Read Casuarina Coast Asmat 2 TIMOTIUS 3 Bible Online

2 TIMOTIUS 3 - Casuarina Coast Asmat bible

2 TIMOTIUS 3

¹Wore baporey! Era asepnak aemamesteterto bare, owe bajirisem daytinak aemtemas.

²Era bare, owe adamo taka afaimemtemas. Are pak daytu bataer jak asenomemtemas. Are amba aemetemtemtemas. “Dere owe akot,” emes bimak binip atetaramtetertemas. Tame atakamam akoretemas. Are arisare atakam aotemas. Terima kasih atakam bimak binipam apoknak aememtemas. Owe jaosam aememtemas.

³Era asepnak bare, owe, owe bafaim apok aemtemas. Are owe soro bajiomem apok aemtemas. Are owe jaos pak aemas, pote atakam akoretemas. Jokoman atakamam akoretemas. Jokoman pakam owe aemtemas. Are akot pak bifane afeomemtemas.

⁴Are ajoo owe, jokoman owe aotasimemomtamtemas. Jak ambapam fefnak apumemtemas. “Dere akot, wan owe pota,” emes bimak binip atetaramtemas. Are ara aemansa tapirmi pak jak akot aemomemtemas. Me, are Allah atakam ji bae apok aemtemas.

⁵Era owe, Yesus eemnak bamesemkorom owe tamen aememtemas. Me, are Tuhan atetammar fiak pak, eemnak bamesemkorom apok aemtemas. Me wore era owe beak sos asotamey.

⁶Me wan emes owe, pir aetemas, wanam owe tame ajiitemas. Ararawa, bimak binip apok tapes atoomemtemas. Era tapes, dosa daytu tapes. Ajak basenomem pakam, ere tananenak.

⁷Era tapesam atakam aememporaartemas. Me, are era atakamnak baemetaet asan apok.

⁸Bonaknak, Yanes anama Yambres, Musa atakam aooemisen. Emesamare, era owe tame ajiies oweam bimak binip pota atetarames. Era atakamnak bamesem ambompimes.

⁹Era owe ere, ajak basenomem pak jipu baemeemaar asan apok. Owe takes, ara owe janda owe aportemas— ere era bonaknak owe, ara Yanes anama Yambres, janda owe apores emes tamen are.

¹⁰Emesare, wore era aememtamaaru atakam womsam. Era aemaaru pak womsam. Me dejak aseserommin pak womsam. Dere Yesus Kristus eemnak ambesemkoromaaru. Jakam jirao aememaaru. Wan oweam afaimaaru. Denom jak fiak aememaaru.

¹¹Oweam dera aemsokomaarinis. Denom ajirisemaaru. Wore womsam takes. Era Antiokia oweam, Ikonium oweam, Listra oweam, era aemenis pak, wonom womsam. Me era asan ajirisemo pak womsam. Me, Tuhan era ajirisemo pak takes ajortaeren.

¹²Me Kristus Yesus takan bajamemem aemmas owe takes, wan owe era owe ajurusumtemas.

¹³Me, juiin afaafeto, asan pota oweam, pote oweam, pota pak betema betema ajitemas. Are potet owe atutumtemas. Oweam potet era owe atutumtemas.

¹⁴Me, wore atakamnak aememem. Wonom era atakam, eemnak ambesemkorommarem. Emesare, era atakam ajamkaiaarey. Wonom era atakam wora aememtamenis owe womsam.

¹⁵Wore jii kope aeememem, Alkitab atakam jane ajiaarim. Wonom era pak bimak binip ajanimomey. Emesare, Alkitab atakam ji aemmas owe, bimak binip baso atetaramemas. Ararawa, Kristus Yesus eemnak ambesemkorommas. Armat Ipitam era owe ajortaerem.

¹⁶Allah alkitab atakam takes akore. Era Alkitab atakam, owe baememtam pak akotnak. Anom owe era aememas pota pak, atakam baso bakore atakam akotnak. Anom bajatemotaer atakam akot. Anom owe turunak baemem baememtam atakam akot.

¹⁷Erarawa Allah karai baetam owe, Alkitab atakam ji aetas, anom era karai tastu pak aemomestemas. Ararawa, era akot pak takes baem, emes fiak pak aemomemtemas.