Read Casuarina Coast Asmat GALATIA 3 Bible Online

GALATIA 3 - Casuarina Coast Asmat bible

GALATIA 3

¹Aemapakam Galatia owee! Tare janda owe aemapmakam. Ere potet tara atutumen owe tanam? Tare Yesus Kristus era salib wus oup dambir ateme atakam, jane basonak etejiekem.

²Tare ere, ara atakam kope taka bakoretamtan. Tare era Musa Basakamtam Atakam Buku atakam ji aeekem, wanam Allah Jip tajak bomon ajiiapteteren, emes ape? Tare Yesus Akot Atakam eemnak ambesemkoromekem, wanam Allah Jip tajak bomon ajiiapteteren, emes ape?

³Tare janda daytinak wama tamenem? Tare Yesus Kristus ajamkaiekem, Allah Jip tare ai jak atetamteteren. Me, tare waa owe turunak tamba baemeemkorom, emes ape?

⁴Era daytinak ajirisemekem pak, bambi pak ape? Ere bambi pak bas.

⁵Allah aJip atetamman. Anom jinim bae pak daytu aemtamman. Tare Musa Basakamtam Atakam Buku atakam ji aeekem, wanam Allah era pak tara aemen, emes ape? Tare Yesus Akot Atakam eemnak ambesemkoromekem, wanam Allah era pak aemen, emes ape?

⁶Ere Alkitabam: “Abraham Allah eemnak ambesemkoromen. Erarawa Allah, armat ipit, turunak ipit, emes atakam asakamtiien.” Emes atakam aeapoma.

⁷Emesare, Allah eemnak ambesemkorommas owe, Abraham arurupisnak. Tanom emes baporkoromay.

⁸Alkitab wan atakamam, Allah, Abraham akorome atakam are: “Wore eemnak ambesemkoromman. Emesare, wan saman tananeam eemnak wo tamen ambesemkoromtemanis. Denom asan akot era owe takes aemtemin.” Emes atakam aeapomen. Abraham emes atakam jane ajie ere, are Allah Akot Atakam jane bonak atotakamjien. Emesare, Allah era atakam akorome ere, Are era aemto pak atakam bonak akoromen. Era aemto pak ere, Yahudi apok owe Armat Ipit eemnak ambesemkoromtas, Are era owe, turunak owe, emes atakam asakamtiitem.

⁹Emesare, Abraham, Allah eemnak ambesemkoromen. Erarawa Allah asan akot Armat Ipit aemen. Allah ere, eemnak Ara ambesemkorommas owe takesam, asan akot, Abraham tamen aememe.

¹⁰Alkitabam, “Owe Musa Basakamtam Atakam Buku aeapomes. Allah, Musa Basakamtam Atakam Buku atakam takes ji baekorom apok owe, ajurusumtem.” Emes atakam aesimum. Wan owe ere, “Dere Musa Basakamtam Atakam Buku atakam ji aetey, Allah dera ajortaerteman,” emes bimak binip atetaramemas. Allah ere, era owe ajurusumtem.

¹¹Alkitabam, “Allah, eemnak Ara ambesemkorommas owe, turunak owe, emes atakam asakamtiim. Erarawa era owe jiine aememaartemas.” Emes atakam aeapoma. Dararawa, Allah, era Musa Basakamtam Atakam Buku atakam ji bae owe, turunak owe, emes atakam basakamtii apok, ere atakam basonak apormarom.

¹²Era Musa Basakamtam Atakam Buku atakam, “Owe Musa Basakamtam Atakam takes ji aekoromtas, are jiine aememaartemas,” emes atakam aeapoma. Emesare, Musa Basakamtam Atakam Buku apa atakam. Allah eemnak bamesemkoromam apas.

¹³Allah, Musa Basakamtam Atakam Buku atakam ji baekorom apok owe ajurusumtem. Kristus ere, jow auuemero. Allah dara bajurusum-ombar. Allahrawa, Armat Ipit ajurusume. Erarawa Kristus, Allah ajurusumtaro pak, asurumtamero. Ere Alkitab atakam jipu: “Allah, era wus oup ataetopomtas owe, ajurusumapomtem.” Ere Alkitab emes atakam aeapoma.

¹⁴Bonak ere, Allah, Abraham asan akot aemen. Kristus, era Yahudi apok oweam, emes asan akot boem, akot ajie. Erarawa Are salib wus oup ajiriseme. Me Armat Ipit eemnak bamesemkorom owe, era asan akot aemomemtemas. Allaham aJip era owe batetam ataaji aee. Era oweam Allah Jip ataettemas. Emesare, Kristus emes pak baemtam akot ajie. Erarawa Are Allah ajurusumtaro pak asurumtamero.

