Read Casuarina Coast Asmat 1 KORINTUS 8 Bible Online

1 KORINTUS 8 - Casuarina Coast Asmat bible

1 KORINTUS 8

¹Emesare, owe, dasa eto atetamtas, are eto asitimemas. Tanom, “Dare takes damsam,” emes atakam aesimekem. Emesare, ere atakamnak. Me, era amsam owe, amba aemetemtememas. Me, owe afaimemas owe ere, owe asan akot aememas.

²Owe bimak binip atetaramtas, “Emesare, demsam,” emes atakam aesimtas, are era akot pak amsamnak apok.

³Allah ere, Ara afaimemas owe amsam.

⁴Dare, owe era eto basitim atetames dasa banda atakam akoremarom. Eto takes, ere anakot pak apok. Danom emes damsam. Allaham, ere takakope. Danom emes damsam.

⁵Asamot owe, ara aemansa tapirmi pakam, era wonamo oup pakam, “juein owe,” emes juas aememas. Atakamnak, era juein owe tamen, ere tanane aemapes. Wanam owe baomep fiak bii tanane aemapes.

⁶Me daAllah ere, Allah takakor. Armat Ipit Daritipit. Anom era pakiin pakiin takes akenemapome Allah arare. Danom aowe. Me Tuhan Yesus Kristusam, ere takakor. Armat Ipitam era pakiin pakiin akenemapome. Anom jeses atetammaro.

⁷Wan owe ere, emes amsam apok. Bonaknak ere, wan owe, era eto ajamkaiaara ajaies. Erarawa, waa ajiiream, dasa andetas, are era dasa eto basitim batetam dasa, emes bimak binip atetaramemas. Era owe ere, era pak amsamnak apok. Erarawa abimak binip ere, “Ara dasa banda, ere dosa pak,” emes atakam aesimemas.

⁸Pak banda apaye, pak banda apok apaye, ere awar. Ere dare Allah bajamkai fiak baemapom pak apok. Dare pak banda apok apaye, ere dare asan pota baemapom pak apok. Danom pak banda apaye, ere dare asan akot baemapom pak apok.

⁹Emesare, tanom era pak akot aportakam jipu aemay. Me, tanom turuar! Me akot aportakam pak, Yesus bajamkai fiak apok owe, Yesus bajamkaikorom bandaebumtii bas.

¹⁰Me wan owe abimak binip ere, “Ara dasa banda, dosa,” emes bimak binip atetaramemas. Tare ere, tamsam owe. Era owe ere, tare pak, era eto tame bomon baapenda aportan, “Emesare, denom era dasa banda,” emes atakam asakamtiitetertemas apeno.

¹¹Erarawa, era tamsam owe, era amsamnak apok owe, asan pota aemapomtemakam. Kristus ere, era owe dambir atetemtame.

¹²Erarawa, tare era amsamnak apok owe ajurusumtemakam. Tanom dosa era owe aemtemakam. Emesare, tanom dosa Kristus aemtemakam.

¹³Dere pak andetey, wanam era pak dejoo owe Yesus bajamkaikorom bandaebumtii aportey, ere, dere dasa bonda apoknak aemtemin. Dere dejoo owe Yesus bajamkaikorom, bandaebumtii-ombar.