Read Casuarina Coast Asmat KOLOSE 1 Bible Online

KOLOSE 1 - Casuarina Coast Asmat bible

KOLOSE 1

¹Dere Paulus. Kristus Yesus, aatakam bakoretam ambirimemomen. Allaham emes akot ajie. Dajoo ipit Timotius, ara surat takan aeapommarom.

²Tararawa, kota Kolose Allah aowe tarare. Tare Kristus eemnak ambesemkorommakam. Erarawa tare dajoo owe. Daritipit Allah, asan akot, tara boemtan. Anom ji baem jak tara batetamtan.

³Atakam jane ajiom ere, tare Kristus Yesus eemnak ambesemkorommakam. Tanom era Allah aowe takes afaimemakam. Emesare, dare atakam Allah tara ajanimtamtam, danom terima kasih atakam Allah akoromemarom.

⁵Emesare, Allah Akot Atakam, ere atakamnak. Tare ara atakam jane japen ajiekem, ere tabanamek apeomekem pak aporekem. Erarawa tare Kristus Yesus eemnak ambesemkorommakam. Tanom era turunak owe afaimemakamam. Allaham tabanamek apeomekem pak Surga oup ataapomtamman.

⁶Emesare, Allah Akot Atakam, asan akot, ara aemansa tapirmi samaniin samaniin owe aemapomum. Era Allah Akot Atakam jane ajimas oweam betema betema ajies. Ere era aemmakam pak tamen are. Tanom Allah Akot Atakam jane ajiekem. Tanom Allah, asan akot, asamot owe bambi atetamtem, emes atakam jane ajiekoromekem. Era baream, waa aemansaram, Allah Akot Atakam, asan akot tara aemaarin. Era Allah Akot Atakam jane ajies oweam betema betema ajiaaris.

⁷Epafras ara atakam tara aeapomtamen. Emesare, dare armat ipit afaimemarom. Araye daraye Kristus karai takan aetammarom. Are turu ipit arare. Anom taasan Kristus karai baetam jow auuemero.

⁸Armat ipitam, “Era Kolose owe tare daytu afaimeman. Me Allah Jip emes bimak binip era owe atetame.” Emes atakam aesimtamero.

⁹Emesare, emes atakam jane ajiom baream, waa ajiiream, dare atakam Allah tara bajanimtam bakari apok aememarom. Dare Allah era akot apormar atakam jipu tara baporomtam, emes atakam Armat Ipit ajanimemarom. Tare bimak binip baso batetaramam, atakam jane bajiekoromam, emes atakam ajanimemarom. Era pak, Allah Jip atetamaro pak are.

¹⁰Emes aemtakam apaye, tare Tuhan aowe baemem, awarnak aememtemakam. Tanom era akot apormar atakam jipu aemkoromtemakam. Tanom akot atakam takes aemtemakam. Tanom Allah tamsam betema betema ajitemakam.

¹¹Emesare, Allaham aakotnak fiak pak tara batetamtan. Erarawa tare fiak aememtamakam. Tararawa, era ajirisemtakam pak takes damon, jak jirao aptam emes ajakajiremaartemakam.

¹²Tanom jak akot aptam, terima kasih atakam, Daritipit aokoromtemakam. Armat Ipit tare era turu owe awar baemem, emes aemapomen. Emesare, tare turu owe aememekem. Erarawa tare Allah atetamtaro pak, Andep pemerintah sare asan, aemomemtemakam.

¹³Armat Ipit era jiiti pemerintah asan fiak pak asurumtamero. Ararawa, dare, Andep aobaomep asanpu, jiisi atuumosomero. Emesare, Are Andep afaimum.

¹⁴Me Andepam asusurumtamero. Anom dadosa bimak binip ajanimemtamero.

¹⁵Emesare, dare Allah bi baemepor asan apok. Kristus ere, Allah bi awar. Me Kristus, biiti ipit arare. Are juas aptamnak ipit. Me Allah akenemapome pak takes ere, juas apok.

