Read Casuarina Coast Asmat ROMA 8 Bible Online

ROMA 8 - Casuarina Coast Asmat bible

ROMA 8

¹Emesare, waa Allah Kristus Yesus ajamkaimas owe, “Tare dosa owe,” emes atakam bokore apoknak aememem.

²Me Allah Jip, Yesus ajamkaimarom owe, aemomemmaro. Are jiinenak atetammaro. Armat Ipitam dera asurumtamen. Erarawa era dosaam, era dambir pakam, dera baemomem apok.

³Asamot owe, Musa Basakamtam Atakam ji baemeekorom asan apok. Erarawa Musa Basakamtam Atakam, asamot baemejortaer asan apok. Allah ere, Andepnak ataendaeme. Andepam adamo, asamot dosa damo tamen ajaoreme. Armat Ipit dadosa bakokomosom dambir ateme ere, Are dosa akumimosome. Me dosa dara boemomem-ombar.

⁴Allah emes aeme ere, era pak, dare Musa Basakamtam Atakam ji akot baeekorom are. Emesare, dare daasamot jak basenomem pak jipu baem apok aemtam, wanam Allah Jip akot atakam jipu aemtam, dare Musa Basakamtam Atakam ji aeekoromemarom.

⁵Era ajak basenomem pak jipu baem owe, ajak basenomem pak bimak binip taka atetaramemas. Me, Allah Jip akot apormar pak jipu baem owe, Armat Ipit akot apormar pak bimak binip taka atetaramemas.

⁶Era ajak basenomem pak bimak binip taka atetaramemas owe, dambir atememas. Me, Allah Jip akot apormar pak bimak binip taka atetaramemas owe, jiine aemememas. Are Allahjie akipimamtaeremas.

⁷Emesare, ajak basenomem pak bimak binip taka atetaramemas, Allah jokoman owe aemememas. Are Musa Basakamtam Atakam ji bae apok. Erarawa are Musa Basakamtam Atakam ji baemee asan apok.

⁸Me ajak basenomem pak jipu baem owe, Allah akot apormar pak jipu baemeem asan apok.

⁹Allah Jip tajak bomon aemapemar apaye, tare tajak basenomem pak jipu baem apok. Tanom Allah Jip atakam jipu aememakam. Me Kristus Jip aptam apok owe, ere Kristus owe apok.

¹⁰Tadamo dosa aptam. Erarawa tanom dambir aptam. Me, Kristus tajak bomon aemapteterman apaye, Allah Jip, jiinenak tara atetamteterman. Allaham tare turunak owe, emes atakam asakamtiie. Erarawa Kristus era pak tara aemtameman.

¹¹Allah, Yesus ajaoromwasumtume. Emesare, Allah Jip tajak bomon aemapemar apaye, Kristus ajaoromwasumtume Ipit, jiine, tadambir aptam damo, atetamum. Era jiine Allah Jip, tajak bomon aemapemar pak are.

¹²Dejoo owe akotnak! Emesare, dare dajak basenomem pak jipu baemtam apok.

¹³Tare, tajak basenomem pak jipu aemtakam, ere dambir atemtemakam. Me, tare tajak bomon dosa atatiiaartakam, ere jiine aememtemakam. Me Allah Jip, emes baem, takan ajamemaareman.

¹⁴Me Allah Jip atakam ji bae owe, ere Allah arereis.

¹⁵Era ataetekem Allah Jip, tare bambi karai baetam owe, bataemom apok. Are ombare bombar owe, tara bataemom apok. Me, era ataetekem Allah Jip, Allah arereis tara ataeten. Erarawa dare atakam Allah ajamkoramtam, dare, “Dot!” wanam “Are Deritipit!” emes atakam aesimtetermarom.

¹⁶Me Allah Jipam atakam daanakot owe akoromteteremaro. “Wore Allah jii.” Emes atakam aesimteteremaro.

¹⁷Allah, asan akot aowe atetameme. Danom Allah jii. Erarawa dare, era asan akot atoomemmarom. Armat Ipitam asan akot Kristus atetamtem. Danom asan akot Kristus takan ajamemomemtemarom. Dare Kristus takan ajamjirisemtam, danom Armat Apit, aakotipitnak pak takan ajamemomemtemarom.

¹⁸Me waa ajirisememarom pakam, Allah atetamtaro akotipitnak pakam, ere awar apoknak. Dere era pak demsam.

¹⁹Bare taka, Allah, arereis asan akotnak aemaptas pak, aporomtem. Me Allah akenemapome pak takes era pak bapor, jak aseseromemas. Are era pak banamek, apemes.

²⁰Bonak ere, Allah era pak takes akenemapomen. Armat Ipit ere, era pak takes bambi pak baemap atakam asakamtiien. Era pak takes bambi pak baemap ere, era pak atakam amba basakamtii pak apoken. Emesare, Allah emes atakam asakamtiien. Me, era pak takes jiirey Allah aeemas. Are, Allah, era pak takes, ofa baofames apok pak bojaoromtaer, emes jiirey aeemas. Era pak takes Allah arereis aemaptas asan akotnak awar baemap akoten.

