Read Casuarina Coast Asmat 1 KORINTUS 9 Bible Online

1 KORINTUS 9 - Casuarina Coast Asmat bible

1 KORINTUS 9

¹Emesare, asamot owe atakam dera basakamtam apok. Denom Yesus atakam bakoretam bamirimemom ipit. Denom daTuhan Yesus bi aporo. Dere Tuhan karai aeetamo. Erarawa tare Armat Ipit ajamkaiekem.

²Wan owe, “Paulus, Yesus atakam bakoretam bamirimemom ipit bas,” emes atakam aesimemas apeno. Me, tare dere Yesus atakam bakoretam bamirimemom ipit aporekem. Tare Kristus ajamkaimakam. Erarawa oweam Tuhan dere Yesus atakam bakoretam ambirimemomen apormas.

³Owe dere atakam pota akorommanis apaye, dere emes atep ajitmin:

⁴Dare owe Yesus bajamkai aememtamom. Dararawa, era owe aamosam, bwiam, bambi baemetaen asan apok apaye?

⁵Me wan Yesus atakam bakoretam bamirimemom oweam, Tuhan areotaisam, Kefasam, ere Kristen tapes ataetteteres. Era samaniin samaniin aesosmas, are era tapes atomasemas. Danom emes baemeem asan apok apaye?

⁶Me Barnabasatin daamos bajitin karai aemamum. Me wan owe ere, emes apok. Dare ere, era wan owe emes tamen baemeem asan apok apaye?

⁷Owe, tentara karai afitas, are apa amos ajitinemas apaye? Era pak taso bajapom owe, era eek banda apok aememas apaye? Domba banamek batai owe, era domba ao banda apok aememas apaye?

⁸Era akoremin atakam ere, asamot atakam jipu taka apok. Allah Basakamtam Atakamam emes atakam are.

⁹Allah Musa atetame basakamtam Atakamam: “Era gandum eek atataramdaememar sapi, era okone banam bajikapom bas.” Emes atakam aeapoma. Allah ere, sapinak atakam kore?

¹⁰Are daatakam akore apaye? Emesare, Are daatakam akore. Era kebun tapirmi bandanaesum owe, akene eek bandetas. Era eek bakokomtaatam oweam, era wan eek bandetas.

¹¹Emesare, dare Yesus bajamkai tara aememtamom. Erarawa tare pak biti dara bajie pota ape?

¹²Tare pak wan atakam tara baememtam owe, biti ajimakam. Tanom emes dara baem, emes dapaknak. Dare ere, tare pak biti bajie atakam bajanim apok aemaarum. Danom asan pota aemapaarum. Dare ere, emes aemapaarum. Dare, tare Kristus Akot Atakam bajamkaikorom bandaebumtii-ombar.

¹³Emesare, Allah Tame bomon karai owe, era tame pak andeemas. Era tame bomon joo pak bajaatam karai oweam, era wan pak andeemas. Tare emes tamsam apok ape?

¹⁴Emesamare, Tuhan basakamtam atakamam: “Owe Allah Akot Atakam akoretamtas, era jane ajitas owe, pak ara batetamtas.” Emes atakam aeapome.

¹⁵Dere ere, tapak bataer apok aemaaru. Ara suratam aeapommin, dere tapak atakam bajanim apok. Dere Allah Akot Atakam tare bambi bakoretam bakari, ere pota. Dere ere, dambir batem akot.

¹⁶Dere Allah Akot Atakam akoretammin. Tuhanam dere emes baem atakam asakamtamen. Erarawa dere dema baemetemtem asan apok. Dere Allah Akot Atakam bakoretam apok aemtey, dere asan pota aemaptemin.

¹⁷Dere Allah Akot Atakam bakoretam ipit baemem bimak binip dema atetaramo ere, emes pak bataer depak. Dere ere, Allah Akot Atakam bakoretam ipit baemem, bimak binip dema batetaram apok. Tuhan era pak baem ataemen.

¹⁸Erarawa, dere wama pak taettey? Emesare, dere Allah Akot Atakam bambi akoretamtemin. Era atakam jane ajimas owe pak bataer, ere depak. Me, dere era apok bataer apok. Dere aapak bataer apok. Anakot pak ere ataettemin.

¹⁹Emesare, asamot owe atakam dera basakamtam apok. Dere owe bambi karai baetam ipit apok. Me, dere owe takes bambi karai baetam ipit dema aememo. Ere, dere owe tanane Kristus bajamkai batatapimtaa pak.

²⁰Denom Musa aeapome Basakamtam Atakam bomon baemap apok. Me, dere Yahudi owe takan aememtey, dere Yahudi ipit tamen aemememin. Ere, dere era Yahudi owe Kristus bajamkai batatapimtaa pak.

²¹Wanam, dere Musa aeapome Basakamtam Atakam apok owe takan aememtey, denom Musa Basakamtam Atakam apok ipit tamen aemememin. Ere Musa Basakamtam Atakam aptam apok owe, Kristus bajamkai batatapimtaa pak. Dere ere, Kristus basakamtam atakam ji aeemin. Erarawa, dere Allah basakamtam atakamam baoo apok.

²²Denom Kristus bajamkai fiak apok owe takan aememtey, denom bajamkai fiak apok ipit tamen aemememin. Ere ara bajamkai fiak apok owe, bajamkaikorom batatapimtaa pak. Dere owe takes aemememas pak tamen aemememin. Ere, dere wan owe bajortaer pak.

²³Era aememin pak ere, era owe tanane Allah Akot Atakam bajamkai pak. Derarawa, era Allah Akot Atakam bajamkai owe, asan akot takan aemtemin.

²⁴Era ju putet bajamampor owe, ja takes ateemas. Me, jipit takakope pak ataetem. Tare emes tamsam. Emesare tanom ja faaroa. Erarawa tare era pak ataettakam emes tamen are.

²⁵Era ja putet bajamampor owe, jiine apok kuus bajamapom akot pak bataet, ja ajamamporemas. Me, are ja faaro baememkorom, jak fiak aemememas. Dare ere, jiine kuus bajamapom akotnak pak bataet, ja putet bajamampor emes tamen are.

²⁶Emesare, dere era ja bamaretukem asanpu, ja turu ateemin. Denom ban fon atee aetey, dere atee tamen apok.

²⁷Denom ban fon dedamo dema aememin. Ere dedamoam, dejakam, fiak baemapom pak. Era pak baem, dere Allah Akot Atakam owe bakoretam, wanam dere era atakam bajamkaikorom apok-ombar pak arare.