Read Casuarina Coast Asmat 1 TIMOTIUS 2 Bible Online

1 TIMOTIUS 2 - Casuarina Coast Asmat bible

1 TIMOTIUS 2

¹Ara bonak atakam ere, dere emes ataane aweommin: Owe, ere wan owe takes, atakam Allah bajanimtamtas. Are Allah, asan akot, era owe takes baem, atakam bajanimtas. Allaham asan akot, owe takes aemum. Erarawa owe terima kasih atakam Allah bakoromtas.

²Owe raja oweam, kapar owe takesam, atakam Allah bajanimtamtas. Era pak baem, dare asan akot baemap are. Anom dare bajirisem apok pak erare. Erarawa dare owe turuam, owe akotam, aememtemarom.

³Emes baem, ere akotnak. Allaham emes akot aportem. Armat Ipit, ere dara Bajortaer Ipit.

⁴Are owe takes bajortaer jak aseseromem. Are owe takes era atakamnak baporkorom jak aseseromem.

⁵Allah takakor. Me Allaham, asamot oweam, era waut, ere atakam batoomattam Ipit takakope aometa. Era Ipitam asamot ipit. Are Kristus Yesus are.

⁶Armat Ipit owe takes bajortaer dambir ateme. Allaham owe takes bajorem jak aseseromem. Me Kristus Yesus aeme pak era pak aporomtame. Allaham asan akot apore, Are emes aporomtame.

⁷Allaham dare emes atakam bakoretam ataemomen. Are dere era owe Kristus eemnak bamesemkoromam, atakamnak bajamkaiam, emes atakam baememtam ataemomen. Are dere ara atakam era Yahudi apok owe bakoretam ambirimemomen. Emesare, ara akoremin atakam, atakamnak. Are pote apok.

⁸Dere era asaniin asaniin oorey owe, atakam Allah bajanim akot ajimin. Atakam Allah ajanimtas, are dosa apok jak baememtas. Anom jak ambap apok baememtas. Anom owentakam apok jak baememtas.

⁹Tapesam tasee daytu bas. Are damke apok pakaian bajimomemtetertas. Are akuus fini sisir batetaram daytinak bas. Are emes apaye, akot eka juas mutiara apaye, afini bataetopom bas. Apakaianam harga daytu pak bas.

¹⁰Me tapes ere, asan akot tapes baemaptas. Emes baem, ere atasee pak anakot emes tamen are. Are, “Dere Allah bajamkai taot,” emes atakam aesimteteremas. Erarawa are era akot pak jipu taka baemtetertas.

¹¹Tapesam Allah atakam aemaptas, are atakam apok bajiaptas. Are atakam ji baetas.

¹²Allah ere Adam bonak akenemapomen. Ararawa, Hawa asep akenemapomen. Me Bii Kapar Ipitam potet Adam batutum apok. Are potet taot bonak atutumen. Me taot arawa, Allah atakam baoo taot aemapen. Emesare, dere tapes oorey owe atakam baememtam atii atimin. Danom tapes oorey owe atakam basakamtam atii atimin. Tapes ere, atakam apok baemaptas.

¹⁵Me, tapes Kristus eemnak bamesemkoromaartas. Are owe bafaimaartas. Anom turu tapes baemapaartas. Are amba batemtemap bas. Emes aemtas, wanam jii apeaptas, are asan akot aemaptemas.