Read Casuarina Coast Asmat 2 KORINTUS 4 Bible Online

2 KORINTUS 4 - Casuarina Coast Asmat bible

2 KORINTUS 4

¹Emesare, Allah soro ajiomero. Ararawa, akarai baetam ataemero. Erarawa dare jak sake apok.

²Me wan tiruu pak, ere damke pak. Danom era pak awotapemom. Danom potet batutum apok. Danom Allah atakam akoretammarom, pote atakam apok. Dare ere, era atakamnak baso akoremarom. Erarawa, dare, owe takes dare owe turu apaye, owe jaos apaye, emes baoorpor aememmarom. Erarawa Allah era aemmarom pak takes amsam.

³Wan owe, ere, akoretammarom Allah Akot Atakam Bimak binip batomomem apok. Era owe ere, danais baemtii owe.

⁴Ara aemansa tapirmi juein owe, Kristus bamesem apok owe, bimak binip jiiti aemapome. Era owe, Allah Akot Atakam, jane bajie-ombae. Era Akot Atakam, ere Kristus akotipitnak pak atakam are. Me Kristus, Allah bi awarnak.

⁵Danom daoememom atakam bakoretam apok. Era akoretam atakam ere, “Yesus Kristus, ere Tuhan. Danom takarai baetam owe. Yesus emes akot pak aema.” Emes atakam aesimmarom.

⁶Emesare, Allah atakam akore, “Era jiiti asan, sare basaramto.” Emes atakam aesimen. Me Allah takaam, asare, dajak bomon asaramtamero. Ere dere Allah akotipitnak pak baporkorom are. Me Kristus bi, ere Allah akotipitnak pak aporomum.

⁷Dare era akotnak pak ere dadamo bomon aemompom. Me dadamo ere, akot apok. Are sekumkum pak tamen are. Me, owe emes aportas, are era fiaknak pak dapak apok aporemas. Ere Allah pak aporemas.

⁸Owe dara bajurusumkorom aemememas. Me, are dara bakumimosom apok. Dare bimak binip arke atetaramemarom. Dare ere, jak sake apok.

⁹Owe dara ajurusumemaroas. Allah ere, beken dara bajios apok. Owe dare bap andaebumtiiemaroas. Dare ere, dambir apok.

¹⁰Owe Yesus atatiies, oweam dara batatii atakam akoreaaremas. Erarawa, owe, Yesus ajaorwasite fiak pak, dadamo bomon aemompom apormas.

¹¹Dare jatiaptam ara aememmarom. Dare Yesus karai aeetammarom. Erarawa juiin afaafemar, owe dara batatii atakam akoremas. Erarawa, owe, Yesus jiine pak, dadambir aptam damo bomon aemmpom apormas.

¹²Emesare, dambir jati daytu aeomaro. Me, era pak ere, jiinenak jati daytu tara aeoman.

¹³Me Alkitabam, “Dere Allah jiirey aeeo. Erarawa dere atakam akoreo.” Emes atakam aeapoma. Danom Allah jiirey baee jak are. Emesare, dare Allah jiirey aeemarom. Erarawa atakam akoremarom.

¹⁴Allah, Tuhan Yesus ajaoromwasumtume. Are dare Yesus takan ajaoromwasumtumtemaro. Are daraye taraye Armat Ipit bipu ataemomtemaro. Dare emes apormarom.

¹⁵Era ajirisemmarom pak, ere asan akot tara batetam are. Me Allah asan akot baem owe betema betema ajitas, are terima kasih atakam Allah bakorom betema ajitemas. Era pak Allah eemnak bamesemkorom are.

¹⁶Emesare, dare jak sake apok. Me dadamo, ere kumiti akumiaaremarom. Me, juiin afaafemar, Allah dajak bomon pak, fiak akakaimapomemaro.

¹⁷Dare ajirisememarom. Erarawa asep bare dare jak akotnak pak atoomattemarom. Era ajiresememarom pak, ere akaritem. Me era jak akotak pak ere, jiinenak aememaartem. Era ajirisememarom pak, ere kope. Era jak akotnak pak ere, daytinak. Erarawa are awar apok.

¹⁸Dare ara aemansa tapirmi baso pak, banamek bapeomep apok. Dare ere, baso apok pak banamek apeomepkorommarom. Me baso pak, ere ajaniostemas. Me baso apok pak ere, emes aememaartemas. Dare emes apormarom.