Read Casuarina Coast Asmat KOLOSE 3 Bible Online

KOLOSE 3 - Casuarina Coast Asmat bible

KOLOSE 3

¹Emesare, Allah tare Kristus takan ajaoromwasumtumen emes tamen are. Emesare, tanom era Surga oup pak, jak aseseromaaray. Era asan ere, Kristus Allah bo poman aemapem.

²Era Surga oup pak, bimak binip daytu atetaramaaray. ara aemansa tapirmi pak, bimak binip daytu bas.

³Emesare, tare dambir atemekem emes tamen are. Tanom Kristus ajamkaiekem. Erarawa tare Allah takan aememmakam. Asamot owe ere, emes baemepor asan apok.

⁴Emesare, Kristus jiinenak tara atetamman. Armat Ipit ajisemto, tanom takan ajisemtemakam. Tanom aakotipitnak pak takan aemomemtemakam.

⁵Emesare, ara aemansa tapirmi jak asenommakam pak, batatii emes tamen aemay. Ere era tani tamene bajamdamat are. Era asan pota pak baem are. Era asan pota pak jak basenomem are. Era pota pak jak basenomem are. Era pak daytu bataet jak basenomem are. Emesare, era pak daytu bataet jak basenomem, eto basitim aware.

⁶Allah, owe emes baem aporem. Ararawa, aatakam baoo owe, ajurusumtem.

⁷Bonak, tanom emes jak asenomaarukum ere, tare era owe takan aemapaarukum.

⁸Waa ere, tare era jak ambap pak aemosomay. Tanom jokoman baemem pak, owe asan pota boem pak, tame atakam, asan pota atakam, ere takes ajiosomay.

⁹Tanom pote atakam bamkore bas. Emesare, tare tatarai jak emetaetiiosteterekem. Era tarai aemekem pakam, emetaittiosteterekem.

¹⁰Tanom ai jak emetoomemteterekem. Allah, taai jak, ajak jipu aken-emapome. Are juiin afaafemar, taai jak, ai ajaoromum. Erarawa tare Allah tamsamnak.

¹¹Emesare, era ai jak atoomes owe damon, owe takes awar. “Wan owe Yunani owe. Wan owe ere, Yahudi owe,” are emes atakam bokore apok. “Wan owe Yahudi owe pak tai tamane pitini basakamosom owe. Wan ere, tamane pitini basakamosom apok owe. Wan owe kaaowe. Wan oweam jokoman owe. Wan owe bambi karai baetam owe. Wan owe apa karai aemas owe.” Are emes atakam bokore apok. Me, Kristus taka, ere anakotnak. Anom aowe takes jak bomon aemapteterem.

¹²Allah tare aowe baemem aereremartaaen. Tare ere, turunak owe. Allaham tara afaimeman. Emesare, tanom owe seekot ajamoorporay. Tanom owe asan akot aemay. Tanom tamba baemetemtem bas. Tanom tayieakotnak owe aememay. Tanom jak jirao aememay.

¹³Emesare, tarmamon jak jirao ajamemamay. Tare bimak binip atetaramtakam, “Era owe pota pak aemenis,” emes atakam aesimtakam, ere tare era owe tara aemen pak, bimak binip ajanimemtamay. Emesare, Tuhan tadosa, bimak binip etejanimemtamen. Erarawa tanom pota pak tara aemen owe, era aemen pak, bimak binip ajanimemtamay.

¹⁴Wanam, owe afaimay. Emesare, owe ajamfaimamemas owe, bimak binip awar atetaramemas.

¹⁵Tanom Kristus atetamtan ji baem jak akot pak baem bimak binip, atakam tamba asakamtiia ajiay. Allah tare damo taka emes tamen baemem ajaten. Kristusam, owe bakipimtaer bimak binip atetamum. Emesare, tare era owe bakipimtaer bimak binip jipu pak aemkoromay. Tanom terima kasih atakam Allah akoromay.

¹⁶Me Kristus atakam, ere bambi akotnak. Era atakam tajak bomon baemamesteterkoromtan. Tanom tarmamon, atakam ajamjomattamay. Tanom tarmamon ataane ajamoweamay. Era pak bimak binip baso aptama. Tanom Allah basitim soam, Allah tere baeom soam, Allah Jip atetamemar soam, aeay. Era so Allah aetamtakam, terima kasih bimak binip atetaramay.

¹⁷Era aemtakam pak takesam, era akoretakam atakam takesam, ere Tuhan Yesus bajamkai owe pak jipu aemay. Tanom Armat Ipit takan, Daritipit Allah bipu, aememay. Wanam terima kasih atakam Allah akoromay.

¹⁸Tapese! Tare tambiis atakam ji aeay. Ere Tuhan bajamkai tapes baem pak.

¹⁹Oorey owee! Tare tatapesti afaimay. Tanom tatapesti asan pota pak baemomem bas.

²⁰Jiie! Tare tarisare atakam ji aeay. Era pak Tuhan akot apormar pak jipu erare.

²¹Duturu owee! Tare tajii jak pota baferem bas. Are jak potanak baemem-ombar.

²²Karai baetam owee! Tare takarai armat owe aatakam ji aekoromay. Are tara bapor apaye, tara bapor apok apaye, era pak aemay. Era pak baem, era owe atakam akot tara bakorom atakam apok. Emesare, tare Tuhan asitimmakam. Erarawa tare, takarai armat owe aatakam ji jak akot aptam aeay.

²³Era aemtakam pak takes, akot aemkoromay. Tare era pak asamot oweiin baemtam tamen bas. Tare era pak Tuhan baemtan tamen aememay.

²⁴Tuhan aowe bimak binip akukuretiie pak tara atetamteman. Emes tamsam. Emesare, tare Kristus karai aetammakam.

²⁵Allaham era jaos owe era jaos aememas pak jipu ajurusumtetertem. Emesare, Allah, owe takes awar aemtem.