¹⁵Dejoo owe akotnak! Asamot Ipit amnuk atakam ajamsakamamtiitamis, are era atakam baemejanimtii asan apok. Are apa atakam, era atakam baemejamkaim asan apok. Dare emes aememarom.

¹⁶Emesare, Allaham emes are. Alkitabam: “Allah, ataaji, Abrahamam, arurupis oorey ipit, aee.” Alkitab emes atakam aeapoma. Era “arurupis owe,” emes atakam apok. “Arurupis owe,” ere owe tanane. Me, ere “arurupis ipit” atakam are. “Arurupis ipit,” ere jipit takakope. Era ipit Kristus are.

¹⁷Ara atakam akoremin are: Allah eemnak Ara bamesemkorom owe bajortaer ataaji aeen. “Dere era ataaji aeemin pak jipu aemkoromtemin.” Emes atakam fiak akoren. Emes atakam akore ere, Are tahun 430 aememe, wanam Musa Basakamtam Atakam Buku ataetiitamen. Musa Basakamtam Atakam Buku atakam, Armat Ipit bonak ataaji aee atakam baemejanimtii asan apok. Emesare, era ataaji aee atakam emes baemansaar are.

¹⁸Emesare, Allah eemnak Ara bamesemkorom owe bajortaer, emes ataaji aeen. Me, wan oweam, “Owe Musa Basakamtam Atakam Buku atakam ji aetas, Allah era owe ajortaertem,” emes atakam aesimemas. Me, era atakam, atakamnak apaye, Allah ataaji aee atakam, ere bambinak. Emesare, Allah ataaji Abraham aee. Erarawa anom era ataaji aee atakam jipu Abraham aemtamen.

¹⁹Allah, Musa Basakamtam Atakam Buku atakam ataetiitame ere, wama tamenem? Musa Basakamtam Atakam, owe adosa baporomtam atakam are. Musa Basakamtam Atakamam Abraham arurupis ipit aemanse bare ajiire atakam taka. Bonak ere, Allah era ataaji, era ipit aeen. Allaham, Musa Basakamtam Atakam, malaikat owe atetamen. Era malaikat owerawa, Musa Basakamtam Atakam, asamot atakam bajomattam ipit aotetamesen.

²⁰Emesare, Allah era ataaji aee ere, era ataaji amba aee. Are atakam batoomat ipit atakam bajanim apok.

²¹Emesare, Musa Basakamtam Atakam Buku atakam, apa atakam ape? Me Allah ataaji aee atakam apa atakam ape? Emes apoknak. Musa Basakamtam Atakam, jiine atakam, owe batetam ere, erarawa Allah Musa Basakamtam Atakam ji bae owe, turunak owe, emes atakam etesakamtiie.

²²Me, Alkitabam, “Owe takes Musa Basakamtam Atakam aooes. Are takes dosa aemes.” Emes atakam aeapome. Erarawa, Allah, era ataaji aee atakam, Yesus Kristus eemnak ambesemkorommas owe, atetamum.

²³Bonak ere, Kristus bamesem bare baemames apok ere, Musa Basakamtam Atakam, ara aemapom asamot owe, aemomaarir emes tamen are. Dare Musa Basakamtam Atakam damon aemapaarum. Ere Allah, Kristus bamesem aporomero bare ajiire aemapaarum pak are.

²⁴Erarawa, Musa Basakamtam Atakam, banamek dara ataiaarir emes tamen are. Era pak dare asep bare Kristuspu batoomtin pak are. Emesare, Allah, Kristus eemnak bamesemkorom owe, owe turunak, emes atakam asakamtiiar.

²⁵Waa ere, Kristus bamesem bare eteemanse. Erarawa era banamek batai pak, banamek dara botai bas.

²⁶Emesare, tare takes Kristus Yesus eemnak ambesemkoromekem. Erarawa tare Allah arereis.

²⁷Owe bwi tara akupimtaeren ere, tare Kristus ajamkaiekem. Erarawa tare Kristus tamen aememekem.

²⁸Tare Kristus ajamkaimakam owe takes, ere awar. Yahudi oweam, Yunani oweam, ere awar. Bambi karai baetam oweam, apa karai aemas oweam, ere awar. Oorey oweam, tapesam, ere awar.

²⁹Tare Kristus aowe. Erarawa tanom Abraham arurupis. Allahrawa, era ataaji aee atakam tara atetamteman.