam tara akoromman. Ara kota pemerintah uang banamek batai ipit juas Erastus selamat atakam tara akoromman. Dare takan Yesus bajamkai ipit juas Kwartus selamat atakam tara akoromman.

²⁴Me Yesus Kristus daTuhan, asan akot tare takes batetamtan. Ara atakam, ere atakamnak

²⁵Allah tere baeomaartas! Are Ara bajamkai fiak, emes jak tara batetam fiak pak aemommar. Era akoretammin Allah Akot Atakam, ere Yesus Kristus atakam are. Era atakam. Allah bomonnak atakam. Tarainak, owe era bomonnak atakam amsam apok.

²⁶Waa ere, Allah era atakam baso aporomum. Oweam, Allah atakam bakoretam owe aeapomes atakam, jane ajies. Emesare, jiinenak aptam Allah, samane takes, era atakam jane bajie, atakam asakamtame. Ere, era owe takes Kristus eemnak bamesemkorom are. Anom owe takes, Allah atakam ji bae atakam.

²⁷Allah, ere taka. Armat Ipitam bimak binip baso anakotnak Ipit. Dare Yesus Kristus aeme pak apormarom. Erarawa dare Allah tere daytinak baeomaar. Ara atakam, ere atakamnak.