Read Casuarina Coast Asmat 1 KORINTUS 4 Bible Online

1 KORINTUS 4 - Casuarina Coast Asmat bible

1 KORINTUS 4

¹Owe, dare Kristus bambi karai baetam owe, baportaroas. Are, dare Allah bomonnak atakam banamek batai owe baportaroas.

²Karai armat ipit, akarai baetam owe, aatakam ji baekorom, atakam asakamtamum.

³Emesare, tar apaye, wan atakam basakamtii owe apaye, era aemo pak, akot apaye, pota apaye, emes atakam asakamtiitakam, ere dere karao apok. Denom era pak atakam dema basakamtii apok.

⁴Debimak binip ere, dere pota pak baem apok aemo. Me, dere era pak, atakam dema basakamtii bas. Me doemo pak, akot apaye, pota apaye, emes atakam basakamtii Ipit, ere Tuhan are.

⁵Erarawa, tare, owe era aemes pak, akot apaye, pota apaye, emes atakam basakamtii bonak bas. Tuhan andaeto, era pak atakam asakamtiitem. Armat Ipit, owe era jiiti asan tiruu aemes pak, baso aporomtamtem. Are, owe ajak bomon atakam asakamtiies pak baso aokoretamtem. Era bare ere, Allah, oweo aememayes aemaaris pak jipu, atemtemtem.

⁶Ara akoremin atakam ere, deatakam. Anom Apolos atakam. Ara atakam ji aetakam, tare asan akot aemaptemakam. Bonaknak ere, owe atakam akores, “Tare era aeapomes atakam baofe bas.” Emes atakam aesimes. Emesare, tare Apolosatin aemamum pak jipu atawejomtakam, tare ara atakam jane ajiekoromtemakam. Tararawa, wan owe batemtem, wanam wan owe bifane bafeomem, emes baem apok aemtemakam.

⁷“Tare owe akot. Wan owe pota,” emes atakam tao koretaman? Era aemomemmakam pak takes, Allah aotetamen. Tare ere, era pak tamba aemomekem emes tamen aememmakam. Erarawa tamba wama tamen emetemtemmakam?

⁸Me, tare jak amos tamen emedatukuapekem. Pak daytinak emetaetekem. Tanom raja owe tapa aememekem. Me, tare era pak tapa aemekem. Dare tare takan apok. Tare raja emeememekem ere, ere akotnak. Erarawa danom raja owe tare takan baemem are.

⁹Debimak binip ere, Allah, ara aemapom Yesus atakam bakoretam bamirimemom owe, juas apoknak owe, era wan owe bipu ataemomero. Dare, owe dara batatii atakam asakamtiies owe emes tamen are. Dare malaikat oweam, asamot owe takesam, banep bata owe emes tamen are.

¹⁰Dare Kristus karai aetammarom. Erarawa, owe, “Ere janda owe,” emes atakam akoremaroas. Me tabimak binip ere, “Dare Kristus ajamkaimarom. Erarawa dare bimak binip aptam owe.” Emes atakam aesimemakam. Emesare, dare kumiti owe. Tare, ere, fiak owe. Owe bifane dara afeomemmaroas. Owe ere, tara asitimman.

¹¹Waa ajiiream, dare amostoam, bwitoam, aemapmarom. Me dapakaianam pota. Oweam wusup dara atemaroas. Danom tame apok owe.

¹²Danom karai daytu aeemarom. Owe tame atakam atemaroas apaye, dare Allah, asan akot era owe baem, atakam ajanimmarom. Owe ajurusummaroas apaye, dare emes aememmarom.

¹³Owe atakam pota akorommaroas apaye, dare atakam akot era owe akorommarom. Danom potanak owe emes tamen are. Danom waa ajiire, owe era akoromosomemas atet pak emes tamen are.

¹⁴Dere ara atakam tara aeapomtammin ere, damke tara bakam pak apok. Me, ere ataane tara baweom pak. Emesare, tare dejii. Dere tara afaimmin.

¹⁵Tare Kristus bajamkai aememtamman owe, ere tananenak apeno. Me, tarisare tanane apok. Dere, Kristus Yesus Akot Atakam, tara akoretamaarin. Erarawa dere taritipit aememo.

¹⁶Emesare, dere atakam fiak tara ajanimmin. Tare ara aememin pak jipu atawejiomay.

¹⁷Erarawa, dere Timotius tara ataejinaomtamo. Dere Kristus bajamkai armat ipit aememtamo. Are ere, detii. Dere armat ipit afaimmin. Are akot Kristus bambi karai baetam ipit. Armat ipitam Kristus Yesus ajamkaimin atakam, bimak binip tara ajanimomemteman. Ere Yesus basitim bajarisiap owe asan takes, aememtamemin atakam jipu are.

¹⁸Tare wan owe, dere bojinao apok, emes bimak binip atetaramekem. Tare ere, tamba aemetemtemekem.

¹⁹Me, Tuhan akot aporto, dere tare fef ajinaomemtemin. Dere ere, era amba baemetemtem owe, aatakam jane taka bajie apok aemtemin. Denom era owe Allah fiak pak aemomes apaye aportemin.

²⁰Emesare, Allah owe aemepto, era owe Allah fiak pak aemomemmas. Are bambi bwea atakam taka apok.

²¹Tare ere, wama akot pak emmakam? Ajinaomemtey ere, tare dere wusup pak batoomjinao akot apaye? Tare dere bafaim jak aptamam, jak jiraoam, tara bajinaomem akot apaye?