Read Casuarina Coast Asmat 1 TESALONIKA 1 Bible Online

1 TESALONIKA 1 - Casuarina Coast Asmat bible

1 TESALONIKA 1

¹Dere Paulus. Denom, Silwanus anama Timotius ara surat, tare kota Tesalonika Yesus basitim bajarisiap owe, aeapomtammarom. Tare, Daritipit Allaham, Tuhan Yesus Kristusam, aowe. Emesare, Allah, asan akot tara baemtan. Are ji baem jak tara batetamtan.

²Dare tare Yesus ajamkaimakam apormarom. Erarawa dare terima kasih atakam Allah akoromaaremarom. Danom atakam Allah ajanimmarom, dare tare takes atakam ajanimtamaaremarom.

³Dare atakam Daritipit Allah ajanimaaremarom, dare era aemekem pak, bimak binip atetaramaaremarom. Tare Yesus Kristus daTuhan eemnak ambesemkoromekem. Erarawa tare akot pak aemekem. Tare Armat Ipit afaimekem. Erarawa tare karai fiak aeekem. Tare Armat Ipit jiirey daytu aeekem. Erarawa tare bamompim apok aekemem.

⁴Dajoo owe akot! Allah tara afaimman. Armat Ipitam tara aereremartaateteren. Dare emes apormarom.

⁵Dare Allah Akot Atakam tara akoretamom, dare atakamiin bakore apok. Dare Allah Jip fiak pakam tara aporomtamom. Danom Allah Akot Atakam, atakamnak aporkoromom. Tararawa, emes pakam aporekem. Dare tare takan aemapom, tare era aemom pak aporekem. Era aemom pak takes, tare asan akot baem are.

⁶Tare era aemom pak jipu atawejomekem. Tare Tuhan aeme pak jipu atawejomekem. Oweam tara ajurusumen. Me, tare Yesus Kristus atakam, jak akot aptam, jiirey aeekem. Era jak akot, Allah Jip atetamen.

⁷Erarawa, era Makedonia tapirmi Yesus eemnak ambesemkorommas owe takesam, era Akaya tapirmi Yesus eemnak ambesemkorommas owe takesam, era aemmakam pak jipu batawejom akot apores.

⁸Era aemekem pak akotnak. Erarawa owe tananenak Tuhan atakam jane ajies. Era atakam jane ajies owe, Makedonia anama Akaya tapirmi owe taka apok. Me, era samaniin samaniin owe takes, Allah eemnak ambesemkoromekem, emes atakam jane ajies. Erarawa, dare wan atakam era owe bakore apok. Emesare, owe jane emejies.

⁹Era owe, ara aemekem pak, atakam amba akorammas. Dare takota ajinaoemom, tare asan akotnak aemom. Tare eto basitim ataepimekem, wanam Allah asitimekem. Emesare, tare jiine Allah anakot, karai aetamekem. Tanom Andep Surga oup aendaeto, banamek apeomekem. Ere Allah ajaoromwasumtume Ipit juas Yesus are. Emesare, Allah dosa bifane afeomem. Erarawa asep bare Are owe daytinak ajurusumtem. Me Yesusam dara bajurusum pak ajortaermaro. Era aemekem pak atakam jane ajies oweam, emes atakam ajamkoramemas.