Read Casuarina Coast Asmat ROMA 5 Bible Online

ROMA 5 - Casuarina Coast Asmat bible

ROMA 5

¹Emesare, dare Allah eemnak ambesemkoromom. Erarawa Are, dare turunak owe, emes atakam asakamtiie. Danom Allahjie akipimtaermarom. Ere daTuhan Yesus Kristus aemtamero pak are.

²Dare Yesus eemnak ambesemkoromom. Erarawa Armat Ipit ara asan akot atetamero. Emesare, danom era asan akot aemomemmarom. Danom Allah aakotipitnak pak atoomemmarom. Dare emes damsam. Erarawa dare jak akot aememmarom.

³Wanam, ajirisemmarom apaye, danom jak akot aememmarom. Ajirisemtam, dare jak fiak akakaimmarom apormarom.

⁴Jak fiak aememtam, dare turu akakaimemarom apormarom. Dare turu akakaimtam danom Allah jiirey akakaimmarom apormarom.

⁵Dare emes jiirey akakaimtam, ere dare jak pota baemap apok. Allah dare daytu afaimero apormarom. Me Allah atetamero aJip, emesam aporomtamero.

⁶Dare damba baemejorem asan apok aemapom ere, Kristus era aemapom jaos owe bajortaer dambir atemtamero. Are Allah atakam asakamtiie bare dambir atemtamero.

⁷Owe, turu owe bajortaer, dambir baemtam, ere apok apeno. Me, owe, era akot owe bajortaer, dambir baemtam akot ajimas apeno.

⁸Me, dosa owe aemapom ere, Kristus dara bajortaer, dambir atemtamero. Emes aeme, Allah daytu afaimmaro, apormarom.

⁹Kristus aesee atetame. Ere Allah dare turunak owe, emes atakam basakamtii esee. Kristus emes aeme, ere Are Allah ajokoman pak, dara ajortaertemaro.

¹⁰Bonak ere, dare Allah ajokoman owe aememom. Me, Andep dambir ateme. Ere dare Allahjie bojamkipimamtaer pak. Waa ere, dare Allah ajoo owe. Kristus ere ajaorwasite. Erarawa Are ajortaertemaro.

¹¹Me, era taka apok. Waaam, dare Allah jak akot ajamemamemmarom. Ere Yesus Kristus daTuhan, dare Allahjie bojamkipimamtaer atetamaro.

¹²Emesare, jipit taka, dosa, ara tapirmi aemtiien. Erarawa are dambir aemen. Owe takesam dosa aemes. Erarawa owe takesam dambir aememas.

¹³Bonaknak, Allah abasakamtam atakam, Musa batetam apok ere, ara tapirmi owe dosa bonak taema emesen. Me, Allah era basakamtam atakam aptam apok owe adosa bajititimar apoken.

¹⁴Me Adam aememe bare ere, wanam Musa aememe bare ajiire ere, era aememes owe takes dambir aemkoromesen. Me Adam dosa awar baem apok oweam, ere dambir aemkoromesen. Emesare, Adam era andaeto ipit emes tamen are.

¹⁵Era ipit amnuk ere, awarnak apok. Allah abambi batetam pak, Adam adosa awar apok. Era ipit taka dosa aemen. Erarawa owe tanane dambir aemes. Me, Allah asan akot atetame pak, ere akotnak. Are era asan akot, owe tanane bambi atetame. Anom jipit taka aeme pak are. Era ipit, ere Yesus Kristus are.

¹⁶Me Allah bambi batetam pak, ere Adam adosa awar apok. Era ipit taka dosa aeme ere, Allaham atakam asakamtiien. “Wore dosa.” Emes atakam aesimen. Me, era owe tanane dosa aemes ere, Allah era owe, asan akot aeme. “Tare dosa apok.” Emes atakam aesime.

¹⁷Jipit taka dosa aemen. Erarawa owe takes dambir aptam. Me, wan ipit taka aeme pak, ere daytinak. Era ipit Yesus Kristus are. Emesare, wan owe, Allah atetamemar asan akot, ataetemas. Are Allah bambi batetam pak aemomemas. Era bambi batetam pak ere, Allah era owe, turunak owe, emes atakam basakamtii are. Emesare, era owe ara tapirmi owe aemomemkoromtemas. Ere Kristus aemtame pak are.

¹⁸Emesare, jipit taka dosa aeme. Erarawa Allah, owe takes, dosa owe, emes atakam asakamtiie. Wanam, wan ipit taka akot pak taka aeme. Ere Allah, owe takes, dosa apok owe, emes basakamtii atakam are. Anom era owe jiine batetam are.

¹⁹Jipit taka atakam aooe. Erarawa owe tanane dosa owe aemapes. Wanam, wan ipit taka, atakam ji aee. Erarawa Allah, owe tanane, turunak owe, emes atakam asakamtiim.

²⁰Allah, Yahudi owe basakamtam atakam, owe atetame. Ere, era owe aememas pak, dosa daytu, emes baporom are. Era dosa akaime ere, Allah atetamemar asan akotam, ere daytinak aokaime.

²¹dosa, ere fiak. Erarawa owe takes dambir aptam. Me Allah asan akot batetam pakam, ere fiak. Erarawa Allah, dare turunak owe, emes atakam asakamtiim. Are jiinenak atetammaro. Ere Yesus Kristus daTuhan aemtame pak are.