Read Casuarina Coast Asmat 1 KORINTUS 3 Bible Online

1 KORINTUS 3 - Casuarina Coast Asmat bible

1 KORINTUS 3

¹Dejoo owe akotnak! Dere, tare, Allah Jip atakam ji bae owe emes tamen, atakam tara baemekore asan apok. Tare ere, asamot jak basenomem pak baem owe are. Tare Kristus japen ajamkaiekem emes tamen are. Tare tapinto jii emes tamen are.

²Dere ao tara andamaarin emes tamen are. Dere amos tara bandam apok aemaarin emes tamen are. Tare amos baemenda asan apok aemaarukum. Waa ajiiream tare amos baemenda asan apok.

³Tare waa ajiiream, asamot jak basenomem pak aemmakam are. Tare itim akemekem. Tanom atakam ajamkorammakam are. Erarawa tare asamot jak basenomem pak aemmakam are. Tare Yesus bajamkai apok owe emes tamen aemmakam.

⁴Tare wan owe atakam akoremakam, “Dere Paulus bajamkai.” Emes atakam aesimemakam. Tare wan owe ere, “Dere Apolos bajamkai.” Emes atakam aesimemakam. Erarawa, tare Yesus bajamkai apok owe emes tamen aemmakam.

⁵Me Apolos ere, wama ipitim? Me Paulusam wama ipitim? Dare ere, Allah karai baetam owe taka. Dare atakam tara akoromom. Tare ere, Yesus eemnak ambesemkoromekem. Danom jipit taka jipit taka Tuhan atetamero pak karai aeemarom.

⁶Dere ara eek ajapomo emes tamen are. Apolos arawa, ara eek bwi akukume emes tamen are. Allah ere, ara eek ajite aemapome emes tamen are.

⁷Ara eek bajapom ipitam, ara eek bwi bakukum ipitam, anakot apok. Allah ere, ara eek aojitimapomum. Emesare, Armat Ipit ere, anakotnak.

⁸Ara eek bajapom ipitam, ara eek bwi bakukum ipitam, awar. Allaham, asan akot akarai baetam owe, oweo aememayes aemum. Are oweo aememayes akarai aemas jipu aemtem.

⁹Emesare, dare Allah karai takan aeemarom. Tare ere, Allah akebun emes tamen are. Tanom Allah aTame emes tamen are.

¹⁰Allah, tame baeapom tastu pak, dera atetamen. Dere ere, tame fesis ajirimapomo emes tamen are. Wan ipit ere, tame ara fesis ten aetiie emes tamen are. Me, ara fesis ten tame baetii owe, oweo aememayes turunaka baetiitas. Tame akot baeapomtas.

¹¹Owe wan fesis baemejirimapom asan apok. Me ajirimapomo pak taka, ere fesis anakot erare. Era fesis ere, Yesus Kristus are.

¹²Owe era tame aoeapomtas ere, wan owe emas apaye, perak apaye, eka akotnak apaye, aeapomtemas. Wan owe ere, wus apaye, takapin apaye, wone apaye, aeapomtemas.

¹³Tuhan Bare aemamesto, owe, era karai owe, karai akot aees apaye, karai pota aees apaye, aporkoromtemas. Jisimak era pota pak ambomtiitem. Me, jisimak era akot pak baemebomtii asan apok. Erarawa era jisimak, ara karai, akot apaye, pota apaye, aporomtamtem.

¹⁴Era fesis tene aeapomes tame, jisimak bamit apok aemto, Allah era tame baeapom owe, asan akot atetamtem.

¹⁵Owe akarai pak jisimak ambimtas, are era asan akotnak baemap apok. Armat owe ere, ajoremtetertemas. Owe, era owe, jisimak bomon ametetaeres emes tamen aememtemas.

¹⁶Emesare, tare Allah aTame. Wanam Allah Jip tajak bomon aeamapeme. Emes tamsam apokane?

¹⁷Allah Tame ere, bambi tame apok. Erarawa, owe, Allah Tame danais aemtiitas, Allah, era owe danais aemtiitem. Allah Tame ere, tarare.

¹⁸Owe potet amba batutumem bas. Owe bimak binip atetaramtas, “Dere ara aemansa tapirmi bimak binip baso pak aemomemin,” emes atakam aesimtas, are janda owe emes tamen baememtas. Janda owe emes tamen aememtas, ere bimak binip basonak owe aememtemas.

¹⁹Allah ere, asamot owe bimak binip baso pak, janda pak aporem. Emesare, Alkitabam, “Armat Ipit, era bimak binip baso owe, apotet atutumar pak aportem.” Emes atakam aeapoma.

²⁰Wanam, “Tuhan, era bimak binip baso owe abimak binip bambi pak aporem.” Alkitab emes atakam aeapoma.

²¹Erarawa, owe era asamot owe aeamemas pak batemtem bas. Emesare, ere takes tapak.

²²Paulusam, Apolosam, Kefasam, taowe. Ara aemansa tapirmiam, ara jiine pakam, ara dambir pakam, waa aemansa pakam, asep bare aamseunaoto pakam, ere takes tapak.

²³Tanom Kristus aowe. Kristusam Allah aIpit.