Read Casuarina Coast Asmat 1 KORINTUS 6 Bible Online

1 KORINTUS 6 - Casuarina Coast Asmat bible

1 KORINTUS 6

¹Tare wan owe, wan Yesus bajamkai owe atakam ajamkoramtakam, tare Yesus bajamkai apok pota pak baoorpor owe, era pota pak atakam basakamtii ajanimtakam apaye? Tare, turunak owe, era pota pak atakam basakamtii bajanim apok apaye?

²Asep bare ere, era turunak owe, ara aemansa tapirmi owe apota pak, atakam asakamtiitemas. Emes tamsam apok apaye? Emesare, tare ara aemansa tapirmi owe apota pak atakam basakamtii owe erare. Erarawa tare ara ajamkorammakam atakam koser, atakam baemesakamtii asan apok apaye?

³Emesare, danom malaikat owe apota pak, atakam asakamtiitemarom. Emes tamsam apok apaye? Erarawa, dare ara aemapom asamot owe bambi bajamkoram atakam pak, atakam basakamtii asan arare.

⁴Tare era bambi atakam ajamkoramtakam apaye, tare Yesus bajamkai apok owe, era atakam basakamtii bajanim ape?

⁵Ara akoremin atakam, damke tara bakamapom pak. Me tarmamon, ajoo owe pota pak atakam basakamtii bimak binip baso ipit takakopeam apok apaye?

⁶Me, tare Yesus bajamkai owe tarmamon atakam ajamkoramemakam are. Tanom, Yesus bamesem apok owe, era atakam basakamtii, atakam ajanimemakam are.

⁷Me tarmamon atakam ajamkoramemakam ere, era pak tare Yesus bajamkai fiak apok baporomtam pak. Owe, pota pak tara aemtan apaye, bambi baemap, ere akot. Owe tapak wosom aetaetas apaye, bambi baemap, ere akot. Tarmamon atakam bajamkoram, ere pota.

⁸Me, tarmamon pota pak ajamemamemakam. Tare, tajoo owe apak wosom aetaeremakam.

⁹Emesare, era jaos owe, Allah aobaomep owe baemeemem asan apok. Tare emes tamsam apok apaye? Tanom emes bimak binip jiiti bas! Era asan pota oweam, era eto basitim oweam, era tani tamane bajamdamat oweam, era feper oweam,

¹⁰era wosom oweam, era pak basenomem oweam, era bir bwi banda jaytu oweam, era tame atakam atemas oweam, era pak tasa bae oweam, Allah aobaomep owe baemeemem asan apok.

¹¹Tare wan owe, ere emes owe aememekem. Tuhan ere, tadosa akokomosomtamen. Armat Ipitam tare turunak owe aemapomen. Me Tuhan Yesus Kristusam, daAllah anama aJip, tare turunak owe, emes atakam asakamtiies.

¹²Dere ara pakiin pakiin takes baem, ere karao apok. Me, wan pak baem, asan akot pak apok. Dere era pakiin pakiin takes baem karao apok. Me, dere era pak baem bimak binip daytu batetaram apok.

¹³Owe atakam akoremas, “Amos ere, jak bapitimapom pak. Jakam, amos bapitimapom asan.” Emes atakam aesimemas. Allah ere, era jamnuk takes danais aemtiitem. Me dadamo ere, tani tamane bajamdamat pak apok. Me dadamo ere, Tuhan adamo. Me Tuhanam, dadamo pak.

¹⁴Allah, ere fiak. Erarawa Are Tuhan ajaoromwasumtume. Are dare ajaoromwasumtumtemaro.

¹⁵Tamsam apok apaye? Me tadamo poreemema ajiekem, ere Kristus adamo anakot poman pak emes tamen are. Emesare, dere Kristus adamo anakot poman pak, fekore taot adamo, bajamkaimapom ape? Emes bas.

¹⁶Era fekore taot ajamkaito ipit, era taotatin damo taka aememmamis. Emes tamsam apok apaye? Emesare, Alkitabam: “Era owe jamnuk, damo dasa taka aememtemas.” Emes atakam akorem.

¹⁷Emesare, Tuhan ajamkaimas owe, Tuhanajie bimak binip taka aemomemas.

¹⁸Emesare, tare era tani tamane bajamdamat ombare aesosaaray. Owe wan dosa takes aemtas, are wan owe ajurusumemas. Me, tani tamane bajamdamat owe, adamo ajurusumemas.

¹⁹Emes pak tamsam apok apaye? Me tadamo, ere Allah Jip Tame. Allah aJip tara atetamteteren. Tare tapa pak apok.

²⁰Allah, tare harga daytu pak ajititen. Emesare tare tadamo takes, Allah tare baeom damo aememaaray.