Read Casuarina Coast Asmat FILIPI 2 Bible Online

FILIPI 2 - Casuarina Coast Asmat bible

FILIPI 2

¹Emesare, tare Kristus ajamkaiekem. Armat Ipit arawa, jak fiak tara atetamen. Are tara afaimeman. Erarawa tare jak akot aemapmakam. Tanom Allah Jip ajoo owe aemememakam. Tanom tarmamon ajamfaimamemakam. Tanom tarmamon seis akot ajamooramporemakam.

²Tararawa bimak binip awar atetaramay. Tanom bafaimnak ajamfaimamay. Atakam awar ajamkoramay. Oweo aememayes apa atakam bas. Emes aemtakam apaye, tanom dere jak akotnak aoemtemankum.

³Tare, era asan akot pak, tadamo bimak binip taka bas. Ta taka akot, wan owe pota, emes bimak binipam batetaram bas. Me, tare pota, wan owe akot, emes bimak binip atetaramay.

⁴Tanom, tare asan akot aemapmakam apaye, asan pota aemapmakam apaye, emes bimak binip taka batetaram bas. Tare ere, wan oweam, asan akot aemapmas apaye, asan pota aemapmas apaye, emes bimak binipam atetaramay.

⁵Kristus Yesus atetarame bimak binip jipu, bimak binip tamba atetaramteteray.

⁶Emesare, Armat Ipit Allah. Me, Are, Aritipit Allah, awarnak baememkorom, jak baseseromem apok.

⁷Emesanare, Armat Ipit Allah awar baemem aokoromtiie. Ararawa, bambi karai baetam ipit tamen aememe. Are asamot ipit da tamen ajaoreme. Are asamot ipit biam, damoam, atoome.

⁸Armat Ipit asamot ipit aememe, Are amba baemetemtem apok Ipit aememe. Are Aritipit atakam jipu taka aeme. Ere Are dambir ateme ajiire are. Era dambir ere, salib wus oup dambir ateme.

⁹Erarawa Allah, Yesus oupnak aotemetetaeme. Are ajuas atemtememe. Me wan juas takes era juas atemteme tamen apoknak.

¹⁰Ere Surga oup owe anama wonamo oup owe takesam, ara aemansa tapirmi owe takesam, era bomon tapirmi owe takesam, Yesus juas jane ajitas, jindi andaepuaptetertemas.

¹¹Are, owe takes, “Yesus Krirstus, ere Tuhan,” emes atakam baso bakoreteter, akot ajim. Owe emes atakam aesimtas, are Daritipit Allah asitimtemas.

¹²Dejoo owe akotnak! Dere tare takan aemapaarum, tare deatakam ji aeaarukum. Waaam dere ta takan baemap apok aemmin. Me, tanom deatakam ji aeekoromay. Allah tare emejortaeren. Emesare Allah bajamkai fiak aememaaray. Armat Ipit atakamam ji aekoromay. Emes aemtakam, tanom ji baem pak turunak aemapkoromtemakam.

¹³Emesare, Allah, tare era akot apormar pak jipu baem, emes jak tara atetamman. Are era akot apormar pak jipu baem, emes fiak pak tara atetamteman.

¹⁴Era aemmakam pak takes, jak akot aptam aemay. Jirpu bapupuem bas. Atakam bajamkoram bas.

¹⁵Emes atakam jipu aemtakam, owe tare jaos owe, emes atakam baemekore asan apok. Tanom asan pota apok owe aememtemakam. Tanom Allah arereis turunak aememtemakam. Me, tare ara aemansa tapirmi jaos oweam, jokoman oweam, awaut aemapmakam. Tare era jiinenak atakam era owe akoromtakam, tare era wonamo oup baet emes tamen, era owe waut asaramapmakam. Emes aemtakam, Kristus aofasiendaeto bare, dere era aemekem pak, jak akotnak aememtemin. Dere era karai daytinak aeaaru pak bambi pak apok aportemin.

¹⁷Me Kristus eemnak ambesemkoromtakam pak, Allah bataetiitam pak emes tamen are. Denom, tare Kristus eemnak bamesemkorom baememtam, dambir atemtemin apeno. Owe atatiitanis, deesee ere pak ten baokokomapom emes tamen are. Emesare, dere emes baem jak akot aemapmin. Denom tare takan jak akot aemapmarom.

¹⁸Emesare, tanom emes tamen taka jak akot aemapay. Danom jak akot takan aemapamo.

¹⁹Emesare, dere taatakam jane ajitey, jak fiak aemaptemin. Erarawa, Tuhan Yesus akot aporto, dere Timotius tara ataejinaomtamtemin.

²⁰Era wan dere takan owe, armat ipit awar apok. Armat ipitam, denom, bimak binip takan atetaramamum. Are tare asan akot baemap, jak aseseromemkoromum.

²¹Wan owe takes apak bimak binip taka atetaramemas. Are Yesus Kristus pak bimak binip, ere apok.

²²Tare ere, Timotius, owe akotnak eteporekem. Are detii emes tamen are. Denom aritipit emes tamen are. Dararawa, Allah Akot Atakam takan akoretamomum.

²³Emesare, dera ajipirtaerenis owe era aemtanis pak aporkoromtey, dere armat ipit fef kope tara ataejinaomtamtemin.

²⁴Denom Tuhan jiirey aeemin. Armat Ipit akot aporto, dere fef tare emes ajinaomemtemin.

²⁵Dere, dajoo ipit juas Epafroditus, tara bofasimtam, atakam asakamtiio. Bonak ere, tare armat ipit pi dera bajat ataejinaomekem. Armat ipit arawa, karai takan aeaarumum. Danom Kristus jii owe jii takan atamamiirumum emes tamen are.

²⁶Emesare, armat ipit tabi bopor jak aseseromaarir. Tanom armat ipit damo ajaue atakam jane etejiekem. Are emes apore ere, jak pota aemape.

²⁷Emesare, armat ipit dao ajaue. Are dambir baemken aemanse. Me, Allah seekot armat ipit aoorpore. Are seekot armat ipit taka baoorpor apok. Are seekot dera aoorporen. Dere jak pota aemapo pak bokaim-ombar.

²⁸Emesare, dere armat ipit tara ametetaejinaomtamtemin. Tare armat ipit bi aoportakam, jak akot aememtemakam. Denom jak akot aoememtemin.

²⁹Tare armat ipit atoomjiitakam, jak akot atoomjiiay. Are Tuhan tare takan ajamkaimakam. Me emes tamen owe takesam asitimay.

³⁰Emesare, armat ipit Kristus karai aetame ere, are dambir baemken aemanse. Tanom ara asan pi dera baemejat asan apok. Armat ipit ere, jow tara auuemen. Erarawa are asan pota aememe.