Read Casuarina Coast Asmat FILIPI 1 Bible Online

FILIPI 1 - Casuarina Coast Asmat bible

FILIPI 1

¹Dere Paulus. Denom, Timotiusam, Kristus Yesus abambi karai baetam owe. Dere ara surat, tare kota Filipi turunak owe takes aeapomtammarom— tare Kristus Yesus ajamkaimakam bambi oweam, Yesus basitim bajarisiap armat aememmakam oweam, pibajat oweam, emes owe are.

²Daritipit Allaham, Tuhan Yesus Kristusam, asan akot tara baemtan. Are ji baem jak tara batetamtan.

³Dere ta bimak binip ajanimomemtey, dere tare terima kasih atakam deAllah akoromemin.

⁴Bonaknakam, waa aemansaram, dere Allah Akot Atakam akoretamaaru, tanom era karai takan aeaarum, emes aporaaru. Emesare, dere Allah tara ajanimtamtey, dere jak akot aptam ajanimemin.

⁶Bonaknak ere, Allah, aakot pak, tara aitaerteteren. Armat Ipitam, aakot pak, Kristus Yesus aofasiendaeto bare ajiire, aemtamkoromteman. Dere emes demsam.

⁷Emesare, dere daytinak tara afaimemin. Erarawa, dere emes bimak binip tara batetaram, ere akot. Allaham asan akot deraye taraye takan aemaro. Dere ara buji tame bomon aemapmin, Are asan akot dara aemaro. Bonakam, dere ara buji tame bomon baemap apok aemaaru, denom atakam era atakam baoo owe akoretamaaru. “Allah Akot Atakam, pote apok. Ere atakamnak,” emes ajiaaru. Denom owe Allah Akot Atakam ji baekorom, emes atakam akoretamaaru. Dere emes takes aemaaru, Allah, asan akot dare takan aemaarir.

⁸Emesare, dere tare daytinak afaimemin. Kristus Yesusam emes bafaim jak dera atetamen. Ara akoremin atakam, ere atakamnak. Allaham emes amsam.

⁹Denom atakam Armat Ipit ajanimemin: “Ere Filipi owe, owe bafaim, betema betema bajitas. Are woatakam amsam baememtas. Are bimak binip basonak batetaramtas.” Emes atakam ajanimemin.

¹⁰Tare Allah ajanimemin atakam jipu aemtakam, tare era akot paknak baem aereremartaatemakam. Tanom bwifef apok oweam, pota pak baem apok oweam, aememtemakam— Kristus aofasiendaeto bare ajiirea.

¹¹Tanom era turu pak jipu taka aemkoromemakam. Era turunak pak ere, Yesus Kristus tara aemtameman. Emes takes aemtakam, Allah andi afufuostem. Oweam Armat Ipit tere aeomtemas.

¹²Dejoo owe akotnak! Dere tare emes baporkorom akot ajimin: Era owe dera aemenis pak, owe tanane Allah Akot Atakam jane bajie atakam are.

¹³Dere Kristus bambi karai baetam ipit. Erarawa, owe dere buji tame bomon ajiitaapomenis. Emesare, banamek dera batai tentara owe takesam, wan owe takesam, emes apormas.

¹⁴Me wan dajoo owe takes, dere ara buji tame bomon aemapmin apores. Ararawa, wosao aememteteres. Erarawa, are Allah atakam bakoretam, wosau jak betema betema ajies. Are ombare apok aememes.

¹⁵Me wan owe, ere bet dera asisimomemmanis. Are bifane dera afeomemmanis. Erarawa are Kristus atakam akoretamemas. Me wan owe ere, Kristus atakam, bimak binip akot aptam akoretamemas.

¹⁶Era owe dera afaimemanis. Emesare, Allah Akot Atakam pote atakam apok. Allah dere emes atakam bakoretam ipit ataemomen. Era oweam emes apormas.

¹⁷Me wan owe ere, Kristus atakam akoretamemas, ere bimak binip pota atetaramemas. Abimak binip ere, “Owe tanane daatakam jane ajitas, Paulus itim akemtem. Emesare, are buji tame bomon, jak pota daytinak aoemaptem.” Emes bimak binip pota atetaramemas.

¹⁸Ere, emesa. Owe, Kristus atakam bakoretamkoromtas. Are era atakam bakoretam, bimak binip pota aptam apaye, bimak binip akot aptam apaye, ere jak akot aemapmin. Denom jak akot aemapaartemin.

¹⁹Emesare, tare Allah dera ajanimtamemankum. Wanam Yesus Kristus aJipam dere takan aememman. Erarawa, dere asan akot aemaptemin. Dere emes demsam.

²⁰Dere dake bekem pota anakot aememin. Denom atakam baso waa bakore jak fiak baemap, jak aseseromemkorommin— ara atakam baso akoretama ajaio awara. Erarawa jatiaptam aememtey apaye, dambir atemtey apaye, ere era aemtey pak takes, Kristus tere baeomaar are.

²¹Dere jatiaptam aememmin, dere Kristus atakam ji aeaaremin. Me, dambir atemtey, asan akot aemaptemin.

²²Dere jatiaptam aememaartey, dere Kristus karai akot aetamaartemin. Erarawa, dere jatiaptam baememaar akot apaye, dambir batem akot apaye, ere dere emes atakam baemesakamtii asan apok.

²³Dere bimak binip arke. Dere dambir batem, wanam Kristus takan baemap, jak aseserommin. Emes aemtey, ere akot. Dere jatiaptam baemem, ere emes pota.

²⁴Me, dere jatiaptam aememmin, ere asan akot tara boem are.

²⁵Dere era pak demsam. Dere dambir fef apok apormin are. Dere tare takan aememtemin. Erarawa tare Kristus eemnak bamesemkorom betema betema ajitemakam. Tare kristus eemnak bamesemkorom jak akot aptam betema betema ajitemakam.

²⁶Emesare, dare tara aofasiomemtey, ere tare Kristus Yesus ajamkaimakam owe, Armat Ipit basitim betema betema ajitemakam.

²⁷Emesare, juiin afaafemar aemmakam pak, tare Kristus Akot Atakam jipu aemay. Era pak baem, ere anakot pak. Emes aemtakam, tare emes ajakajiremtemakam. Tanom takes atakam awar akoretemakam. Tanom bimak binip awar aptam, owe Allah Akot Atakam eemnak bamesemkorom, karai fiak aetemakam. Derarawa, tabi bapor ajinaomemtey apaye, dere tara bajinaomem apok aemtey apaye, dere era akot aemmakam pak jane ajitemin.

²⁸Tare tajokoman owe ombare bas. Era owe tare ombare apok aportan, are era danais aemamestas pak, baso aportemas. Are tare ajoremmakam, baso aportemas. Allah era pak era owe aporomtem.

²⁹Emesare, Allah, tare Kristus eemnak bamesemkorom, tare emes atetamen. Me, era taka apok. Tare Kristus ajamkaimakam. Erarawa owe tara ajurusumteman. Allaham tare bajirisem, tare emes atetamen.

³⁰Bonak ere, dere owe Kristus eemnka bamesemkorom atakam awawatimaaru. Tare era pak aporaarukum. Jane ajiekem tamen waa ajiiream dere owe Yesus eemnak bamesemkorom atakam aowawatimmin. Taraye deraye owe Yesus eemnak bamesemkorom atakam awawatimmin tamen awara.