Read Casuarina Coast Asmat 1 TESALONIKA 2 Bible Online

1 TESALONIKA 2 - Casuarina Coast Asmat bible

1 TESALONIKA 2

¹Dajoo owe akot! Dare takota ajaremom, ere bambi pak apok. Tanom tamsam.

²Bonak ere, kota Filipi ajaremom ere, owe ajurusumeroes. Are tame ateroes. Tanom tamsam. Wanam, dare tara ajinaomom, danom Allah Akot Atakam tara akoretamom. Owerawa, dare era pak baem aokomsakameroes. Me, Allah, dare era atakam tara bakoretam, jak fiak atetamero. Emesare, Allah, aAkot Atakam, ataetiitamero.

³Dare tare Allah Akot Atakam ji bae, ataane aweom ere, dare pote atakam tara baememtam apok. Danom jaos atakam tara bakoretam apok. Danom potet tara batutum apok.

⁴Me, Allah dara aoorporero, wanam Are dare aAkot Atakam bakoretam, awar aporero. Erarawa dare Allah akot apormar pak jipu atakam akoretammarom. Dare asamot owe jak akot baemapompor apok. Dare ere, Allah jak akot aemapompormarom. Emesare, Armat Ipit dajak bomon pak amsam.

⁵Danom, “Tare owe akotnak,” emes atakam ir pitin taka apok. Tare tamsam. Me dajak bomonam dare tapak basenomem apok. Emesare, Allah dajak bomon pak amsam.

⁶Dare Kristus atakam bakoretam ambirimemomero owe darare. Erarawa tare dara batemtem atakam ajanimtam, ere pota pak apok. Dare ere, tar apaye, wan owe apaye, dara batemtem, emes jak baseseromem apok aemmarom. Dare tare takan aemapom, dare tayieakot aemom— arsoot ajii ajuummar emes tamen are.

⁸Dare daytinak tara afaimom. Erarawa dare Allah Akot Atakam tara bakoretam, akot ajiom. Me, era taka apok. Danom tare asan akot baem, emes dambir batem aememom.

⁹Dajoo owe akot! Dare Allah Akot Atakam tara akoretamom, dare jati daytinak aeom. Dare jokam, eamam, karai aeom. Dare tara bajurusum-ombar. Tare emes bimak binip atoomemmakam.

¹⁰Dare tare Yesus eemnak ambesemkorommakam owe aemom pak, ere akot pak jipu aemom. Danom turu pak jipu aemom. Danom atet apok pak jipu aemom. Tare emes tamsam. Allaham emes amsam.

¹¹Dare, duturipit arereis aemmar pak emes tamen, tare oweo aememayekem aemteterom. Tanom emes tamsam.

¹²Dare ataane tara aweomom. Danom jak fiak tara aemapomom. Danom atakam fiak tara akoromom: “Tare Allah akot apormar pak jipu aemay. Armat Ipit, aakotipitnak pakam, aAi Tapirmi bajiiam ajateman.” Emes atakam aesimom.

¹³Dare Allah akoretame atakam tara akoretamom, tare ara atakam jane ajiekem. Ara atakam, asamot akoretamemas bambi atakam apok aporekem. Ere Allah akoretame atakam aporekem. Erarawa dare terima kasih atakam Armat Ipit akoromaaremarom. Emesare, ara atakam, Allah akoretame atakam arare. Ara atakam tajak bomon karai aoeemara.

¹⁴Dajoo owe akot! Tare, era Yudea tapirmi samaniin samaniin Yesus basitim bajarisiap owe aemapes, emes tamen aemapekem. Era owe, Allah aowe. Emesare, Yahudi owe ara owe ajurusumes. Me tasamanam tara ajurusumen.

¹⁵Bonaknak ere, Yahudi owe, Allah atakam bakoretam owe atatiiesen. Asep arawa, wan Yahudi owe, Tuhan Yesus atatiiesen. Wan ere, dara ajurusumeroes. Are Allah jak ambap aemapommas. Are owe takes bifane afeomemas.

¹⁶Are dare Allah Akot Atakam era Yahudi apok owe bakoretam, aokomjatemeroes. Ara atakam, ere owe bajortaer pak. Emesare, ara owe dosa aima aima ajiekoromaaremas. Waa ere, Allah era owe jokoman aememmem.

¹⁷Dajoo owee! Japen emes beken ajiosom, dare ta jak pota aemapom. Dararawa, tara bojinaopor ajiriskoromporom. Tanom tapa asan aemapekem. Danom dapa asan aemapom. Me, dare, ta bimak binip daytinak atetaramom.

¹⁸Dare tara bajinaomem jak aseseromemom. Emesare, dere Paulus. Dere tara bajinaomem jak aseseromema ajaio. Bii Kapar Ipit ere, akekema ajaiero.

¹⁹Emesare, tare Tuhan Yesus ajamkaiekem. Erarawa Armat Ipit aofasiendaeto, dare Armat Ipit ji aetemarom. Danom jak akot aememtemarom. Danom era akot aemom pak atakam baso akoretemarom.

²⁰Tare Tuhan Yesus ajamkaiekem. Erarawa danom tara atemtemmarom. Tare jak akot dara aemapommaroakam.