Read Casuarina Coast Asmat ROMA 6 Bible Online

ROMA 6 - Casuarina Coast Asmat bible

ROMA 6

¹Erarawa, dare wama atakam okoretam? Dare dosa baemaar— erarawa Allah asan akot atetamemar pak aokakaitem? Emes ape?

²Emes apok! Emesare, dare dambir emeemom emes tamen are. Erarawa dosa, dara boemomem asan apok. Dare dosa baemaar bas.

³Tare era bwi bakupimtaer pak tamsam apok apaye? Emesare, dare Kristus Yesus takan aememom. Erarawa owe bwi akupimtaereroes. Owe bwi akupimtaereroes ere, dare Armat Ipit dambir aeme, emes tamen dambir aemom.

⁴Owe bwi akupimtaereroes, are dare Armat Ipit se takan awuapomeroes emes tamen are. Dare Armat Ipit dambir takan aemom emes tamen are. Ere dare ai jak batoomem are— Daritipit, era akotipitnak fiak pak aptam, Kristus ajaoromwasumtume tamen are.

⁵Dare Kristus dambir takan aemom emes tamen are. Emesamare dare, Armat Ipit takan ajaorwasitom emes tamen are.

⁶Owe Kristus salib oup atatopomes ere, datarai jakam dambir aemom emes tamen are. Ere, dadosa basenomem jak, bakumimosom pak. Anom, dosa afiak pak, dara boemomem-ombar.

⁷Emesare, owe dambir aemtas, dosa afiak pak, era owe boemomem apok.

⁸Dare Kristus dambir takan aemom emes tamen apaye, danom Armat Ipit takan ajaorwasitom emes tamen are. Erarawa danom ai jak atoomemmarom. Dare emes eemnak apormarom.

⁹Allah, Kristus ajaoromwasumtume. Kristus arawa, dambir boem apok aemtem. Era dambir pak, Armat Ipit baemomem apok aemtem. Dare emes damsam.

¹⁰Armat Ipit dambir aeme ere, Are dosa afiak pak bakumimosom dambir aeme. Are dambir boem apok. Emesare, are waa Allah takan jatiaptam aemeta.

¹¹Emesare, tare emes bimak binip atetaramay: “Dare dambir aemom emes tamen are. Erarawa dosa dara boemomem asan apok. Me, dare Kristus Yesus takan aemapom. Erarawa dare Allah akot apormar pak jipu baem, jatiaptam aemapom.” Emes bimak binip atetaramay.

¹²Dosa afiak pak, ere tadambir aptam damo aemomemto, tare, tajak basenomem pak jipu aemtemakam. Tare ere, emes boem bas.

¹³Tanom tadamo, dosa baem, botetam bas. Tadamo era jaos pak boem bas. Me, tadamo anakot aptam Allah atetamteteray. Emesare, tare dambir aemekem emes tamen are. Me, Allah tare ajaoromwasumtumen emes tamen are. Emesare, tadamo, akot pak baem, Allah atetamteteray.

¹⁴Tare Musa buku aeapome basakamtam atakam bomon baemap apok. Tare, Allah atetamemar asan akot bomon aemapmakam. Erarawa dosa afiak pak tara boemomem bas.

¹⁵Erarawa, dare wama tamenem? Dare Musa buku aeapome basakamtam atakam bomon baemap apok. Dare Allah atetamemar asan akot bomon aemapmarom. Erarawa dare dosa baem akot ape? Dare emes apok.

¹⁶Tare owe aatakam ji aetakam apaye, tare era owe abambi karai baetam owe. Tare dosa aatakam ji aetakam apaye, tare dosa bambi karai baetam owe emes tamen are. Tararawa, dambir aemtemakam. Tare Allah aatakam ji aetakam apaye, tare Armat Ipit bambi karai baetam owe. Armat Ipit arawa, tare turunak owe, emes atakam asakamtiitem. Tare emes pak tamsam apok apaye?

¹⁷Bonak ere, tare dosa bambi karai baetam owe aememaarukum. Asep ere, tare ara aememekem atakam ji jak aptam aekoromekem. Erarawa dare terima kasih atakam Allah akorommarom.

¹⁸Allah tare dosa afiak pak asurumtamen. Tararawa, era akot pak bambi karai baetam owe aememekem.

¹⁹Emesare, tare era bomon atakam jane baemejiekorom asan apok. Erarawa dere asamot owe era akoremas atakam, akoremin. Bonak ere, tare tadamo, asan pota pakam, jaos pak kupisam, emes baem atetamekem. Waa ere, tare tadamo akot pak baem, atetamteteray. Ere tare turunak owe baemem pak.

²⁰Tare dosa bambi karai baetam owe aememaarukum ere, akot pak tara baemomem apok aemaarin.

²¹Era aemaarukum pak ere, waa damke akemmakam. Ere asan akot pak apok. Ere dambir pak.

²²Allah ere, era dosa afiak pak, tare asurumtamen. Are Armat Ipit bambi karai baetam owe, tare ataemomen. Era asan akot aemapmakam pak, ere tare turunak owe aemapmakam. Tanom jiinenak aemomemmakam.

²³Dosa baem owe, dambir aemtemas. Allah bambi batetam pak ere, jiinenak baememaar are. Ere Kristus Yesus daTuhan aemtamero pak are.