Read Casuarina Coast Asmat KOLOSE 4 Bible Online

KOLOSE 4 - Casuarina Coast Asmat bible

KOLOSE 4

¹Karai armat owee! Takarai armat ipit Surga oup aapeta. Emes tamsam. Emesare tanom akot pak takarai baetam owe aemomay. Tanom pote era owe baem bas.

²Atakam Allah ajanimaaray. Atakam Allah ajanimtakam, bimak binip fiaka. terima kasih atakamam Allah akoromaaray.

³Atakam Allah danom ajanimtamaroay. Allah dare aatakam bakoretam, asan akot dara batetamtaro. Are dare era bomonnak atakam bakoretamam, asan akot dara batetamtaro. Emesare, dere aatakam akoretamo. Erarawa dere ara buji tame bomon aemapmin.

⁴Allah, dere aatakam baso bakoretam, akot ajim. Tanom dere emes baem, atakam Allah ajanimaaray.

⁵Tare Kristus bajamkai apok owe aemtakam pak, bimak binip basoa. Tanom bambi baemap bas.

⁶Atakam akoretakam, atakam akota. Atakam, bimak binip aptam, akoreaaray. Tanom, tara ajateportan owe, atep akot bajit, emes aememaaray.

⁷Emesare, Tikikus dajoo ipit. Dare armat ipit afaimemarom. Armat ipitam Tuhan karai turu baetam ipit arare. Araye deraye Tuhan bambi karai takan aetamamum. Emesare, armat ipit deatakam tara akoromteman.

⁸Denom armat ipit emes atakam taka tara bakoretam ataejinaomtammin. Are daatakam tara bakoretam, ere, tare jak fiak baemapom are.

⁹Denom Onesimus anama Tikikus takan ataijinaomtammin. Armat ipitam turunak dajoo ipit arare. Dare armat ipit afaimemarom. Are tasaman ipit arare. Era ipit amnuk, era aemapmarom asan owe aememas pak takes, atakam tara aesimtamteman.

¹⁰Aristarkus ara buji tame takan aemapmarom. Armat ipit selamat atakam tara akoromman. Markusam selamat atakam tara akoromman. Are Barnabas areot arare. Dere, tare armat ipit aemtakam pak, atakam emesakamtamo. “Markus tara ajinaomemtan, bataeray.” Emes atakam emesakamtamo.

¹¹Me Yesus wan juas Yustus. Armat ipit selamat atakam tara akoromman. Emesare, wan Yahudi owe Kristus ajamkaies. Me, era owe damon, ara ipit bamintepkope karai takan aemmarom. Wan owe apok. Ara karai, Allah aobaomep karai baetam karai. Emesare, era owe dere jak akot aemapomenis.

¹²Epafras selamat atakam akoromman. Are tasaman ipit arare. Are Kristus Yesus bambi karai baetam ipit arare. Armat ipit atakam Allah ajanimtamaareman. Are, tare emes bajakajiremam, tare Kristus bajamkai fiaknakam, tare Allah akot apormar pak baporkoromam, emes atakam Allah ajanimtamaareman.

¹³Me Epafras, asan akot tara baem, karai daytinak aeem. Are Laodikia oweam, Hierapolis oweam, emes taka aemum. Dere era pak ateman atammin.

¹⁴Lukas, ere dokter. Danom armat ipit afaimemarom. Armat ipitam, Demasam, selamat atakam akoromman.

¹⁵Tare selamat atakam Laodikia dajoo oweam, Nimfaam, armat taot atame Kristus basitim bajarisiap oweam, baesimtamay.

¹⁶Tare ara surat baca aemkoromtakam, ara surat, era Laokidia Kristus basitim bajarisiap oweam ataejirimtamay. Are ara surat baca baemtas. Wanam, tare era Laokidia owe tara ataejinaomtamtan surat, baca aemay.

¹⁷Tanom Arkipus atakam baesimtamay. “Wore Tuhan atakam asakamtamen karai, aemkoromey.” Emes atakam aesimtamay.

¹⁸Emesare, dere Paulus. Dere selamat atakam tara akorommin. Denom ara aemansa selamat atakam kope, surat dema aepommin. Dere buji tame bomon aemapmin. Tanom era pak bimak binip bajanimem bas. Emesare, Allah asan akot tara baemtan.