¹⁶Emesare, Kristus era wonamo oup pak takesam, ara eamansa tapirmi pak takesam, akenemapomen. Are era baso pak takesam, da bapor apok pak takesam, akenemapomen. Are era malaikat owe baomep oweam, era atakam asakamtamemas malaikat oweam, era malaikat pemerintah oweam, era malaikat kapar oweam, takes akenemapomen. Armat Ipitam pak takes akenemapomen. Are era pak takes ara basitim akenemapomen.

¹⁷Armat Ipitam bonak taemema emen. Are ara aemansa tapirmi pak takesam, era wonamo oup pak takesam, ban fiak aemommar.

¹⁸Armat Ipit, ere kuus emes tamen are. Me ara basitim bajarisiap owe ere, adamo pak emes tamen are. Are era owe ji aeremapome Ipit arare. Are bonak ajaorwasite Ipit arare. Emesare Are anakotnak Ipit.

¹⁹Allaham, Andep, Allahnak baemem, atakam asakamtiie.

²⁰Me Andep aesee era salib wus oup ajirindae. Allah emes pak apore ere, Are asamot owe bajamkipimtaer, atakam asakamtiie. Are ara aemansa tapirmi pak takesam, era wonamo oup pak takesam, botaet atakam asakamtiie.

²¹Bonak ere, tare Allah setep apok aememekem. Tare bimak binip pota atetaramekem. Tanom pota pak aemekem. Emesare tare Allah jokoman owe aememekem.

²²Waa ere, Allah, Andep aeme pak apore. Erarawa Armat Ipit tare ajoo owe ataemomen. Era pak, Armat Ipit tare turunak oweam, akot oweam, dosa apok oweam, abipu bataemom are—

²³tare Kristus eemnak ambesemkoromtakamam, tare fiak akajiremtakamam, tare era ji aeekem Allah Akot Atakam bamompim apok aemtakam, are. Emesare tare era Akot Atakam jane ajiekem. Oweam Allah Akot Atakam era samaniin samaniin akoretames. Emesare, dere Paulus. Denom Allah Akot Atakam bakoretam, bambi karai bae ipit aememo.

²⁴Emesare, dere Kristus bajamkai tara aememtamemin. Erarawa ajirisememin. Me Kristus basitim bajarisiap owe, Kristus adamo emes tamen. Armat Ipit, ara owe bajortaer ajiriseme. Denom Armat Ipit bajirisemkorom apok aeme pak, bajirisemkorom jak akot aememin.

²⁵Allah, dere, era samaniin samaniin Kristus basitim bajarisiap owe abambi karai baetam ipit, ataemomen. Are apak baem asan akot tara baem, dere ataemomen. Are apak baem, Allah atakam, tara bakoretamkorom are.

²⁶Era atakam Allah bomonnak atukumtiiaarir atakam are. Me bonaknak owe takesam, era arurupis takesam, era atakam jane bajiekorom-ombaren. Japen ere, Armat Ipit era atakam aowe, baso aokoretame.

²⁷Armat Ipit, era bomonnak atakam, aowe baporomtam akot ajie. Era bomonnak atakam, aakotipitnak aememe atakam are. Emesare, era atakam ara samaniin samaniin atakam arare. Era atakamam, “Kristus tajak bomon aemapman. Erarawa tare Allah akotipitnak aememe pak aporkorommakam.” Emes bomonnak atakam baso aokoretame.

²⁸Emesare, dare Kristus atakam, owe takes akoretamemarom. Danom ataane, owe takes aoweomemarom. Danom bimak binip baso aptam, atakam, owe takes aememtamemarom. Ere owe takes Kristus bajamkainak baemapom are.

²⁹Dere emes baem, karai daytinak aeemin. Denom Kristus atetameman fiaknak pak aptam, owentakam daytu ajamomemin emes tamen are.