Read Casuarina Coast Asmat 2 KORINTUS 8 Bible Online

2 KORINTUS 8 - Casuarina Coast Asmat bible

2 KORINTUS 8

¹Dejoo owe akotnak! Allah, asan akot, era Makedonia tapirmi samaniin samaniin Yesus basitim bajarisiap owe aeme. Dare tare emes atakam jane bajie akot ajimarom.

²Era owe, daytinak ajirisemes. Era pak ere, era owe Yesus bajamkai fiak ape baporomtam are. Era oweam pak janderes aemompes. Me, are jak akotnak aemapes. Erarawa are pak daytu owe sai asaietames.

³Emesare, are pak daytu era owe atetames. Are apak janderes aoemompes. Ararawa, wan pakam era owe aotetames. Era pak aemes ere, apa bimak binip jipu. Danom banamek dema aporo.

⁴Are owe takan, uang, era Yudea tapirmi turu owe batetam, atakam fiak ajanimeroes.

⁵Danom bimak binip atetaramom, “Era Makedonia owe, uang atetamtemas. Are wan pak baem apok aemtemas,” Emes atakam aesimom. Me, are uang taka batetam apok. Are Tuhan atakam ji baekorom, atakam asakamtiiteteres. Anom daatakam ji baekorom atakam asakamtiiteteres. Ere Allah akot apormar pak jipu.

⁶Dare emes aporom ere, dare Titus ataane aweom. “Wore era Korintus owe, pak, asan pota aemapmas owe batetam, aememtamem. Emesare, are era akot pak baem, aemapomkoromey.” Emes atakam aesimom.

⁷Emesare, era aemmakam pak takes, akotnak. Tare Kristus eemnak ambesemkorommakam. Tanom atakam akot akorekorommakam. Tanom tamsamnak. Tanom owe asan akot baem, jak aseseromemkorommakam. Tanom dara afaimkorommaroakam. Emesare, tanom pak daytu era asan pota aemapmas owe atetamkoromay.

⁸Dere atakam tara basakamtam apok. Dere ere, era wan owe era akot pak baem jak aseseromemas pak, atakam tara akoretammin. Tare bafaimnak baemomem apaye bapor aemin.

⁹Me Yesus Kristus daTuhan, asan akot, owe aeme. Tanom emes tamsam. Armat Ipit pak anakot daytu aoemome. Me, Are pak apok ipit aememe. Era asan akot tara baem are. Ere pak anakot daytu tara batetam are.

¹⁰Debimak binip ere, tare era bonak tahun aetaerekem pak, baemkorom akot. Ere tare asan akot baemap are. Tare era uang ajarisimapomekem, ere bonak. Tanom era pak baem jak aseseromekem, ere bonak. Me wan owe ere, asep aemes.

¹¹Emesare, era pak aemkoromay. Tare era pak atakam basakamtii, jak aseseromekem. Tanom era pak baemkorom, emes jak aseseremomay. Tanom era aemompekem uang jipu era owe atetamay.

¹²Tare pak batetam jak aseserommakam apaye, Allah era atetamtakam pak akot aporem. Armat Ipit, tare era aemompekem pak jipu, owe batetam, akot ajie. Are era, era pak apoknak owe, pak owe batetam, atakam apok.

¹³Tare pak owe batetam ere, era owe asan akot baemap, wanam tare asan pota baemap— dere emes bimak binip apok. Tare pak owe atetamtakam, tanom, era oweam, pak awar emes aemomeptemakam.

¹⁴Emesare, waa tare pak daytu aemompekem. Tararawa, pak era asan pota owe batetam, ere akot. Asep barerawa, tare asan pota aemaptakam apaye, wanam era owe pak daytu aemomemtas apaye, are pak tara atetamteman. Ere, tanom, era oweam, pak awar emes aemomeptemakam.

¹⁵Alkitabam emes atakam are: “Era banda pak daytu ajarisimes owe, wan pak baemetaetii asan apok. Era banda pak koser ajarisimes oweam, amosto apok.” Emes atakam akorem.

¹⁶Dare asan akot tara baem jak aseseromemarom. Allaham, emes asan akot tara baem jak, Titus atetame. Erarawa dare terima kasih atakam Allah akorommarom.

¹⁷Emesare, Titus era ajanimom atakam, jane akot ajie. Armat Ipitam asan akot tara baem, jak aseseromkorome. Erarawa are tara bajinaomem atakam amba asakamtiie.

¹⁸Danom dajoo ipit taka Titus takan ataemommarom. Era dajoo ipitam, Allah Akot Atakam daytinak akoreaarir. Erarawa era samaniin samaniin Yesus basitim bajarisiap owe, era ipit asitimmas.

¹⁹Me, era taka apok. Yesus basitim bajarisiap owe era ipit ataemomes. Are armat ipit, era uang, dere takan batoomjir, emes ataemomes. Era uang atoomjirtam, ere Tuhan basitim are. Emesare, danom owe pi bajat, emes jak aseseromemtemarom. Danom era uang atoomjirtam, owe emes aportemas.

²⁰Danom ara uang daytinak batoomjir, turunak aemmarom. Owe, atakam dara bakore-ombar.

²¹Dare Tuhan akot apormar pak baem, bimak binip atetarammarom. Danom era asamot owe akot apormas pak, bimak binip atetarammarom.

²²Emesare, danom wan dajoo ipit, era owe takan taasan ataejinaomtemarom. Danom armat ipit bare tanane aoorporom. Are pi tara bajat, jak baseseromemaar ipit aporom. Waa ere, armat ipit ta jiirey daytinak aeeman. Erarawa are pi tara bajat, jak aseseromemkoromum.

²³Me Titus, ere dejoo ipit. Armat ipit asan akot tara baem, dere takan aemum. Me wan dajoo owe ere Titus takan aesosmas. Me Yesus basitim bajarisiap oweam, era owe ataemommas. Era owe, Kristus akotnak, emes aporomtamemas.

²⁴Tanom era owe afaimkoromay. Era samaniin samaniin Yesus basitim bajarisiap owe era pak baportas. Bonak ere, dare atakam, “Era Korintus owe, ere akotnak,” emes atakam aesimom. Emesare, era owe, ara atakam, atakamnak baportas.