Read Casuarina Coast Asmat 1 TIMOTIUS 6 Bible Online

1 TIMOTIUS 6 - Casuarina Coast Asmat bible

1 TIMOTIUS 6

¹Me wan Kristus bajamkai owe, ere bambi karai baetam owe aememes. Era owe ere, era karai armat ipit atakam akot bakoromtas. Owe tame atakam Allah bakorom-ombar. Oweam ara aememtammarom atakam, pota atakam bakore-ombar.

²Wan bambi karai baetam owe akarai armat owe, Kristus eemnak ambesemkorommas. Are, akarai baetam oweam, Kristus takan ajamkaimas. Emesare, era bambi karai baetam owe, bifane era owe bafeomem bas. Era aetammas karai, asan akot, era karai armat owe batetam pak erare. Era karai armat owe, Kristus eemnak ambesemkorommas. Era bambi karai baetam oweam, era karai armat owe afaimemas. Emesare are karai akotnak era owe baetamtas. Emesare, wore emes atakam era owe aememtamey. Ara atakamam ataane era owe aoweomey.

³Wan owe ere, wan atakam aememtammas. Aatakamam, Yesus Kristus daTuhan atakamnakam, ere awar apok. Aatakamam, turunak owe baemem atakamam, ere awar apok.

⁴Era owe amba aemetemtemas. Me, are amsam apoknak. Are bambi pak bajatepor jak asenomemas. Are pak juas atakam bajamkoram jak asenomemas. Emesare, owe bi afamemas. Owentakamam aememas. Tame atakamam akoremas. Pota pakam ambaperemtiitamemas.

⁵Owentakam atakamam ajamkoramemas. Me abimak binipam pota. Are era atakamnak ambompimes. Abimak binip ere, “Dare Yesus eemnak bamesemkorom owe aememtam, pak daytu ataattemarom,” emes bimak binip atetaramemas.

⁶Yesus eemnak bamesemkorom owe aememtas, are anakot pak daytinak ataattemas— are jak akot era pak taka aemomemtas are.

⁷Dare ajisamesteterom ere, dare pak apok ajisamesteterom. Wanam dambir aemtam, danom pak baemetuomas asan apok.

⁸Emesare dare amos anama pakaian, era taka aemomemtam, dare jak akot aememtemarom.

⁹Wan owe pak daytu bataet jak asenomemas. Ajak basenomem pak ere, era owe dosa baem batatapimtaa daytinak aemtem. Era oweam siso bomon tamen ajiiapemas. Era jak asenomemas pak, ere janda pak erare. Are bajurusum pak erare. Era jak basenomem pak, era owe neraka bomon ajimomjiitem.

¹⁰Uang basenomem owe, asan pota pak kupis aememas. Wan owe uang basenomem daytinak aemes. Emesare are Kristus bamesem ambompimes. Ararawa, ajirisemes. Are jak apok aememes.

¹¹Me, wore ere, Allah bajamkai ipit. Wore era pak takes ombare aesosey. Wonom turunak ipit aememporkoromey. Allah atakam jiam aeeporkoromey. Kristus damo taka ambesemkoromey. Owe afaimporkoromey. Jak jirao aememporkoromey. Tayieakotnakam aememporkoromey.

¹²Wore Kristus Yesus eemnak ambesemkorommarem. Emesare, karai era Armat Ipit baetam, jati daytu ajameaarey. Wore Kristus eemnak ambesemkorommarem atakam, ateman akot, owe tanane bipu atamem. Emes aemem ere, Allaham wore jiinenak baemaar pak batoomem, emes atakam wora asakamtamen. Emesare, wore jiinenak baemaar pak, emes aemomey.

¹³Allah, pak takes jati aemapommar. Kristus Yesusam ateman akotnak Pontius Pilatus bipu atame. Emesare, dere Allah bipuam, Kristus Yesus bipuam, atakam wora asakamtammin:

¹⁴“Me Allah atakam wora asakamtamen atakam ji ajameekoromey. Era basakamtam atakam baoo bas— Yesus Kristus daTuhan bare aemamesto ajiirea.” Wore emes atakam asakamtammin.

¹⁵Asan akot aporto, Allah, Kristus, asamot owe aporomtamtem. Emesare, era atakam basakamtam Ipit, ere Allah taka are. Are asan akot baem Ipit. Anom raja anakot. Anom Tuhan anakot.

¹⁶A taka, ere jiinenak Ipit. Anom sare paknak bomon aemapem. Asamot oweam, era sare setep baemebaromem asan apok. Asamot oweam Armat Ipit bi bapor apok aemes. Are Armat Ipit bi baemepor asan apok. Emesare, owe, Armat Ipit basitimaartas. Are, “Allah takes aobaomep baememaartas,” emes atakam bakoromaartas. Ara atakam, ere atakamnak.

¹⁷Emesare, wan owe ara aemansa tapirmi pak daytu aemomemmas. Wonom atakam era owe asakamtamey: “Tamba baemetemtem bas. Ara pak emes abaateemames apok. Erarawa era pak jiirey baemee bas. Allah jiirey taka aeey. Armat Ipit pak daytu atetamemaro. Ere dare jak akot baemem pak erare.

¹⁸Tanom akot pak aemaaray. Era akot pak daytinak aemaaray. Tanom pak sai asaiay. Pak wan owe batetam jak aseseremay.” Emes atakam asakamtamey.

¹⁹Emesare, era owe emes aemtas, are ara anakot pak ataapomtemas. Ararawa, asep bare asan akot aememtemas. Are era jiine anakot atoomemtemas.

²⁰Timotius! Allah wora ataetiitamen atakam turuar. Wan owe atakam anakot amsamen. Me, era amsam pak ere atakam anakot apok. Ere pota atakam. Anom janda owe atakam bajamkoram atakam. Emesare, wore era atakam beak sos asotamey.

²¹Wan owe era atakam ajamkaies. Ararawa, Kristus eemnak bamesemkorom bokot, janda aememes. Emesare, Allah asan akot tara batetamtan.