Read Casuarina Coast Asmat EFESUS 1 Bible Online

EFESUS 1 - Casuarina Coast Asmat bible

EFESUS 1

¹Dere Paulus. Kristus Yesus dere aatakam bakoretam ambirimemomen. Allaham emes akot apore. Tare ere, kota Efesus owe turunak. Tanom Kristus Yesus eemnak ambesemkorommakam owe tarare.

²Emesare, Daritipit Allaham, Yesus Kristus daTuhanam, asan akot tara baemtan. Are ji baem jak tara batetamtan.

³Allah Yesus Kristus daTuhan, Are Allah. Anom Aritipit. Emesare, danom Allah tere aeomamo. Dare Kristus ajamkaiom. Erarawa Allah Surga oup akot pak takes asan akot aemtamero. Era asan akot pak ere, ban baosompor pak apok. Are Allah Jip pak.

⁴Bonaknak ere, Allah ara aemansa tapirmi bakenemapom apok ere, Armat Ipit dare Kristus bajamkai aereremartaaeroen. Are dare abipu, owe turunakam, dosa apokam, emes baemem aereremartaaeroen. Are dara afaimeroen.

⁵Erarawa Are dare Yesus Kristus bajamkai, atakam bonak asakamtiien. Anom dare arereis baemem, atakam bonak asakamtiien. Are emes baem akot aporen. Anom emes baem, bimak binip akukuretiien.

⁶Emesare, Allah Andep afaimum. Danom Andep ajamkaimarom. Erarawa Allah asan akotnak bambi aemero. Emesare, Armat Ipit tere baeomamo.

⁷Kristus aesee ajirindae. Ere dare dosa fiak pak basurumtam pak erare. Era pak dadosa bimak binip bajanimemtam pak erare. Emesare, Allah asan akotnak aemero.

⁸Are era asan akot dare takes aemero. Emesare, Armat Ipit bimak binip basonak. Ara amsamnak. Erarawa Are era bimak binip akukuretiie pak jipu aeme. Are era bimak binip bakukuretii, bonak asakamtiien. Are era bomonnak bimak binip akukuretiie pak aporomtamero. Era bimak binip akukuretiie pak, ere Kristus aemmar pak are.

¹⁰Allaham asan akot aporto, Are era bimak binip akukuretiie pak aemkoromtem. Era bimak binip akukuretiie pak ere, Are era Surga oup akenemapome pak takesam, ara tapirmi akenemapome pak takesam, takakor ataetiitem. Ararawa, Kristus era pak takes akapar Ipit ataemomtem. Are emes bimak binip akukuretiie.

¹¹Allah takes, era bimak binip akukuretiie pak jipuam, era atakam bonak asakamtiie pak jipuam, aemum. Emesare, Armat Ipit dare Kristus bajamkai aereremartaaeroen. Erarawa Are dare aowe baemem aereremartaaeroen. Ere bonaknak atakam asakamtiie bimak binip bakukuretii pak jipu.

¹²Emesare, dare Kristus jiirey bonak aeeom owe, Allah aakotipitnak aememe tere aeomamo.

¹³Tanom are. Tanom era atakamnak jane ajiekem. Era atakam, ere Allah Akot Atakam are. Era atakamam tara bajortaer atakam are. Emesare. tare Kristus eemnak ambesemkoromekem. Allahrawa, era ataaji aee Allah Jip, tara atetamen. Ere tare Allah abaomep owe aememekem, emes baporomtam owe.

¹⁴Allah era bimak akukuretiie pak aowe atetamum. Me Allah Jip era pak aporomtammaro. Emesare, Allah dare era dosa fiak pak asurumtamkoromtemaro. Allah Jipam era pak atakam akoromtetermaro. Emesare, Allah aakotipitnak aememe tere aeomamo.

¹⁵Emesare, tare Tuhan Yesus eemnak ambesemkorommakam. Tanom era turunak owe afaimemakam. Me emes atakam jane ajio baream, waa aemansaram, dere tare terima kasih atakam Allah bakorom bakari apok aemmin. Denom atakam Allah tara ajanimtamemin.

¹⁷Allah, Yesus Kristus daTuhan, Aritipit akotnak. Anom Allah. Emesare, dere Allah, bimak binip basoam, ara atakam baso bakore tastu pakam, tara batetam, emes atakam Armat Ipit ajanimemin. Erarawa tare Armat Ipit tamsam aememtemakam.

¹⁸Emesare, Allah tara ajaten. Tararawa, Allah asan akot tara batetam jiirey aeemakam. Are asan akotnak pak aowe batetam, ataaji aee. Dere tare era pak baporkoromam, Allah baso bimak binip tara batetamam, atakam Armat Ipit ajanimemin.

¹⁹Are fiaknak. Are afiak pak, dare Armat Ipit eemnak ambesemkorommarom owe atetammaro. Era fiak pak, Allah Kristus ajaoromwasumtume fiaknak pak. Era fiaknak pak, Allah Kristus Surga oup abo pomanpu ataapome fiaknak pak are. Dere, Allah, tare era pak baporkorom, emes baso bimak binip tara batetam, atakam ajanimemin.

²¹Emesare, Kristus ara Surga oup aemapmar ere, Are atakam era malaikat pemerintah owe takesam, era malaikat kapar owe takesam, era fiak malaikat takesam, era atakam asakamtamemas malaikat takesam, asakamtamum. Armat Ipit jaus aptamnak. Emesare, waa aemapom owe takesam, era andaeto bare aemaptas owe takesam, ere juas apok.

²²Emesare, Allah, Kristus, takes baemomemkorom atetame. Are Armat Ipit, Ara basitim bajarisiap owe takes aTuhan, ataemome.

²³Era oweam Kristus adamo emes tamen. Era oweam jak akot aptamam, wan akot pak aptamam, Kristus aememas. Armat Ipitam jak akot aptamam, wan akot pak aptamam era samaniin samaniin owe aemapomum.