Read Casuarina Coast Asmat 2 TIMOTIUS 2 Bible Online

2 TIMOTIUS 2 - Casuarina Coast Asmat bible

2 TIMOTIUS 2

¹Detii! Kristus Yesus, asan akot, Armat Ipit takan ajamememmarom owe, atetammaro. Erarawa wonom jak fiak aememey

²Dere owe tanane bipu atakam akoretamo. Wonom era atakam jane ajiem. Emesare, wonom era atakam, turu owe aememtamey. Ere, atakam owe baememtam amsam owea.

³Wonom Kristus Yesus atentara ipit akot. Erarawa dera ajamjirisemman.

⁴Tentara owe, jak akot akomandan ipit baemapomtam jak aseseromemas. Erarawa are bambi pak baem bofijii apok aememas.

⁵Olahraga baem oweam, era olahraga basakamtam atakam jipu baem apok apaye, are era juara pak bataet apok aememas.

⁶Me pak akene bataapom jati daytu bajapom owe, ere bonaknak eek bandetas.

⁷Era akorommin atakam, bimak binip atetaramkoromey. Me Tuhanam, era atakam takes jane bajiekorom, bimak binip baso wora atetamteman.

⁸Wonom Yesus Kristus bimak binip atetaramaarey. Allah Armat Ipit ajaoromwasumtume. Armat Ipitam Daut wurpis. Era akoretammin Kristus Akot Atakam, emes atakam are.

⁹Dere Kristus Akot Atakam akoretammin. Erarawa ajirisemmin. Owe, dere pemerintah atakam baoo ipit tamen rantai banam ajikapomenis. Me, owe Allah Akot Atakam banam baemejikapom asan apok.

¹⁰Dere Allah aereremartaae owe bajorem, emes jak aseserommin. Erarawa dere era pak takes ajirisemmin. Emesare, Kristus Yesus era owe ajortaertem. Are aakotipitnak pak era owe aemtamaartem.

¹¹Emes atakam, atakamnak: “Dare Yesus dambir takan ajamtemom apaye, danom Armat Ipit jati takan ajameetemarom.

¹²Dare era ajirisemmarom pak, jimas bambi pajiremaartamaye, danom Armat Ipit atakam takan ajamsakamtamtemarom. Dare Armat Ipit papatimtamaye, Are dara apatimtemaro.

¹³Dare Armat Ipit pamompimtamaye, Armat Ipit ere, dara bamompim apok. Are aowe baemepatim asan apok.” Emes atakam, atakamnak.

¹⁴Ara atakam, owe bimak binip batomomtamey. Wore era owe Allah bipu ataane aweomey. “Tare pak juas, atakam bajamkoram bas.” Emes atakam aesimey. Era atakam bajamkoram, akot pak apok. Era pak ere, era jane ajimas owe, asan potanak aemapomum.

¹⁵Wonom Allah karai baetam ipit akot aememporkoromey. Allah atakamnak anakotpu taka aememtamey. Emes aemtem, wore damke apok aememtemarem. Allaham, “Emesare, era aemaarim pak akotnak,” emes atakam aesimteman.

¹⁶Era pota atakamam, era bambi atakamam, beak sos asotamey. Era atakam akoremas owe, jaosnak aiemema aiemema ajiemas.

¹⁷Era pota atakam, daso tamen, jaytu ambostem. Himeneus anama Filetus emes atakam baememtam ipit amnuk.

¹⁸Are era atakamnak ambompimemis. Aatakamam, “Owe bajaorwasit bare, ere eteemanse,” emes atakam aesimemamis. Wan oweam ere atakam jane ajies, wanam are Yesus Kristus bamesem ambompimes.

¹⁹Emesare, Allah ara atakamnak, tame fesis daytu tamen, fiaknak aemapaartem. Era fesispu, emes atakam wao aapeta. “Allah, aowe amsam.” Wanam, “Owe, ‘Dere Tuhan ajamkaimin,’ emes atakam aesimes apaye, are era dosa pak takes bajiosomtas.” Emes atakam wao aapeta.

²⁰Emesare, tame daytu bomon ere, atatkupis aone apatisa. Me wan, emas aone. Me wan, perak aone. Me wan, wus aone. Me wan ere, se aone. Emesare, wan aone, jaki owe banda pak batuutam aone. Me wan ere, bambi basimtii aone.

²¹Owe apota pak takes ajiosomtas, anom akot aone tamen aememtemas. Are akot pak baem owe aememtemas. Are turunak owe aememtemas. Are, Karai Armat Ipit akarai baetam owe akot, emes owe aememtemas.

²²Emesare, wonom era ai owe jak basenomem pak bajamkai bas. Me, wore turunak owe ajamememporkoromey. Tuhan eemnak ambesemporkoromey. Owe afaimporkoromey. Ji baem jak atoomemporkoromey. Wonom Tuhan atakam fiak ajanimemas turunak owe, emes baemem jati ajameey.

²³Wonom, era janda owe ara ajamkoramemas atakam, bajamkai bas. Era owe amsam apok. Era janda atakam ajamkoramemas owe, owentakam aememas. Wonom emes aporem.

²⁴Tuhan karai baetam owe, owentakam bas. Are asan akot, owe takes baemtas. Are atakam baememtam amsam owe baememtas. Jak jirao baememtas.

²⁵Are aatakam baoo owe ajatemotaertas, atakam akot bakoretas. Erarawa Allah, dosa beak sos basotamteter bimak binip era atakam baoo owe, atetamtemar apeno. Era owe ara atakamnak ji aetemas apeno.

²⁶Era atakam baoo owe emes aemtas, are bimak binip baso aoteteramtemas. Are Bii Kapar Ipit siso bomon ajistemas. Bonak ere, era Bii Kapar Ipit aemtiie siso, era owe andaekemompe emes tamen are. Era oweam Bii Kapar Ipit atakam ji aees.