Read Casuarina Coast Asmat GALATIA 5 Bible Online

GALATIA 5 - Casuarina Coast Asmat bible

GALATIA 5

¹Emesare, Kristus asurumtamero. Armat Ipit, dare asurumtamero owe anakot, emes baememaar, akot ajim! Erarawa tare emes ajakajiremay. Tanom era wuturu pak Yahudi owe basakamtam atakam bomon boemap bas.

²Emesare, dere Paulus. Era surat aeapommin atakam jane pajiay. Owe Yahudi owe pak tai tamane pitini basakamosom tara aemtan apaye, Kristus tara aemtamen pak takes, ere bambinak.

³Denom atakam fiak tara aokorommin. Era Yahudi owe pak tai tamane pitini basakamosom owe takes, Musa Basakamtam Atakam Buku atakam takes ji baekoromtas.

⁴Tare Kristus ambomemekem. Tare, “Allah ere, Musa Basakamtam Atakam Buku atakam ji bae owe, turunak owe, emes atakam asakamtiiar,” emes atakam eemnak apormakam. Emesare, tare, Kristus bambi atetamemar asan akot, beken ajiosekem.

⁵Dare ere, era jiirey aeemarom atakam banamek apeomemmarom. Me Allah Jipam era pak baem jak fiak atetamemaro. Emesare, dare, Allah, dare turunak owe, emes atakam basakamtii, jiirey aeemarom. Ere Kristus eemnak ambesemkorommarom are.

⁶Me Kristus Yesus ajamkaimarom owe damon, Yahudi owe pak tai tamane pitini basakamosom oweam, tamane pitini basakamosom apok oweam, ere awar. Kristus eemnak bamesemkorom ere, anakotnak pak. Era eemnak ambesemkorommas oweam, owe afaimemas.

⁷Bonak ere, tare Kristus bajamkai akot aemekem. Ere tara akekemtaaen owe ere, tanam?

⁸Allah tara ajateman. Me, tara atatapimtaaen ipit ere, Allah apok.

⁹Tarmamon ipit takakope pota pak aemto, tanom takes pota aemapmakam.

¹⁰Deraye taraye, dare Tuhan aowe. Erarawa dere ta jiirey aeetemin. Debimak binip ere, tare debimak binip awar aotetaramtemakam. Tara ajurusumman ipitam, juas aptam ipita apaye, bambi ipit apaye, Allah era ipit ajurusumtem.

¹¹Wan owe ere, “Paulusam, ‘Yahudi owe pak tai tamane pitini basakamosom apok owe baemejorem asan apok,’ emes atakam waa aemansaram akoretamum.” Emes atakam aesimemas. Dere ere, emes atakam apok. Dere emes atakam apok ere, owe, waa ajiire dera ajurusummanis. Dere emes atakam akoretammin apaye, owe dere Kristus salib wus oup dambir ateme akoretamtey atakam, bifane dera bafeomem apok.

¹²Emesare, era Yahudi owe pak tai tamane pitini basakamosom atakam tara akoromman owe, abisak basakamosomtetertas.

¹³Dejoo owe akotnak! Kristus, tare era Yahudi Basakamtam Atakam damon boemap apok, emes ajaten. Tare era Basakamtam Atakam bomon boemap apok ere, tanom era asamot jak basenomem pak jipu baem bas. Tare ere, ajamfaimamay. Wanam asan akot ajamemamay.

¹⁴Musa Basakamtam Atakam Buku atakam takes, ere Basakamtam atakam takakope tamen. Era basakamtam atakam taka ere, “Wore owe, damo woma afaimemarem, emes tamen afaimey.” Allah emes atakam asakamtamum.

¹⁵Me, tare juuri tamen tarmamon ajamjurusumamtakam apaye, turuar. Tare bajamjurusumamkorom-ombar.

¹⁶Era akoremin atakam ere, Tare Allah Jip atakam jipu aemaaray. Erarawa tare ere taasamot jak basenomem pak jipu baem apok aemtemakam.

¹⁷Me asamot jak basenomem pak, Allah Jip atutumum. Me Allah Jipam era asamot jak basenomem pak atutumum. Emesare, era jamnuk ajamomemamis. Erarawa, tare era akot apormakam pak jipu baem apok.

¹⁸Tare Allah Jip atakam ji aetakam apaye, ere tare era Musa Basakamtam Atakam damon boemap apok.

¹⁹Era asamot jak basenomem pak, ere baso. Ere okore are. Asan pota pak baem are. Bambi potanak pak baem are.

²⁰Eto basitim are. Tapak pak baem are. Bifane are. Owentakam are. Owe bet baeom are. Atataren fef are. Owe adamo bimak binip taka bajanimomem are. Atakam bajamkoram are. Owe bajampapamamtaa are.

²¹Owe pak itim bakeomem are. Bir bwi banda jaytu are. Pota pakambwi baem are. Me wan emes pota pakam baem are. Emesare. Emesare, bonak ere, dere ataane tara aoweomo. Waa are, denom ataane tara aoweommin: Me emes pak baem owe, Allah aobaomep owe akot pak basamo baemeta asan apok owe.

²²Me, Allah Jip aemomemtas owe, are emes owe aememtemas: Are bafaim jak atetamum. Are jak akotam, ji baem jakam, jak jiraoam, atatastu jakam, akot pak baem jakam, atakamnak bakore jakam, emes pak atetamum.

²³Are tayieakot jakam, jak fiakam, atetamum. Emesare, owe emes pak baem, era agama basakamtam atakam buku atakam baoo pak apok.

²⁴Wan owe, Kristus Yesus aowe. Era owe ara asamot jak era salib wus oup ataetopomteteres emes tamen are. Ere, era asamot jak, asan pota pak baemam, pota pak baemam, asenomem.

²⁵Me Allah Jip ai jiine atetamteterero apaye, emesare Are dara baemomemkoromtaro.

²⁶Dare damba baemetemtem bas. Danom darmamon atakam bajamtutumamat bas. Danom darmamon itim bajamkakeamat bas.