Read Casuarina Coast Asmat GALATIA 6 Bible Online

GALATIA 6 - Casuarina Coast Asmat bible

GALATIA 6

¹Dejoo owe akotnak!. Owe dosa aemtas, tare Yesus ajamkainak owe, era owe, Yesus bokot anakotpu bofasimomjisay. Era pak aemtakam ere, ainamkopea. Tanom oweo aememayekem turuar. Bii Kapar Ipit tanom dosa baem batatapimtaa-ombar.

²Owe asan pota aemaptas apaye, tare asan akot era owe aemomay. Emes aemtakam, tare Kristus Basakamtam atakam ji aekoromtemakam.

³Owe abimak binip, “Dere owe akotnak,” emes bimak binip atetaramtas, era owe potet amba atutumemas. Era owe, owe akot apok.

⁴Oweo aememayes era aemteteremas pak baoorportetertas. Era aememas pak akot aportas, jak akot baemaptas. Erarawa are owe aememas pak awar apaye, awar apok apaye, emes bimak binip batetaram bas.

⁵Oweo aememayes Allah bipu aememtemas. Are era aemteteraaris pak baemepatimtii asan apok. Are era pak atakam amba akoretemas.

⁶Wan owe Allah atakam aememtamemas. Era jane ajimas owe, era aakot pak, sai, era atakam baememtam owe basaietamaartas.

⁷Potet tamba baemetutumem bas. Tare pote atakam Allah baemekore asan apok. Owe akot pak aemtas, asan akot aemaptemas. Wanam, pota pak aemtas, asan pota aemaptemas.

⁸Owe era asamot jak jipu pak aemtas, are danais aemamestemas. Owe Allah Jip akot apormar pak jipu aemtas, Allah Jip, jiinenak baememaar, era owe atetamtem.

⁹Emesare, era akot pak aememarom, damo jarofefe apok aememaaramo. Dare bamompim apok aemtam, Allah asan akot aemtemaro.

¹⁰Erarawa, era asan akot aportam pak takes, dare akot pak era owe takes aemamo. Erarawa, dare akotnak pak, Yesus dare takan eemnak ambesemkorommas owe, aemamo.

¹¹Emesare, ara atakam kope dema aeapommin. Ara daytu huruf, ere turunak aporay.

¹²Wan owe, Kristus salib wus oup dambir ateme, emes atakam eemnak apormas. Are ere, owe are Kristus ajamkaimas bapor, ombare aememmas. Are era owe ara bajurusum, ombare aememmas. Are owe, ara bamesem, jak aseseromemas. Erarawa are takes, tare Yahudi owe pak tai tamane pitini basakamosom, jande apok awawatimpormas.

¹³Me, era Yahudi owe pak tai tamane pitini basakamosom owe, era Musa Basakamtam Atakam Buku atakam ji bae apok aememas. Are, “Era Galatia owe Yahudi owe pak tai tamane pitini basakamosom tair,” emes atakam daytu bokore, jak aseseromes. Erarawa are tare era Yahudi owe pak tai jipu baem, jak aseseromes.

¹⁴Derarawa, Yesus Kristus daTuhan era salib wus oup dambir ateme atakam, atakam daytu akoretammin. Dere wan atakam daytu bakore apok aemmin. Dere Armat Ipit era salib wus oup dambir ateme apormin. Erarawa ara aemansa tapirmi pak dera boemomem apok aemman. Ara aemansa tapirmi pak takes dambir aeme emes tamen are. Denom ara aemansa tapirmi pak bimak binip apok. Ere dere dambir aemo emes tamen are.

¹⁵Owe, Yahudi owe pak tai tamane pitini basakamosom apaye, tamane pitini basakamosom apok apaye, ere awar. Me, owe ai jak batoomem, ere anakot pak erare.

¹⁶Allah, emes atakam ji bae owe, ji baem jak batetamto. Are era owe soro bajiomemto. Emesare era owe ere, Allah, aowe anakotnak aememmas.

¹⁷Emesare, dere Yesus karai aetamaaru. Erarawa owe dedamo daso atamenis. Era damo daso bajie aemapes. Erarawa waa bare ajiire, owe aemapa surat atakam dera bojamkore bas.

¹⁸Dejoo owe akotnak! Yesus Kristus daTuhan, asan akot tara baemtan. Ara atakam, ere atakamnak.