Read Casuarina Coast Asmat 2 KORINTUS 13 Bible Online

2 KORINTUS 13 - Casuarina Coast Asmat bible

2 KORINTUS 13

¹Dere tatapirmi jaki bare jamnuk etejito. Derarawa, tara aojinaomemtemin. Emesare, Alkitabam, “Owe jamnuk apaye, bamintep apaye, ateman, ‘Era ipit emes pota pak aeme,’ emes atakam aesimtetertas, ere, era ateman atakam eemnak aporay.” Alkitab emes atakam aeapoma.

²Dere asep tara ajinaomo, dere ara atakam tara akoromo. Denom waa tara bajinaomem apok ere, denom era atakam taka aokoremin: Dere tara ajinaomemtey, dere tare bonak dosa aemekem oweam, tare wan owe takesam, soro bajiomem apok aemtemin.

³Emes aemtey, era akoremin atakam, Kristus aatakam emes aportemakam. Me Kristus, kumiti ipit apok. Armat Ipit ere, tadamopu fiak ipit aememmar.

⁴Owe, Armat Ipit salib wus oup atatopomes, Are kumiti ipit tamen aememe. Me, Allah ere fiaknak. Erarawa Allah Armat Ipit ajaoromwasumtume. Emesare, danom Armat Ipit tamen kumiti aememmarom. Me, Allah afiak pak atetammaro. Erarawa dare Armat Ipit takan jatiaptam aememom are. Era pak asan akot tara baem are.

⁵Emesare, tare Kristus Yesus eemnak bamesemkorom apaye, apok apaye, tamba aemporteteray. Me tajak bomon tamba aoorporteteray. Me Armat Ipit tajak bomon aemapman, emes tamsam apok apaye? Armat Ipit tajak bomon baemap apok apaye, ere tare jak baoorpor fiak apok owe erare.

⁶Tare, dare jak baoorpok fiak owe apormakam apaye, ere akotnak.

⁷Danom atakam Allah ajanimmarom ere, tare pota pak baem-ombar. Era aemmarom ere, dare jak baoorpor fiak owe, emes baporomtam pak apok. Ere tare akot baem are. Emesanare, owe, dare jak baoorpor fiak apok owe, emes bimak binip atetaramemas, ere karao apok.

⁸Dare ere, Allah atakamnak baemeoo asan apok. Dare era atakam ji aeemmarom taka are.

⁹Tare fiak aememtakam, wanam dare kumiti aememtam, ere dare jak akotnak. Tare turunak owe aememtakam, ere dare jak akotnak. Dare emes pak atakam Allah ajanimtamemarom.

¹⁰Tuhan, dere atakam abajamkai owe basakamtam, emes fiak pak atetamen. Era pak era owe bajamkai fiak baemapom are. Ere era owe bajamkai sursure baemapom pak apok. Tuhan ere, fiak pak atetamen. Erarawa, denom atakam fiaknak akoretemin. Me, dere tare takan aemaptam, dere atakam fiaknak tara bakorom pota. Erarawa, dere tare takan baemap apok aemmin, dere ara surat tara atetammin.

¹¹Dejoo owe akotnak! Tanom jak akot aememay. Turunak owe aememporay. Era akoremin atakam jane pajiay. Atakam awara. Owe ajamkipimamay. Emes aemtakam, Allah tare takan aemteman. Emesare, Armat Ipit owe bafaimnak Ipit. Are ji baem jak batetam Ipit.

¹²Tanom tarmamon batir ajamjipiramay. Emesare, era turunak owe takes selamat atakam tara akoromman.

¹³Yesus Kristus daTuhan, tare takes asan akot baemaartan. Allaham tare takes bafaimaartan. Allah Jipam tajoo owe takes takan baememaartan.