Read Casuarina Coast Asmat 1 KORINTUS 10 Bible Online

1 KORINTUS 10 - Casuarina Coast Asmat bible

1 KORINTUS 10

¹Dejoo owe akotnak! Dere, tare janda baemap pota. Era darerokor Musa ajamkaies ere, wonamo fasar bonak ajaremen. Era owe takes arawa, era wonamo fasar jipu atawejesen. Era itimbup bwiam poman ajampamamtaeren. Era owe ere, era poman tamao asan akot aokorjiresen.

²Era owe takes Musa ajamkaiesen. Erarawa Allah, era owe takes era wonamo fasar damonam, era itimbup bwi damonam, bwi akupimtaere emes tamen aren.

³Are takes Allah ataendaeme banda pak taka andesen.

⁴Are takes Allah ataendaeme bwi andesen. Me Allah ataendaeme eka, bwi, era owe atetamen. Era ekaam, era owe ajamjaren. Era eka ere, Kristus aren.

⁵Me, Allah, wan owe tanane aemes pak, pota aporen. Erarawa, era owe, tame apok asan dambir atesen.

⁶Era owe dambir ates pak, bimak binip daobajanimomem pak. Dare era owe era pota pak jak asenomemes pak, jak basenomem-ombar.

⁷Danom eto basitim bas. Alkitab atakamam, “Era owe amosam, bwiam, banda andaepakiapes, wanam di bandie awasites.” Emes atakam aeapoma.

⁸Danom wan owe emes tamen asan pota pak baem bas. Era owe ere, emes pak aemes, wanam bare taka, owe 23.000 dambir atesen.

⁹Danom wan owe emes tamen, Tuhan baempor bas. Era owe emes aemes, wanam amber sisi dambir atesen.

¹⁰Era oweam Musa asan pota atakam akoromesen. Erarawa era Batatii Malaikat era owe atajimirtiien. Tare ere, era akores atakam tamen baem bas.

¹¹Emesare, Allah era pak era owe aeme ere, anom jane daobaporejie are. Oweam era atakam aeapomes ere, are bimak binip daobajanimomem pak. Dare, era owe aemes pota pak bameem-ombar. Emesare, dare ara asepnak bare baemap owe aemapmarom.

¹²Wan owe abimak binip ere, “Dere Kristus bajamkai fiak aomaia,” emes atakam aesimemas. Era owe ere, turu baememtas. Are bandaebuames-ombar.

¹³Tare dosa baem atatapimtaaeman pak, era pak ere, ta taka apok. Asamot owe takes emes taka are. Me, Allah era ataaji aee atakam, aemkoromtem. Armat Ipit, tare dosa baem batatapimtaa pak daytinak batetam apok aemtem. Tare era dosa baem-ombar. Tare dosa baem atatapimtaatan pak, Allah era batatapimtaa pak bawotapem fiak pak atetamteman. Are, tare era dosa baofe asan atetamteman.

¹⁴Dejoo owe akotnak! Erarawa, tare era eto kupis basitim awotapemaaray.

¹⁵Tare bimak binip aptam owe aemapakam. Emesare, tare era akoremin atakam ji bae apaye atakam asakamtiiay.

¹⁶Perjamuan Tuhan andetam ere, dare era bwi “Terima kasih” atakam Allah akoromemarom. Emesare, Kristus aesee asan akot aemapomero. Dararawa, era bwi takan andetam, dare era asan akot takan aemapmarom aporomtamemarom. Kristus adamoam asan akot aemapomero. Danom era perjamuan Tuhan amos akookomtaatam, wanam era amos takan andetam, dare era asan akot takan aemapmarom aporomtamemarom.

¹⁷Era amos jise, ere taka. Era amos jise taka andemarom owe ere, tanane. Erarawa dare takes Kristus adamo taka emes tamen aemapmarom.

¹⁸Era Israel owe aememas pak bimak binip atetaramay. Owe, pak, era pak Allah jis bajaatam joo ten ajaatamemas. Era pak andetas oweam, “Pak Allah era joo jis bajaatam akot,” emes tamen aesimemas.

¹⁹Era akoremin atakam ere, wama tamenem? Emesare, owe dasa eto atetamemas. Ere eto basitim pak. Era eto jatiaptam ape? Era dasa ere, anakot dasa ape?

²⁰Emesare, era anakot pak apok. Era akoremin atakam ere, Israel apok owe, era eto basitim dasa atetamtas, are bii asitimemas. Are Allah basitim apok. Emesare, dere tare bii bajamkai potanak.

²¹Tare Tuhan bwiam, bii bwiam, jamnuk takes baemenda asan apok. Tare Tuhan amosam, bii amosam, jamnuk takes baemenda asan apok.

²²Dare Tuhan bet basisimome? Dare fiake? Tuhan kumiti? Emes ape?

²³Dare ara pakiin pakiin takes baem, ere karao apok. Me, wan pak baem ere, asan akot pak apok. Dare ara pakiin pakiin takes baem karao apok. Me wan pak baem ere, owe Yesus bajamkai fiak baemapom pak apok.

²⁴Owe apa asan akot pak taka baem bas. Me, are asan akot wan owe baemtas.

²⁵Tare, era pak bajitin asan, era uang ajitinemas pak kupis banda, ere akot. Tanom, “Dere era banda pak andetey, dejak bomonam, ‘Era aemmarem pak dosa,’ emes atakam aesimteman apeno,” emes bimak binip batetaram bas.

²⁶Ara tapirmiam, ara pakiin pakiin takesam, ere Tuhan pak.

²⁷Kristus bamesem apok owe, tare amos takan banda atakam ajanimtan, are tabipu ataapomtamtan banda pak banday. Tanom, “Dere era banda pak andetey, dejak bomonam, ‘Era aemmarem pak dosa,’ emes atakam aesimtan apaye,” emes bimak binip batetaram bas.

²⁸Me, owe atakam tara akoromtan, “Owe aapak ere, eto basitim emetetamares,” Emes atakam aesimtan apaye, ere era pak banda bas. Ere, era atakam tara akoromtan owe, dosa baem-ombar. Wanam, era owe jak bomonam, “Wore dosa aemmarem,” emes atakam era owe bakore-ombar.

²⁹Era akoremin jak bomon atakam, ere wan owe ajak bomon atakam. Ere tajak bomon atakam apok. Wan owe ere, emes atakam akoretemas apeno: “Dere wan owe, ajak bomon atakam jipu baem ere, wama tamenem?

³⁰Dere era takan andetey amos, terima kasih atakam Allah akoromtey ere, owe dere era amos banda, atakam pota dera bakorom wama tamenem?” Emes atakam aesimtemas apeno.

³¹Tare ere, amosam, bwiam, andetakam apaye, wan pak aemtakam apaye, ere era pak takes Allah basitimkorom pak jipu aemay.

³²Me Yahudi owe apaye, Yahudi apok owe apaye, Yesus basitim bajarisiap owe apaye, era aemtakam pak aportas, are dosa baem-ombar.

³³Denom are. Dere era aememin pak takes, era owe takes jak akot aemtamemin. Era aememin pak, ere depak apok. Ere era owe takes aapak. Ere ara owe bajortaer pak.