Read Casuarina Coast Asmat 1 TIMOTIUS 4 Bible Online

1 TIMOTIUS 4 - Casuarina Coast Asmat bible

1 TIMOTIUS 4

¹Emesare, Allah Jip atakam baso akorem: “Era asepnak bare, wan owe, Kristus bamesem ambompimtemas. Are pote atakam akoretas bii, ajamkaitemas. Are bii aememtammas atakam, ji aeetemas.” Emes atakam akorem.

²Emesare, pir bae owe bii atakam akoromattemas. Era oweam pote atakam owe. Era owe ajak bomon atakamam, ere apoknak. Ajak bomon atakamam dambir owe tamen. Are daytu jisimak damo dasa ajaae, dambir owe tamen are.

³Era oweam, “Petae bajiem, ere dosa. Me wan pak bandaam dosa.” Emes atakam aesimemas. Allah ere, Kristus eemnak ambesemkorommas oweam, atakamnak amsam oweam, abanda pak akenemapome.

⁴Me Allah akenemapome pak takes, ere akot. Owe, Allah atakam jipu atakam Allah ajanimtas, Allah era pak, akot aemapomtem. Emesare, owe terima kasih atakam Allah akoromtas, era pak karao pak apok.

⁶Wore ara atakam Kristus Yesus ajamkaimas owe aokoromtem, wore Armat Ipit karai baetam ipit akot aememtemarem. Emesare, wore ara ambesemmarom atakamam, ara atakamnakam, ji aeaaremarem. Erarawa wore jak fiak baemem, aememaaremarem. Emesare, wore ara atakam ajamkaiaarim.

⁷Wonom era asan pota tarai atakam bajiosomey. Era atakam, atakam janda. Wore ere, turu ipit baemem, aememaarey.

⁸Owe era atey bae pak, ere akot kope. Owe turu baemem ere, akotnak. Dare turunak owe aememtam, dare ara aemansa tapirmi asan akot aememtemarom. Danom asep bare Surga oup asan akot aememtemarom.

⁹Owe emes atakamnak akoremas: “Dare jiine Allah jiirey taka aeemarom. Erarawa dare jati daytu aeemarom. Danom karai daytu aeemarom. Me Allaham owe takes aBajortaer Ipit. Emesare, are Kristus eemnak ambesemkorommas owe aBajortaer Ipit anakot.” Emes atakam aesimemas. Era atakam, ere atakamnak. Oweam era atakam eemnak bamesemkoromtas.

¹¹Era atakam aememtamey. Oweam era atakam ji bae, atakam asakamtamey.

¹²Emesare, wore ai ipit. Me, owe emes bifane wora bafeomem bas. Worarawa, atakam akot akoreaarey. Wonom turunak ipit aememey. Oweam afaimkoromey. Wonom Kristus eemnak ambesemkoromey. Wonom bi akotnak ipit aememaarey. Me Kristus eemnak ambesemkorommas owe, era aemmarem pak jipu taka batawejomtas.

¹³Wore Alkitab atakam, owe, baca aemtamaarey. Wonom era atakam akoretamaarey. Era atakamam aememtamaarey— era ajinaotey bare ajiirea.

¹⁴Bonaknak ere, Yesus basitim bajarisiap armat aememes owe, aban, ere wodamo ten ataetiies. Allah atakam bakoretam oweam, era aemtem pak, atakam akores. Allaham karai Ara baetam tastu pak wora atetamen. Emesare, wore era tastu pak bataetiios bas.

¹⁵Wore era pak takes fiak aememey. Anom aememkoromey. Emes aemtem, wore asan akot baemem betemoma betemoma ajitemarem. Owe takesam emes aportemas.

¹⁶Era aemtem pak turuar. Era atakam aememtamtem pakam turuar. Emes aememaarey. Emes aemtem, wonom ajoremtemarem. Wonom woatakam jane ajitas owe ajortaertemarem.