Read Casuarina Coast Asmat EFESUS 3 Bible Online

EFESUS 3 - Casuarina Coast Asmat bible

EFESUS 3

¹Emesare, dere atakam Allah tara ajanimtamemin. Emesare, dare Paulus. Dere Kristus Akot Atakam tare, Yahudi apok samane owe akoretamemin. Owerawa, dere buji tame bomon ajitaapomenis. Kristus Yesusam dere era buji tame bomon baemap bimak binip akukuretiie.

²Emesare, Allah asan akot dera aemen, wanam atakam tara bakoretam ataemomen. Tanom era pak jane emejiekem apeno.

³Allah era bomonnak bimak binip akukuretiie pak aporomtamen. Denom era atakam, surat karo emeeapomo.

⁴Tanom era surat aeapomo atakam baca aemtakam, tare dere Kristus bomonnak atakam demsam aememo aportemakam.

⁵Bonaknak ere, Allah era bomonnak atakam, asamot owe bakoretam apok aemaarir. Me, japen ere, Allah era atakam aatakam bakoretam ambirimemome turunak oweam, aatakam bakoretam turunak oweam, aporomtame. Me Allah Jip era pak aporomtame.

⁶Era bomonnak atakam emes are: Yahudi apok saman owe, Kristus Akot Atakam eemnak ambesemkoromtas, Allah, asan akot, era oweam, era Yahudi saman oweam, takan aemum. Me Yahudi apok saman owe, era Yahudi saman owe takan, Kristus adamo pak emes tamen aemapmas. Are Allah ataaji aee atakam takan atoomemmas. Ere takes, Kristus Yesus aeme pak are. Emesare, era bomonnak atakam emes are.

⁷Emesare, Allah ere fiaknak. Erarawa Are asan akot bambi dera aemen. Me asan akot ere, Are dere akarai baetam ipit ataemomen. Are dere Kristus Akot Atakam bakoretam ipit ataemomen.

⁸Me Allah wan aowe takes, ere juas aptam owe. Dere ere, juas apok. Me, Allah Kristus Akot Atakam era Yahudi apok saman owe bakoretam ataemomen. Me Kristus Akot Atakam, Kristus aakotipitnak pak atakam are. Emesare, dare aakotipitnak pak baemeporkorom asan apok.

⁹Allah era bomonnak bimak binip akukuretiie pak jipu aemum. Are dere era pak, atakam owe takes baso bakoretam ataemomen. Ere, Allah pak takes akenemapomkoromen. Are era bimak binip akukuretiie pak, tarainak atukumtiiaaririn.

¹⁰Are era pak aemaarir ere, wama tamenem? Emesare, era wonamo oup malaikat pemerintah oweam, era wonamo oup malaikat kapar oweam, Kristus basitim bajarisiap owe apormas ere, are Allah abimak binip baso pak takes apormas. Allah, era owe, emes waa taka bapor, akot ajien. Erarawa Are era pak aemaaririn.

¹¹Allah era pak aemaarir ere, Are era bonaknak bimak binip akukuretiie atakam jipu aemaaririn. Era bimak binip akukuretiie atakam ere, Kristus Yesus daTuhan aeme pak taka are.

¹²Dare Kristus takan aemapmaro are. Danom Armat Ipit eemnak ambesemkorommarom are. Erarawa dare Allah bipu baemem jak fiak aememmarom. Danom Allah atakam bakoretam, asan akot aememmarom.

¹³Emesare, dere atakam fiak tara ajanimemin. Tare era ajirisemmin pak aportakam, tare jak apok baemem bas. Emesare, dere Kristus Akot Atakam tara akoretamo. Erarawa ajirisemmin. Ere asan akot tara boem are.

¹⁴Dere, Daritipit Allah, aakotipitnak bimak binip akukuretiie atakam bimak binip atetaramtey, dere Armat Ipit bipu jindi andaepuapmin.

¹⁵Armat Ipit, Surga oup atiparaisam, ara aemansa tapirmi atiparaisam, aoememe tamen atetamtetereme.

¹⁶Allah aakotipitnak pak ere daytinak. Erarawa, dere, Armat Ipit Kristus bajamkai jak fiak tara batetam, emes atakam ajanimtamemin. Emesare, Allah Jip emas jak tara batetamtan.

¹⁷Erarawa tare Kristus eemnak baesemkorom pak, Kristus tajak bomon baemaptan. Denom, Kristus tara afaimen pak tara baemomemkorom, emes atakam Allah fiak ajanimtamemin.

¹⁸Dere Allah, bimak binip baso taraye, era aowe takesam, batetam, emes atakam ajanimtamemin. Erarawa tare Kristus daytinak afaimmaro pak aporkorommakam.

¹⁹Asamot owe ere, abaso bimak binip Kristus daytinak afaimmar pak bimak binip baemetetaram asan apok. Armat Ipit Kristus adaytinak tara afaimman pak tamsamnak baemem bimak binip tara batetamtan. Erarawa, Armat Ipit tara baemomemkoromtetertan. Emes atakam Allah ajanimtamemin.

²⁰Allah, ere fiaknak. Are era fiak pak, dajak bomon, akotnak pak baem aememem. Dare emes akotnak pak baem, atakam Armat Ipit baemejanimkorom asan apok. Danom era pak bimak binip baemetetaramkorom asan apok.

²¹Allah, owe, Kristus Yesus basitim bajarisiapaar, bimak binip akukuretiien. Are Armat Ipit asamot owe Bajortaer Ipit ataemomen. Erarawa owe, “Allah akotnak,” emes atakam bakoreaartas. Ara atakam, ere atakamnak.