Read Casuarina Coast Asmat FILIPI 4 Bible Online

FILIPI 4 - Casuarina Coast Asmat bible

FILIPI 4

¹Dejoo owe akotnak! Dere tara afaimemin. Denom tato. Tanom jak akot dera aemapommankum. Denom taatakam, owe takes bakore, ere jak akot aemapmin. Emesare, tare ara akoremin atakam ji aeay. Tare Tuhan ajamkaimakam are. Tararawa, emes ajakajiremtemakam. Emesare, tare afaimemin owe tarare.

²Euodiae! Sintikee!. Dere atakam fiak tara ajanimmin. Tare Tuhan ajamkaimankum taot amnuk tarare. Emesare bimak binip takar.

³Sunsugose! Wore dejoo ipitnak. Denom atakam wora ajanimmin. Era taot amnuk, ara Allah Akot Atakam bakore, dere karai takan fiaknak aeemis. Erarawa wore pi are ajatey. Emesare, Klemensam, wan dere karai takan owe takesam, karai fiaknak aees. Era owe juas Jiinenak Aptam Owe Buku bomon aapatisa.

⁴Emesare, tare Tuhan ajamkaimakam. Erarawa jak akot aememaaray. Dere ara atakam aotasimmin. Jak akot aememaaray.

⁵Owe takes, tare owe tayieakot aemmakam baportas. Me Tuhan aofasiendaeto bare, ere setep.

⁶Tanom jokey bajie bas. Me, atakam Allah bajanim takar. Atakam Allah ajanimtakam, terima kasih atakamam Armat Ipit akoromay.

⁷Allahrawa, aji baem jak tamen tara atetamteman. Erarawa tare jak pota baemap apok aemtemakam. Tanom bimak binip pota batetaram apok aemtemakam. Tare Kristus Yesus ajamkaimakam. Erarawa Allah era pak aemteman. Emesare, dare asamot owe taka. Erarawa dare Allah atetamtaro ji baem jak, bimak binip baemetetaramkorom asan apok.

⁸Dejoo owe akotnak! Are asep atakam ere, era atakamnakam, era akot pakam, era jaos apok pakam, era asan pota apok pakam, era bafaim pakam, era jane bajie akot pakam, bimak binip atetaramkoromay. Era turunak pakam, era basitim pakam, bimak binip atetaramkoromay.

⁹Era aememtamo atakam, deatakam ataetekem atakamam, deatakam jane ajiekem atakamam, ji aeay. Era aemo pak jipuam aemay. Emes aemtakam, daji baem jak atetammar Allah, tare takan aemteman.

¹⁰Emesare, japen ere, tare de bimak binip aotetaramenkum. Erarawa Tuhan jak akotnak atetameman. Bonakam, tare bimak binip dera bajanimem apok aemapaarukum. Me, tare pak dera bataejinaomtam asan apok aemapaarukum.

¹¹Dere ere, era pak apok ajirisememin pak atakam apok. Dere pak aptam baemap apaye, pak apok baemap apaye, ere dere jak akot baemapaar aememo.

¹²Dere wan bare pak apok aemapo. Wan baream pak daytu aptam aemapo. Me, era samaniin samaniin aemapmin, dere jak akot aemapmin. Juiin afaafemaram, dere jak akot aemapmin. Dere emes baem aememo. Emesare, dere jak tuku aemaptey apaye, dere amosto aemaptey apaye, pak daytinak aemomemtey apaye, pak apok ajirisemtey apaye, dere jak akot aemapmin.

¹³Emesare, Kristus fiak pak dera atetamman. Erarawa dere era pak takes baem akot.

¹⁴Emesare, dere ajirisapo ere, tare seekot aoorporenkum. Era pak akotnak.

¹⁵Dere Makedonia aesoso ere, wan Kristus basitim bajarisiap owe, uang dera batetam apoknak. Ta taka uang atetamenkum. Era pak Allah Akot Atakam jane japen ajiekem bare are. Ta taka de bajirisem pakam, asan akot pakam ataetekem. Aemapakam Filipi owee! Tare emes tamsam.

¹⁶Denom kota Tesalonika pak apok aemapo ere, bare bamintep tare uang ataejinaomtamenkum.

¹⁷Dere ere, tare pak dera batetam jak baseseromem apok. Dere Allah asan akot tara boem jak aseserommin.

¹⁸Emesare, dere era ataejinaomtamenkum pak takes asan akot ataero. Derarawa, waa pak daytu ara aemompe. Epafroditusam era ataejinaomtamenkum pak atetamen. Erarawa dere asan akotnak aemape. Era ataejinaomtamenkum pak, ere pinim akot pak Tuhan Allah jis bajaatam pak emes tamen are. Armat Ipitam era pak akot aporem.

¹⁹Me deAllah, ere akot pak daytu aemommar. Are Kristus Yesus aeme pak aporem. Erarawa Are era asan pota aemapmakam pak takes, asan akot aemteman.

²⁰Me deAllah, ere Daritipit. Owe, Armat Ipit tere baeomaartas. Are atakam, ere atakamnak.

²¹Tanom selamat atakam Kristus Yesus ajamkaimas turunak owe baesimtamay. Me dere takan dajoo owe takes, selamat atakam tara akoromman.

²²Era Kaisar tame aemapemas turunak oweam, me wan turu owe takesam, selamat atakam tara akoromman.

²³Tuhan Yesus Kristus asan akot tare takes baemtan.