Read Casuarina Coast Asmat ROMA 4 Bible Online

ROMA 4 - Casuarina Coast Asmat bible

ROMA 4

¹Emesare. Dare waa darerokor juas Abraham atakam akoremarom. Armat ipit aemapom Yahudi owe darerokor.

²Me Abraham akot pak aeme, wanam Allah, armat ipit, turunak ipit, emes atakam asakamtiie apaye? Emes aeme apaye, ere Abraham amba baemetemtem asan erare. Me, are Allah bipu amba baemetemtem asan apok.

³Me Alkitabam, “Abraham, Allah eemnak ambesemkorome. Erarawa Allah, armat ipit, turunak ipit, emes atakam asakamtiie.” Alkitab emes atakam akorem.

⁴Emesare, pak baemtam ipit, abajitit pak ataeteme. Owe ere, era bajitit pak bambi batetam apok. Armat ipit, ere pak aemtamum. Erarawa era owe bajitit pak era ipit atetamemas.

⁵Allah, ere, dosa ipit, turunak ipit, emes atakam basakamtii Ipit. Me Allah eemnak bamesemkorom ipit ere, Allah are turunak ipit, emes atakam basakamtiitam, pak baemeemtam asan apok. Are ere, Allah eemnak ambesemkoromum. Erarawa Allah, armat ipit turunak ipit, emes atakam asakamtiim.

⁶Dautam emes atakam akoren. Ara atakam ere, Allah, owe, turunak owe, emes atakam asakamtiim. Era oweam pak Allah baemtam apok owe. Emesare, era oweam jak akotnak aememmas. Daut era atakam akoren. Me Dautam:

⁷“Allah, wan owe ajaos pak, bimak binip ajanimemtame. Are era owe adosa akokomosome. Era owe, ere asan akot.

⁸Tuhan, era owe adosa bajititimaraar apok aemum. Emesare, era owe asan akot.” Daut emes atakam aesimen.

⁹Era asan akot, era Yahudi owe pak tai tamane pitini basakamosom owe taka aapak ape? Apok. Are era tamane pitini basakamosom apok oweam aapak. Emesare, dere atakam tare emekoretamey: “Abraham, Allah eemnak ambesemkorome. Erarawa Allah, armat ipit, turunak ipit, emes atakam asakamtiie.” Emes atakam emeesimey.

¹⁰Allah era pak atakam ete bare sakamtiie? Abraham tamane pitini basakamosom apok aememe, wanam Allah emes atakam asakamtiie, emes ape? Owe Abraham tamane pitini basakamosom bonak aemes, wanam Allah emes atakam asep asakamtiie, emes ape? Emesare, Abraham tamane pitini basakamosom apok aememe, wanam Allah emes atakam asakamtiie.

¹¹Me Abraham tamane pitini basakamosom apok aememe, Allah, armat ipit, turunak ipit, emes atakam asakamtiien. Asep arawa, owe Abraham tamane pitini asakamosomesen. Era pak baem, Allah, Abraham turunak ipit, emes atakam bonak asakamtiie baporomtam pak are. Emesare, Abraham, Allah eemnak bamesemkorom owe takes, arerokor aememe. Allah, era tamane pitini basakamosom apok oweam ere, turunak owe, emes atakam asakamtiim.

¹²Bonaknak, darerokor Abraham, Allah eemnak bonak ambesemkoromen. Asep arawa, owe Abraham tamane pitini asakamosomesen. Waaam wan owe tamane pitini basakamosom. Me, are Allah eemnak bonak ambesemkoromes. Are Abraham aeme pak jipu taka aememas. Erarawa Abraham era owe arerokor.

¹³Allah ataaji Abraham aeen. “Wore wururupisam, ara aemansa tapirmi takes atoomemtemakam.” Emes atakam aesimen. Allah Abraham era Yahudi owe basakamtam atakam ji bae apore, wanam era ataaji aee? Emes apok. Me Abraham ere, Allah eemnak ambesemkoromen. Allahrawa, armat ipit, turunak ipit, emes atakam asakamtiien. Allah emes apore, wanam era ataaji aeen.

¹⁴Me, era basakamtam atakam ji bae owe, Allah ataaji aee atakam batoomem ere, Allah jiirey baee bambinak. Wanam, Allah ataaji aee atakamam, ere bambinak atakam.

¹⁵Allah era Yahudi owe basakamtam atakam baoo owe ajurusumtem. Me, era basakamtam atakam apok asan, owe, basakamtam atakam baemeoo asan apok.

¹⁶Abraham, Allah ambesemen. Erarawa Allah ataaji aeen. Era pak, Allah, Abraham arurupis takes, bambi atetamto pak baporom are. Era bambi batetam pak ere, era Yahudi owe basakamtam atakam ji bae owe aapak taka apok. Anom Abraham, Allah ambeseme emes tamen owe aapak. Me Abraham, ere dare takes darerokor.

¹⁷Ere Alkitab atakam jipu. “Dere wore samane tanane arerokor, emes ataemommin.” Allah emes atakam aesimen. Me ataaji aee Ipit, ere Allah. Emes ataaji aee, ere fiaknak. Abrahamam Allah ambesemen. Me Allah, ere, dambir owe bajaoromwasumtumtam Ipit. Are atakam asakamtamum. “Era ji baerem apok pak, emes ji baeremtas.” Emes atakam aesimum. Me Allah, emes aememmar Ipit.

¹⁸Me Abraham, ere emak fiaknak aememen. Erarawa are jii baemefim asan apoken. Emesanare, armat ipit ere, Allah jiirey taka aeen. Are Allah ambesemen. Erarawa are samane tanane arerokor aememen. Ere Alkitab atakam jipu: “Wururupis ere tananenak aememtemas.” Alkitab emes atakam akorem.

¹⁹Era bare ere, Abraham are umur tahun 100 apayeen. Are bimak binip atetaramem. “Dere emak fiaknak. Dere jii baemefim asan apok. Me Saraam, peree taot.” Emes bimak binip atetaramen. Emesanare, armat ipit ere, Allah eemnak ambesemkoromen.

²⁰Are Allah ambeseme bamompim apoken. Are Allah ataaji aee atakam, bimak binip arke apoken. Are Allah ambesemen. Erarawa jak fiak aememen. Are, “Allah akotnak.” Emes atakam aesimen.

²¹Are bimak binip atetaramen. “Allah fiaknak. Are era ataaji aeen atakam aemkoromteman.” Emes atakam aesimen.

²²Allaham Abraham eemnak Ara ambesemkorome aporen. Erarawa Are era ipit, turunak ipit, emes atakam asakamtiien.

²³Jipit taka ara atakam surat aeapome. “Are era ipit, turunak ipit, emes atakam asakamtiie.” Emes surat aeapomen. Era atakam ere, Abraham atakam taka apok.

²⁴Anom daatakam. Emesare, Yesus, daTuhan. Allah, Yesus ajaoromwasumtume. Danom Allah eemnak ambesemkorommarom. Erarawa Are, dare turunak owe, emes atakam asakamtiimaro.

²⁵Dare dosa baem owe. Erarawa Allah, Yesus, dambir batem aotasimemomtame. Allaham, Armat Ipit, ajaoromwasumtume. Ere, dare turunak owe, emes atakam basakamtii are.