Read Casuarina Coast Asmat FILIPI 3 Bible Online

FILIPI 3 - Casuarina Coast Asmat bible

FILIPI 3

¹Dejoo owe akotnak! Ara atakam, asep atakam. Emesare, Tuhan ji baem jak tara batetamtan. Me bonak surat aeapomtamo atakam, aoeapomtammin. Dere ere, emes baem pota apok. Ere asan akot tara boem surat.

²Emesare, tare tadamo pitini danais baemtii aememas owe, turuar. Are juuri tamen. Are pota pak baem owe.

³Dare tamane pitini basakamosom anakot owe. Allah Jip, Allah eemnak bamesemkorom bimak binip atetammaro. Danom Kristus Yesus ajamkaimarom. Erarawa jak akot aemapmarom. Danom damba baemejorem asan apok apormarom.

⁴Me, wan owe ere, dare damba bajorem amaye emes bimak binip atetaramtetermas apaye, dere ere, ere depakpunake.

⁵Emesare, dere jimim kope aemanso ere, ise poman ban bamintep aemanso. Ise poman ban bamintep aemanso, owe tamane pitini asakamosomenis. Emesare, dere Israel tapirmi ipit ajimsamso. Desaman, Benyamin samankor. Derisare Ibrani owe. Derarawa, Ibrani ipit anakot aememe. Denom Parisi ipit aememaaru. Erarawa dere Yahudi owe basakamtam atakam ji aeaaru.

⁶Denom Kristus basitim bajarisiap owe ajurusumaaru. Denom Masa Basakamtam Atakam Buku atakam ji takesnak aekoromporaaru.

⁷Bonak ere, dere, “Era pak takes anakot pak,” emes bimak binip atetaramaaru. Asep arawa, dere Kristus bajamkai akot aporo. Dere era bonak pak takes anakot pak apok aporo.

⁸Me, era taka apok. Kristus Yesus, ere deTuhan. Dere Armat Ipit demsam. Erarawa akotnak apormin. Me wan pak takes anakot pak apok apormin. Dere Armat Ipit ajamkaio. Erarawa dere depak takes ajiosomo. Dere Kristus bataetkorom jak aseserommin. Denom Armat Ipit bajamkaikorom jak aseserommin. Erarawa dere wan pak takes tanokos pak emes tamen apormin. Denom, “Dere Musa Basakamtam Atakam Buku atakam ji aemin. Erarawa dere turunak ipit dema aememmin,” emes bimak binip batetaram apok aemmin. Dere ere, Kristus eemnak ambesemkoromo. Erarawa Allah dere turunak ipit atakam asakamtiie.

¹⁰Dere Kristus eemnak bamesemkorom jak aseserommin. Denom era ajaorwasite fiak pak basamo batakorom jak aseserommin. Dere era ajiriseme pak emes tamen bajirisem jak aseserommin. Dere Armat Ipit dambir ateme pak, emes tamen baem jak aseserommin.

¹¹Emes aemtey, Allah era dambir owe ajaoromwasumtumto, Are dera ajaoromwasumtumteman.

¹²Dere ere, waa aemansa era pak takes baemkorom apok. Denom turunak ipit anakot baememkorom apok. Me, Kristus dera ataeten. Emesare, dere era pak takes baemkorom, jati daytu aeemin.

¹³Dejoo owe akotnak! Dere era pak baemkorom apok apormin are. Me, dere asep banep bojiepor apok. Dere bimin ajiomemmin asan bamaretey, po fiak ajimin emes tamen are.

¹⁴Dere ere ti putet bataefioskorom asanpu bamaretey, bimin ajiapmin. Dere era bonak bamaretey owe ataetmas pak, bataer aemin. Ere era Surga oup baemap are. Allah Kristus aemtamaro pak apormar are. Ararawa, dare era pak bataet ajatetetermaro.

¹⁵Me dare Kristus bajamkai fiak owe takes emes bimak binip atetaramamo. Tare wan bimak binip atetaramtakam apaye, Allah era pakam tara aporomtamteman.

¹⁶Emesare, waa aemansa ajaraarum bokot, emes ajaraaramo.

¹⁷Dejoo owe akotnak! Tare takes era aememin pak jipu atawejomaaray. Dare tabokot afimtiitamom emes tamen are. Me aememmarom pak jipu baem owe aporkoromay.

¹⁸Emesare, owe tanane era aememas pak, Kristus salib wus oup dambir ateme atakam, bifane afeomemas emes tamen are. Dere emes atakam tanane bonak tara akoretama ajimin. Denom waa bate manames aptam emes atakam tara aokorommin.

¹⁹Emesare, era owe danais aemamestemas. Are Tuhan Allah basitim apok. Are era andemas pak taka asitimemas. Era aememas pak, ere damke pak. Era oweam, “Era aememarom pak, ere akotnak,” emes atakam daytu akoremas. Are ara aemansa tapirmi pak bimak binip daytinak atetaramemas.

²⁰Me, datapirmi Surga oup are. Danom dara bajortaer Ipit era asan aendaeto banamek apemmarom. Are Tuhan Yesus Kristus are.

²¹Armat ipit ere fiaknak. Erarawa Are takes aemomemkoromum. Emesamare, Are dadamo pota, adamo akotipitnak awar ajaoromtamtetertemaro.