Read Casuarina Coast Asmat 1 KORINTUS 1 Bible Online

1 KORINTUS 1 - Casuarina Coast Asmat bible

1 KORINTUS 1

¹Dere Paulus. Dere, Kristus Yesus atakam bakoretam ambirimemomen. Allaham, era pak baem akot ajie. Emesare, dajoo ipitam Sostenes, ara surat takan aeapommarom.

²Me tare Korintus aemapakam Yesus basitim bajarisiap owe, ere Allah aowe. Me Kristus tare turunak owe aemapomen. Armat Ipitam tare turunak owe baemem ajaten. Era samaniin samaniin Yesus Kristus bamesem oweam, emes taka are. Armat Ipit ere, era owe aTuhan. Anom daTuhan. Emesare, dare ara surat tara atetammarom.

³Daritipit Allaham, Tuhan Yesus Kristusam, asan akot tara baemtan. Are ji baem jak tara batetamtan.

⁴Emesare, tare Kristus Yesus ajamkaimakam. Erarawa Allah asan akot tara aemtamen. Dere emes apormin, wanam terima kasih atakam Allah akorommin.

⁵Tare Kristus takan aememmakam. Erarawa Allah era aakot pak takes tara aemomemkoromen. Emesare, era akoremakam atakam takes, ere akotnak. Tanom tamsam daytinak.

⁶Emesare, dere Kristus aemto pak, atakam tara akoromo. Armat Ipitam era atakam jipu taka tara aemen.

⁷Me Yesus Kristus daTuhan aofasiendaeto bare ere, owe takes abi aportemas. Tare era bare bajinao banamek apemakam ere, tanom era asan akot pak takes aemomemkorommakam.

⁸Armat Ipitam tare era asepnak bare ajiire Ara bajamkaiaar, emes jak fiak pak tara atetamteman. Emesare, Yesus Kristus daTuhan aofasiendaeto bare, Are, “Tare atet apok owe,” emes atakam aesimtem.

⁹Allah, ere, era ataaji aee pak takes, aemkoromtem. Armat Ipitam tare Andep, dip baemem ajaten. Me Andep ere, Yesus Kristus daTuhan.

¹⁰Dejoo owe akotnak! Dere Yesus Kristus daTuhan karai baetam ipit. Erarawa dere ataane tara aoweommin. Atakam awara. Tarmamon bajampapamamtaa bas. Bimak binip awarnaka. Atakam awar asakamtiiay.

¹¹Dejoo owe akotnak! Keloe wan ajoo owe, atakam dera akoromenis: “Era Korintus Yesus bajamkai owe atakam ajamkoramemas.” Emes atakam aesimenis.

¹²Era akoremin atakam ere, tare wan oweam, “Dere ere Paulus bajamkai.” Tare wan ere. “Dere ere Apolos bajamkai.” Tare wan ere, “Dere ere Kefas bajamkai.” Tare wan ere, “Dere ere Kristus bajamkai.” Emes atakam aesimteteremakam.

¹³Erarawa tare Kristus sai saiekemane? Paulus era salib wus oup dambir tara temtamene? Owe bwi tara akupimtaeren, are Paulus juasa jiemese?

¹⁴Emesare, dere bwi Krispus anama Gayus taka akupimtaero. Dere tare wan aemapakam owe bwi bakupimtaer apok. Emesare dere terima kasih atakam Allah akorommin.

¹⁵Emesare, owe, “Bwi era akupimtaerenis ere, are Paulus juas ajiemes,” emes atakam baemekore asan apok.

¹⁶Dere Stefanusam, atame oweam, bwi akupimtaero. Dere wan oweam bwi akupimtaero apaye, dere emes bimak binip bajanimomem apok.

¹⁷Emesare, Kristus, dere owe bwi bakupimtaer bamirimemom apok. Are Allah Akot Atakam bakoretam ambirimemomen. Are dere asamot owe abomon atakam bakoretam bamirimemom apok. Erarawa dere Allah Akot Atakam akoretamtey, dere asamot owe abomon atakam bakore apok aemtemin. Owe, Kristus salib oup dambir ateme atakam, bambi atakam, emes bimak binip batetaram-ombar.

¹⁸Era danais aemaptas owe ere, Kristus salib oup dambir ateme atakam, janda atakam eraren. Me ajoremmarom owe ere, ara atakam, Allah afiak pak atakam apormarom.

¹⁹Alkitabam: “Dere era bimak binip baso owe, abimak binip baso pak ajanimosomtemin. Denom era amsam owe, era amsam pak akarimtiitemin.” Allah emes atakam akorem.

²⁰Erarawa, era bimak binip baso owe eteperam? Me ara tapirmi atakam baememtam tastu oweam eteperam? Ara tapirmi atakam bajamkoram tastu oweam eteperam? Emesare, Allah ara tapirmi bimak binip baso pak, janda pak aporomtamum.

²¹Allah bimak binip basonak. Erarawa Are emes atakam asakamtiie: “Asamot owe abimak binip baso atetaramtas, are Dere amsam baemem asan apok. Dere ere, era “janda” atakam ambesemmas owe ajortaertemin.” Emes atakam aesime. Emesare, danom era “janda” atakam akoretammarom.

²²Era Yahudi owe, jinim bae pak bapor, atakam fiak ajanimemas. Me Yunani oweam, bimak binip baso atakam jane bajie akot ajiemas.

²³Dare ere, Kristus salib wus oup dambir ateme atakam akoretammarom. Me Yahudi owe ere, era atakam bifane afeomememas. Era Yahudi apok oweam, era atakam, janda atakam emes aren.

²⁴Me, Allah ajate Yahudi oweam, Yunani oweam, Kristus, Allah afiak pak baporomtam Ipit apormas. Are Armat Ipit, Allah abimak binip baso pak baporomtam Ipitam apormas.

²⁵Allah ajanda pak, ere bimak binip baso pak daytu. Asamot owe abimak binip baso pak ere, koser. Allah akumiti pakam, ere fiak pak daytu. Asamot owe afiak pak ere, fiak pak koser.

²⁶Dejoo owe akotnak! Me Allah tara ajaten bare, bimak binip bajanimomay. Era bare ere, tare bimak binip baso owe, ere tanane apok. Me tare juas aptam aememekem oweam, tanane apok. Me tare pak daytu aemomekem oweam tanane apok. Era atakam ere, asamot owe abimak binip jipu pak erare.

²⁷Asamot owe abimak binip ere, “Ere janda pak,” emes atakam aesimemas. Allah ere, era “janda” owe, bimak binip baso owe damke bakamapom aereremartaae. Are era kumiti pak, era fiak owe damke bakamapom aereremartaae.

²⁸Are, asamot owe pota aporemas oweam, asamot owe bifane afeomememas oweam, juas apok oweam, aereremartaae. Are era owe juas aptam owe bakumimosom aereremartaae.

²⁹Era pak aemee ere. Asamot owe Allah bipu amba baemetemtem-ombar.

³⁰Allah ere, tare Kristus Yesus takan aemapomen. Armat Ipitam, Kristus, dare bimak binip baso batetam ipit ataeme. Allaham Kristus aeme pak apore. Erarawa, dare turunak owe, emes atakam asakamtiie. Me Kristusam dare turunak owe aemapomero. Armat Ipitam era dosa fiak pak dara asurumtamero.

³¹Ere Alkitab atakam jipu. Ara atakam, “Era baemetemtem owe, Tuhan taka batemtemtas.” Emes atakam akorem.