Read Casuarina Coast Asmat 1 TIMOTIUS 5 Bible Online

1 TIMOTIUS 5 - Casuarina Coast Asmat bible

1 TIMOTIUS 5

¹Wore duturu owe fiaknak bajatemotaer bas. Wore ere, era owe wuritipit tamen ataane aweomey. Era ai oweam, worepotais apaye, woreotais apaye, emes tamen aemomey.

²Era duturu tapesam, wuritapes tamen aemomey. Era ai tapesam, wotaratapes tamen aemomey. Wonom era tapes asan pota bimak binip apoka.

³Wore tano tapes pak bafaafetam owe apok aportem, era tapes asan akot aemomey.

⁴Wan tano tapes ere, arereis apaye, arurupis apaye, aomatisa. Emesare, era tano tapes pak era owe afaafetama ajiemas. Erarawa owe oweam pak aritapes apaye, arfaistapes apaye, bafaafetamtas. Are biti bajiam baemtas. Emes baem, ere turunak owe baemem pak jipu erare. Allaham era owe emes baem, akot aportem.

⁵Wan tano tapes ere, owe apok aemapmas. Are pak ara bafaafetam owe apoknak. Emes tano tapes Allah ji taka aeemas. Are jokam, eamam, atakam Allah ajanimaaremas. Are, Allah pi ara bajat, atakam ajanimaaremas.

⁶Me, wan tano tapes ere, ara aemansa tapirmi pak bajamkai daytu aemas. Era tapes jati aapatisa. Emesare, are dambir tamen aemes.

⁷Wonom owe era akoremin atakam jipu baem atakam asakamtamey. Owe, “tare pota pak aemmakam,” emes atakam bakore-ombar.

⁸Owe, pak, atame owe bafaafetam apok aemas apaye, emes ere pota. Are pak era aritapes bafaafetam apok aemas apaye, emes ere pota anakot. Emes aemas owe, Kristus bamesem ambompimes. Era owe, ere pota. Me, Kristus bamesem amsam apok owe, ere akot.

⁹Wonom umur tahun 60 apok tapes, juas, era tano tapes daftar baeapom bas. Emesare, emes aeemas tano tapes juas era daftar aeapomey: Are jipit takanak ajuutes.

¹⁰Are akot pak baemaar andi afufuoses. Are jii akot ajuumes. Are jaki owe atame batoomjii akot ajies. Are era turunak owe pak afaafetama ajaies. Are era asan pota aemapes owe pak pi ajata ajaies. Are era akot pak kupis atama ajaies. Emes tano tapes juas era daftar aeapomey.

¹¹Me aitawais tano tapes ere, juas daftar baeapom bas. Are oorey bojuut jak asenomemtas, are Kristus bajamkai fiak apok aemtemas.

¹²Bonak ere, are Kristus karai baetam, ataaji aees. Me, are era ataaji aees atakam ajiosomtemas. Erarawa Armat Ipit, “Era tapes aemmas pak, ere dosa,” emes atakam asakamtiitem.

¹³Are owe tame jimwi ajartemas. Erarawa are bamesem tapes aemaptemas. Me, are bamesem tapes baemap taka apok. Are owe pota atakam akoromattemas. Are owe pak ban atoomemtemas. Are wan pota atakamam akoretemas.

¹⁴Emesare, dere ataane era aitawais tano tapes aweommin. Are oorey bojuuttas. Are jii bapetaattas. Are atame bomon pak bakenemapomtas. Emes aemtas, era bifane afeommaroas owe, pota atakam dara baemekore asan apok.

¹⁵Me wan aitawais tano tapes ere, Kristus bajamkai ambompimes, wanam Bii Kapar Ipit ajamkaies.

¹⁶Emesare, Kristus eemnak ambesemkorommas tapes, era ajoo tapes tano tapes aportas, are pak era tapes bafaafetamtas. Kristus basitim ajarisiapemas owe, pak tano tapes tananenak bafaafetam, damo jarofefe baemem-ombar. Wan tano tapes, pak ara bafaafetam owe apok. Me Kristus eemnak ambesemkorommas tapes, pak ajoo tapes tano tapes afaafetamtas, era Kristus basitim ajarisiapemas owe, pak era owe apok tano tapes afaafetamtemas.

¹⁷Me wan Yesus basitim bajarisiap armat baemem owe, Kristus basitim ajarisiapemas owe, atakam akot asakamtammas. Kristus basitim ajarisiapemas owe, pak daytu, emes aemmas Yesus basitim bajarisiap armat baemem owe batetamtas. Me, wan Yesus aowe armat baemem oweam, Allah atakam akoretammas. Are era atakamam aememtammas. Me Kristus basitim ajarisiapemas owe, pak daytinak, emes aemmas Yesus basitim bajarisiap armat baemem owe batetamtas.

¹⁸Emesare, Alkitabam, “gandum eek atetaramdaemmas sapi, okone banam bajikapom bas.” Wanam, “Owe, era karai baetam owe, pak batetamtas.” Alkitab emes atakam akorem.

¹⁹Owe taka ateman atamto, “Yesus basitim bajarisiap armat baemem ipit emes jaos pak aeme,” emes ajito, wore aatakam jane bajie bas. Emesare, owe jamnuk apaye, bamintep apaye, era Yesus basitim bajarisiap armat baemomem ipit jaos pak ateman atamtas, ere era ateman jane ajiey.

²⁰Wonom, dosa baem owe, Kristus basitim ajarisiapmas owe bipu, ajatemotaerey. Erarawa era owe ombare aememtemas.

²¹Dere, Allah bipuam, Kristus Yesus bipuam, era baereremartaa turunak malaikat owe bipuam, atakam fiak wora asakamtammin. Wore era atakam ji takes aeey. Era atakam ji aeetem, wonom wan owe bamesomem, wanam wan owe bamesomem apok, ere emes bas. Wonom owe takes ambesomey.

²²Yesus basitim bajarisiap armat baemem owe ataemomtakam, tare taban era owe damo ten ataetiitemakam. Wore ere, emes baem, fef bas. Wore, dosa baem ipit adosa takan bajamem-ombar. Wonom turu ipit aememaarey.

²³Wore bambi bwi taka detem. Anggur bwi koser pametendey. Era wojak asesaam, me ajaumarem damo tanane, baorom pak erare.

²⁴Wan owe adosa, ere baso taka. Asep baream, Kristus, “Era pak dosa,” emes atakam asakamtiitem. Wan owe adosa ere, baso apok. Asep bare, era dosaam baso aemamestem.

²⁵Emesamare, are wan akot pak, ere basonak. Owe ere, era basonak apok pakam baemetukumtiiaar asan apok.