Read Casuarina Coast Asmat GALATIA 1 Bible Online

GALATIA 1 - Casuarina Coast Asmat bible

GALATIA 1

¹Dere Paulus. Owe dere Yesus atakam bakoretam bamirimemom ipit ataemomenis. Era ataemomenis owe ere, asamot owe apok. Yesus Kristusam, Daritipit Allaham, dere Yesus atakam bakoretam bamirimemom ipit ataemomenis. Emesare, Allah ere, Yesus Kristus ajaoromwasumtume Ipit are.

²Denom, dere takan aememmarom dajoo owe takesam, are selamat atakam tare Galatia tapirmi samaniin samaniin Yesus basitim bajarisiap owe, akorommarom.

³Daritipit Allaham, Tuhan Yesus Kristusam, asan akot tara boemtan. Are ji baem jak tara batetamtan.

⁴Me Kristusam Daritipit Allah atakam ji aee. Erarawa Are dadosa bimak binip bajanimemtam dambir atemtamero. Are waa aemapmarom tapirmi asan pota pak, dara bajortaer emes dambir atemtamero.

⁵Owe Armat Ipit tere baeomaartas. Are atakam, ere atakamnak.

⁶Me Kristus aeme pak, owe asan akot baem pak. Allah, tare asan akot baemomem, tara ajaten. Tare ere, tara ajaten Ipit fefnak ambompimmakam. Wanam tare wan “akot atakam” jane ajimakam. (Me wan “akot atakam” ere, atakamnak apok.) Dere era aemmakam pak apormin, wanam jinim daytu aemin.

⁷Wan “akot atakam” ere, apoknak. (Era akorommarom atakam taka, Kristus Akot Atakam anakot.) Me, wan owe tara ajurusumman. Era owe, Kristus Akot Atakam, dasman atakam bapipikimtaa, akot ajimas.

⁸Dere apaye, Surga oup malaikatkor apaye, wan “akot atakam” tara akoromtan, erarawa era owe era jisimak asan bajiaptas! Owe, era akoretamom Akot Atakam, era taka bakoretas.

⁹Bonak ere, dare emes atakam akoromom. Denom waa emes atakam tara akorommin: Owe, wan “akot atakam” tara akoretamtas, era owe, era jisimak asan bajiaptas. Owe era ji aeekem Akot Atakam, era taka bakoretamtas.

¹⁰Denom wama tamenem? Dere asamot owe dera bafaim jak aseserommin apaye? Dere Allah dera bafaim jak aseserommin apaye? Dere asamot owe jak akot baemapompor aemmin apaye? Dere ere, waa aemansaram, asamot owe jak akot baemapompor aemaaru ere, dere Kristus abambi karai baetam ipit baemem apok.

¹¹Dejoo owe akotnak! Deatakam jane pajiay. Era akoretamtey Akot Atakam, asamot ipit amba bataetaer atakam apok.

¹²Asamot owe era atakam dera baememtam apok. Anom asamot owe dera baesimtam apok. Me, Yesus Kristus, era atakam dera aoporomen.

¹³Tare, dere Yahudi agama ajamkaiaaru pak, jane etejiekem. Dere era Yesus basitim bajarisiap owe, daytinak ajurusumaaru. Era owe ere, Allah aowe. Denom era owe bajanimosompor aemaaru.

¹⁴Dere Yahudi agama fiaknak ajamkaiaaru. Denom derfaisomar pak tai aemaaris pak, fiaknak ajamkaiaaru. Deumur takan aememes owe ere, era pak fiak apok emes ajamkaiaaris.

¹⁵Bonak ere, Allah, asan akot aemen. Dere dersoot jak bomon aemanso ere, dere Armat Ipit aeremtaeren. Are dere abambi karai baetam ipit baemem ajaten.

¹⁶Armat Ipitam, Andep dera baporomtam, emes atakam asakamtiie. Ere, dere Andep Akot Atakam, era Yahudi apok owe bakoretam atakam are. Are Andep dera aporomtamen ere, dere asamot owe. “Dere wama pak emtey?” emes bajatepor apok.

¹⁷Era Yerusalem Yesus atakam bakoretam bamirimemom owe, emes owe bonak aememes. Derarawa, Yesus atakam bakoretam bamirimemom ipit asep aememo. Dere ere, era owepu bonak apok. Dere Arab tapirmi akan ajakoso. Wanam kota Damsik aofasio.

¹⁸Dere tahun bamintep aememo. Tahun bamintep aememorawa, dere Kefas (Petrus) bi bapor aememo. Erarawa dere Yerusalem aememo. Denom Kefas (Petrus) atame ise 15 aemapo.

¹⁹Denom Tuhan areot juas Yakobus bi aporo. Me, dere wan Yesus atakam bakoretam bamirimemom owe bi bapor apoknak.

²⁰Ara surat aeapommin atakam, atakamnak. Emesare, Allah banamek ataiapa.

²¹Emesare, dere Siria tapirmiam, Kilikia tapirmiam, aesoso.

²²Era Yudea tapirmi samaniin samaniin Yesus basitim bajarisiap owe ere, debi bapor apoknak aemaaris.

²³Era owe atakamiin jane ajies. “Era ajurusumero ipit, Yesus bamesem atakam akoretamum. Bonak ere, are Yesus eemnak bamesemkorom owe bajanimosompor aeme.” Emes atakam jane ajies.

²⁴Ararawa, era aemo pak apores, wanam tere Allah aeomes.