Read Casuarina Coast Asmat 2 TIMOTIUS 1 Bible Online

2 TIMOTIUS 1 - Casuarina Coast Asmat bible

2 TIMOTIUS 1

¹Timotius! Detii akotnak! Dere Paulus. Dere ara aemansa surat wora aeapomtammin. Allah Daritipit. Kristus Yesusam daTuhan. Armat owe, asan akot wora baemtanis. Are soro wora bajiomemtanis. Ji baem jakam wora batetamtanis. Emesare, Kristus Yesus, jiinenak, Ara ajamkaimarom owe batetam, ataaji aeero. Armat Ipitam, dere emes atakam bakoretam ambirimemomen. Allaham dere emes baem akot ajie.

³Emesare, derfaisomar, atet apok jak, karai Allah aetamaarisin. Denom emes taka aemmin. Juiin afaafemar dere jokam, eamam, atakam Armat Ipit ajanimtamemin. Atakam Armat Ipit ajanimtey, denom wo bimak binip atetaramaaremin, wanam terima kasih atakam Armat Ipit atetamaaremin.

⁴Dere era bate ambatem pak bimak binip atetaramaaremin. Denom wobi bopor jak aseseromaaremin. Me wobi aoportey, jak akotnak aememkoromtemin.

⁵Wore Yesus eemnak ambesemkorommarem, emes bimak binip atetaramemin. Bonak ere woasak juas Lois, Yesus eemnak ambesemkorome. Wanam worsoot juas Eunike, Yesus eemnak ambesemkorome. Debimak binip ere, wonom Yesus emes eemnak ambesemkorommarem.

⁶Emesare, dere ataane wora aoweommin. Wore Allah wora atetamen tastu pak ai ajaoromey. Dere deban wodamo ten ataetiio, Allah era tastu pak wora atetamen.

⁷Me Allah dara atetamtetero Jip, dare ombare jak baemapom apok. Me, Allah Jip, fiak pak atetamtetermaro. Are owe bafaim jakam, jak fiakam, emes aemapomtetermaro.

⁸Erarawa, wonom daTuhan atakam owe bakoretam damke bas. Emesare, dere Tuhan karai aetammin. Erarawa owe dere buji tame bomon ajiitaapomenis. Me, wore de damke bakem bas. Emesare, Allah Akot Atakam bakoretam owe ajirisemtemarom. Erarawa dera ajamjirisemman. Allaham emes fiak pak wora atetamteman.

⁹Emesare, Armat Ipit ajortaerero. Are dare owe turunak baemem ajateero. Dare akot pak aemom, wanam Armat Ipit dare owe turunak baemem ajateeroe— ere emes apok. Me, Armat Ipit dara bajate, abimak binip bonak akukuretiien. Are asan akot dara baem, jak bonak aseseromem. Bonaknak ere, Are ara tapirmi bakenemtii apok aeme, Are Kristus Yesus aemto pak aporen. Erarawa bonaknakam, Are asan akot dara aemeroen.

¹⁰Me, Kristus Yesus andae, Are era asan akot baso aporomtamero. Emesare, Armat Ipit dara bajortaer Ipit. Are era dambir fiak pak akumimosome. Are Allah Akot Atakam baso akoretamero. Me Allah Akot Atakam eemnak amesemkorommas owe, jiinenak aememaaremas.

¹¹Allah dere aAkot Atakam bakoretam bamirimemom ipit ataemomen. Ere Allah Akot Atakam owe akoretammin. Ere Allah Akot Atakam owe aememtammin.

¹²Emesare, dere era pak ajirisemmin. Dere ere, emes damke apok. Dere era eemnak ambesemkoromo Ipit demsam. Armat Ipit, ara atetamo pak banamek apeemem— aofasiendaeto bare ajiire. Dere emes demsam.

¹³Me aememtamo atakamnak, ajamkaiaarey. Dare Kristus Yesus takan ajamememmarom owe, Armat Ipit eemnak ambesemkorommarom. Danom Armat Ipit afaimmarom. Wonom era pak bamompim bas.

¹⁴Allah wore akotnak pak atetamen. Wore era pak banamek turunak ataiemey. Wojak bomon Allah Jipam, era pak baem pi ajateman.

¹⁵Emesare, Asia tapirmi owe takes beken ajiosenis. Me Figelus anama, Hermogenes beken ajiosenimis. Wonom emes atakam jane emejiekoromem.

¹⁶Bare tanane ere, Onesiforus jak akot aemapoma ajaien. Erarawa Tuhan, armat ipitam, atame oweam, soro bajiomemto. Onesiforusam dere buji tame bomon aemapo apore. Me, are de damke bakem apok.

¹⁷Armat ipit Roma ajiritey, are andimaren. Andimaren arawa andimartaeren.

¹⁸Me Tuhan aofasiendaeto bare, Are Onesiforus soro bajiomemto. Denom Efesus aemapaaru, Onesiforus pak tanane afaafetamaarin. Wonom emes atakam jane emejiem.