²²Waa ajiire aemansa ere, Allah akenemapome pak takes ajirisapemas. Erarawa are jende atawuomemas. Are, tapes, jii bajisipetii damo asesa emes tamen are. Danom emes damsam.

²³Me jende atawuomemas pak ere, Allah akenemapome pak taka apok. Ere dare Allah Jip aptam oweam are. Me Allah Jip, Allah bonak atetamero pak are. Asep bare, Are wan pakam atetamtemaro. Dare Allah dara bataetkoromnak bare baemames banamek apemom. Era bare, Armat Ipit ai damo atetamtemaro. Emesare, era bare ajiire dare dajak bomon jende atawuommarom.

²⁴Allah dara ajortaerero ere, Are ai damo dara batetam atakam akoromero. Emesare, danom era pak banamek apemom. Dare era banamek bapem pak bataet ere, dare era pak banamek boopem apok.

²⁵Me, dare era bapor apok pak, jiirey aeetam, dare era pak banamek jak jirao aptam apemmarom.

²⁶Emesamare, dare kumiti aememtam, Allah Jip pi dara ajatomattemaro. Danom atakam Allah bajanimnak damsam apok. Me Allah Jip ere, atakam Allah ajanimtamemaro. Atakam Allah ajanimtamemaro ere, Allah Jipam jende daytinak atawuomeme. Dare asamot owe ere, jende daytinak atawuomemar pak, atakam baemekorekorom asan apok.

²⁷Allah, asamot owe ajak bomon pak takes amsam. Erarawa Are Allah Jip abimak binipam amsam. Me Allah Jip, Allah akot apormar pak jipu, atakam Armat Ipit ajanimeme. Are, Allah, asan akot aowe batetam, emes atakam ajanimeme.

²⁸Allah, Ara afaimmas owe, asan akot atetameme. Era owe bajirisem apaye, bajirisem apok apaye, ere takes, era owe asan akot baemapom pak. Era owe ere, Allah, abimak binip akukuretiie jipu baem ajate owe erare.

²⁹Bonaknak, Allah Andep ajamkaitas owe amsam. Erarawa are era owe Andep tamen baemem atakam bonak asakamtiie. Era pak Andep, biiti ipit baemem are. Anom Andep ajamkaitas owe tanane, aykun owe baemem are.

³⁰Emesare, era owe Allah Andep tamen baemem atakam bonak asakamtiie. Are era owe ajate. Are era ajate owe, turunak owe, emes atakam asakamtiie. Are era atakam asakamtiie turunak owe, aakotipitnak pak atetame.

³¹Dare emes apormarom ere, dare wama atakam okoretam? Emesare, Allah dare takan ajamememmaro. Erarawa owe dara baemekumimosom asan apok.

³²Allaham Andep ban fiak bakem apoknak aeme. Are, Andep, dare takes dambir batemtam ataendaemtamero. Erarawa Are era akot pak takes dara batetam ere, wama tamenem?

³³Me Allah aereremartaae owe, dosa baem owe, emes atakam tao koreto? Emesare, Allah, era owe, turunak owe, emes atakam asakamtiie.

³⁴Era owe, dosa baem owe, emes atakam tao sakamtiito? Emesare, emes atakam owe apoknak. Kristus Yesus, era dambir ateme Ipit are. Are dambir taka batem apok. Allah, Armat Ipit ajaoromwasumtume. Waa Armat Ipit Allah bo poman aapeta. Armat Ipit atakam fiak Allah ajanimtamemaro.

³⁵Kristus dara bafaim, tao karimto? Ajirisemtam apaye, asan pota aemaptam apaye, owe aemsokomtaroas apaye, amostonak aememtam apaye, pakaian apok aememtam apaye, owe dara atatiitaroas apaye, ere era pak takes, Kristus dara bafaim bakarim apoknak.

³⁶Me Alkitabam: “Dare wora ajamkaimarom. Erarawa juiin afaafemar, owe dara batatii atakam akoremas. Are, owe era atatiitas domba tamen, dara aememmaroas.” Me Alkitab emes atakam akorem.

³⁷Me, Kristus dara afaimmaro. Emesare era pak takes dara bakumimosom apoknak. Dare fiaknak aememmarom.

³⁸Dambir atemtam apaye, jatiaptam aememtam apaye, Allah dara bafaim pak baemekarim asan apok. Malaikat takes apaye, wonamo oup pemerintah owe apaye, wonamo oup kapar owe apaye, Allah dara bafaim pak baemekarim asan apok. Owe waa aemaroas pak apaye, era asep bare aemtaroas pak apaye, wonamo oup pak apaye, ara aemansa tapirmi pak apaye, Allah akenemapomar wan pak apaye— ere, era pak takes, Allah dara bafaim baemekarim asan apok. Dere emes demsam. Emesare, dare Kristus Yesus daTuhan, takan ajamememmarom. Erarawa Allah dara afaimmaro.