Read Casuarina Coast Asmat 1 TIMOTIUS 3 Bible Online

1 TIMOTIUS 3 - Casuarina Coast Asmat bible

1 TIMOTIUS 3

¹Owe atakam akoremas, “Owe Yesus basitim bajarisiap armat aememtas owe baemem akot aportas, are akot pak baem jak aseseromemas.” Emes atakam aesimemas. Era atakam, ere atakamnak.

²Era armat aememto ipit ere, owe ara ipit basitim ipita. Are aremo taka ipita. Are jak fiak ipita. Are bimak binip aptam ipita. Are owe akota. Are jaki owe atame batoomjii akot apormar ipita. Are atakam baememtam amsam ipita.

³Are bir bwi banda jaytu ipit bas. Are jokoman ipit bas. Emesare, are tayieakotnak ipita. Are owentakam ipit bas. Are uang jak basenomem ipit bas.

⁴Are aremoam, arereisam, atakam akot basakamtam amsam ipita. Are arereis aatakam ji bae aememtamemar ipita. Arereisam aritipit asitimemas ipita.

⁵Me aremoam, arereisam, atakam akot basakamtam atakam amsam apok ipit, ere Allah basitim ajarisiapemas owe, atakam baemesakamtam asan apok.

⁶Are Kristus japen ajamkaie ipit bas. Are amba batemtem-ombar. Me Allaham, Bii Kapar Ipit aeme pak jipu, era Yesus basitim bajarisiap armat aememto ipit, baem-ombar. (Bonaknak ere, Bii Kapar Ipit amba aemetemtemen. Allahrawa, “Era Bii Kapar Ipit aeme pak, dosa,” emes atakam asakamtiien.)

⁷Me Kristus bajamkai apok oweam, era Yesus basitim bajarisiap armat aememto ipit basitim ipita. Ere era ipit Kristus bajamkai apok owe wote bawotom-ombar. Wanam are Bii Kapar Ipit akenemapome siso bomon bajiiap-ombar.

⁸Me Yesus basitim bajarisiap pi bajat oweam, owe turua. Are ir pitin atakam bakore owe bas. Are anggur bwi daytu banda owe bas. Are uang basenomem apok owee.

⁹Emesare, Allah bomonnak atakam, atakamnak. Me Yesus basitim bajarisiap pi bajat baemem owe, are atakamnak eemnak bamesemkoromaar owee. Are era pak ajak bomon atakam jipu baemtas.

¹⁰Owe, era owe atobatakamoorportas. Are, era owe, turu aportas, wanam Yesus basitim bajarisiap pi bajat owe bataemomtas.

¹¹Me atapestiam turu tapesa. Are owe pote atakam bakore apok tapesa. Are jak fiak tapesa. Are pote atakam apok tapesa.

¹²Yesus basitim bajarisiap pi bajat ipit, taot taka ipita. Are arereisam, aremoam, atakam akot basakamtam ipita.

¹³Era Yesus basitim bajarisiap pi bajat owe, karai akot aetas apaye, oweam era owe asitimtemas. Emes pi bajat oweam, Kristus Yesus eemnak bamesemkorom atakam, atakam fiak akoremas.

¹⁴Emesare, dere wore fef bajinaopor jak aseserommin. Emesare, denom ara surat wora aeapomtammin.

¹⁵Erarawa dere aerumnak ajinaotey, wonom Allah arereis baem pak bonak aportemarem. Ere Allah arereis, jiine Allah basitim ajarisiapemas owe are. Era owe, ara atakamnak banamek batai owe.

¹⁶Atakamnak, era eemnak ambesemkorommarom atakam bomonnak. Era atakam ere, emes are: “Armat Ipit asamot ipit ajaoreme. Allah Jipam, Armat Ipit, turunak Ipit aporomtame. Malaikat oweam Armat Ipit bi apores. Oweam, Armat Ipit atakam, tapirmi tanane akoretames. Asan tanane oweam Armat Ipit eemnak ambesekoromes. Allaham Armat Ipit Surga oup atoomtemete.” Dare emes atakam eemnak ambesemkorommarom.