Read Casuarina Coast Asmat 1 TESALONIKA 3 Bible Online

1 TESALONIKA 3 - Casuarina Coast Asmat bible

1 TESALONIKA 3

¹Emesare, dare tare takan apok aemapom. Erarawa jak apok taka aemapom. Dararawa, kota Atena dapa baemap atakam asakamtiiom.

²Dare dajoo ipit Timotius tara ataejinaomtamom. Armat Ipit ara Kristus Akot Atakam dare takan akoretamom. Dare armat ipit, tare jak fiak baememam, Kristus eemnak bamesemkoromaaram, emes ataane bawe ataejinaomtamom.

³Era ajirisemmakam pak damon, tare Kristus bajamkai, bimak binip arke batetaram-ombar. Emesare, Allah, dare bajirisem, atakam asakamtiie. Emes tamsam.

⁴Dare tare takan aemapom, atakam bonak akoromom: “Owe dare takes ajurusumtemaroas.” Emes atakam aesimtamom. Asep arawa, dare takes ajirisemom.

⁵Emesare, dere Timotius tara ataejinaomtamo. Emesare, dere jak apoknak aememo. Dere tare Kristus eemnak bamesemkoromaar apaye, emes atakam jane bajie jak aseseromo. Tare dosa baem batatapimtaa ipit awotapemekem apaye, dare Kristus atakam bambi tara akoretamom apaye, emes atakam jane bajie jak aseseromo.

⁶Timotius ere, eteofasijinaoe. Are taatakam akot akoretamero: “Era Tesalonika owe, Kristus eemnak ambesemkoromemas. Are armamon ajamfaimamemas. Are tabi bopor jak aseseromemas— tare abi bopor jak aseseromemakam emes aware.” Emes atakam aesimtamero.

⁷Dajoo owe akot! Dare ajirisemmom. Oweam dara aemsokomaroas. Emesare, dare, tare Kristus eemnak ambesemkorommakam, emes atakam jane ajiom, dare jak fiak aememom.

⁸Emesare, dare tare Tuhan bajamkai fiak apormarom apaye, dare asan akotnak aememmarom.

⁹Tanom, dare jak akotnak aemapomeroekem. Erarawa dare atakam Allah ajanimtam, dare tare terima kasih atakam daytu Armat Ipit akoromemarom.

¹⁰Emesare, jokam, eamam, dare tabi bopor, atakam fiak Allah ajanimaaremarom. Tare Kristus eemnak bamesemkorom apok apormarom. Erarawa dare, tare Kristus eemnak bamesemkorom baememtam aemmarom.

¹¹Emesare, Daritipit Allaham, Yesus daTuhanam, dare tara bojinaomem, takan baemtan.

¹²Tuhan, tare tarmarmon bafaimamam, tare owe takes bafaimam, emes bimak binip baemomem tara bametemtamaartan— dare daytinak tara afaimmarom aware.

¹³Erarawa Armat Ipit jak fiak tara atetamteman. Emesare, Yesus daTuhanam, aturunak owe takesam, aondaetas, tare atet apoknak oweam, turunak oweam, Daritipit Allah bipu aememtemakam.