Read Casuarina Coast Asmat 2 TESALONIKA 1 Bible Online

2 TESALONIKA 1 - Casuarina Coast Asmat bible

2 TESALONIKA 1

¹Dere Paulus. Denom, Silwanusam, Timotiusam, ara surat takota Tesalonika Yesus basitim bajarisiap owe aeapomtamom. Tare Daritipit Allaham, Tuhan Yesus Kristusam, aowe.

²Emesare, Daritipit Allaham, Tuhan Yesus Kristusam, asan akot tara baemtan. Are ji baem jak tara batetamtan.

³Dajoo owe akot! Tare Yesus eemnak bamesemkorom betema ajiaaremakam. Tare tarmamon bajamfaimam betema ajiaaremakam. Erarawa dare terima kasih atakam Allah akoromaaremarom.

⁴Emesare, dare era aemmakam pak, atakam ara samaniin samaniin Yesus basitim bajarisiap owe, akoretamemarom. Era owe, ere Allah aowe erare. Ara atakamam, “Owe era Tesalonika Yesus bajamkai owe aemsokomemas. Me Tesalonika owe, ere ajirisememas. Emesare, are jimas emes ajirememas. Are Yesus bamesem bamompim apok aemas.” Emes atakam aesimtamemarom.

⁵Emesare, Allah, atakam owe asakamtiito, Are bajurusum aturu pak jipu aemtem. Era aemmakam pakam era pak aporomem. Armat Ipitam tara baomep Ipit. Erarawa owe tara ajurusumman. Emesare, era ajurusumman pak, tare Allah aobaomep baemem owe awar, emes aemapomteman.

⁶Allah, turu pak jipu aemum. Erarawa Are tara ajurusumman owe biti ajitem.

⁷Tuhan Yesusam, afiak malaikat oweam, era Surga oup aendaetas, Armat Ipit abi asamot owe aoporomtem. Era bare ere, Are asan akot era ajirisemmakam oweam, danom, aemtemaro.

⁸Emesare, Armat Ipit jisimak jee aptam andaetem. Are Allah awotapemmas oweam, Yesus daTuhan Akot Atakam baoo oweam, ajurusumtem.

⁹Era bajurusum pak ere, ara owe danais aemansaaartemas. Are Tuhan bipu baemem asan apok aememaartemas. Are Tuhan aakotipitnak pakam, afiaknak pakam, baemepor asan apok aememaartemas.

¹⁰Armat Ipit andaeto barekor, ara owe emes pak aemtemas. Era bare, ara turunak owe, “Tuhan akotnak,” emes atakam aesimtemas. Emesare, Armat Ipit eemnak ambesemkorommas owe, jinim, Armat Ipit aetemas. Tare ara ateman atamom atakam eemnak ambesemkoromekem. Erarawa tanom era owe takan aememtemakam.

¹¹Emesare, dare atakam Allah tara ajanimtamaaremarom. Dare, Allah, tare Armat Ipit ajaten owe awar baemem, atakam Armat Ipit ajanimaaremarom. Emesare, tare akot pak baem jak aseserommakam. Tare Armat Ipit eemnak ambesemkorommakam. Erarawa tare Armat Ipit karai aetammakam. Emesare, Armat Ipit fiak. Erarawa Are, tare era pak takes baem takan baemtan.

¹²Erarawa, owe ara aemmakam pak aportemas. Ararawa, Yesus daTuhan, akotnak, emes atakam akoretemas. Oweam Armat Ipit tara aemtamman pak aportemas. Dare Allaham, Tuhan Yesus Kristusam, asan akot tara aemman. Erarawa Are era pak aemtamman.