Read Casuarina Coast Asmat TITUS 3 Bible Online

TITUS 3 - Casuarina Coast Asmat bible

TITUS 3

¹Emesare, wore ara atakam, owe bimak binip atomomemtamey: Are pemerintah atakam anama kapar owe atakam ji baetas. Are akot pak takes baem jak baseseromemtas.

²Oweam tame atakam bas. Owentakamam bas. Are owe soro bajiomemtas. Are, tayieakot, owe takes baemomemtas.

³Bonaknak ere, danom bimak binip apok owe aememaarum. Danom atakam aooaarum. Oweam potet atutumaaruas. Danom asan pota pak kupisam, dajak basenomem pak kupisam, emes pak jipu aemkoromaarum. Me ju afaafeaarir, dare pota pakam, owe bet baeomam, aemaarum. Oweam bifane dara afeomaaruas. Danom owe bifane afeomaarum.

⁴Me, Allah dara Bajortaer Ipit. Are dara afaimmaro. Era bare ere, Armat Ipit era pak aporomtamero. Are era atetammaro asan akot pak aporomtamero.

⁵Era baream, Armat Ipit ajortaerteterero. Dare akot pak aemom, erarawa Armat Ipit ajortaertetereroey— ere emes apok. Me, Armat Ipit soro ajiomero. Erarawa Are ajortaerteterero. Anom dadosa aeosomtamero, wanam dare aojisamesteterom. Era ajortaerteterero pak emes are. Allah Jipam ai jak atetamteterero.

⁶Emesare, daBajortaer Ipit Yesus Kristus are. Allaham, Yesus Kristus aeme pak apore. Emesare, Allah, Allah Jip asan akot ataendaemtamero.

⁷Emesamare Allah asan akot aemero. Anom, dare turunak owe, emes atakam asakamtiie. Danom jiinenak baememaar owe aememom. Emesare, dare era jiinenak baememaar, jiirey aeemarom.

⁸Ara atakam, ere atakamnak. Wonom era akoremin atakam, atakam fiak akoretamey. Me Allah eemnak ambesemkorommas owe, era akot pak baemaar, jati daytu baetas. Emes baem, ere akotnak. Era pak, owe takes, asan akot baem are.

⁹Wonom era janda owe abwea atakam jane bajie bas. Me bonaknak ajitemes owe juas bajititimar atakam jane bajie bas. Wonom owentakam atakamam bas. Me wobwea Musa ataetiitame Basakamtam Atakam bamkore bas. Era pak takes bambi pakam, pota pakam erare.

¹⁰Jipit taka Yesus basitim bajarisiap owe damon atutumto, wonom era ipit ajatemotaerey. Are jane apok aportem, bojatemotaerey. Worarawa, era ipit jane apok aoportem, erarawa wonom era ipit bomesomem bas.

¹¹Wore emes baem ipit, jaos ipit apormarem. Owe era ipit pota aememar pak aportas, are era ipit jaos ipit basonak aportemas.

¹²Dere era jufu bwi Nikopolis tapirmi baemap, atakam asakamtiio. Emesare, dere Artemas apaye, Tikikus apaye, woasan ataejirimtey, wonom Nikopolis tapirmi fef ajinaoporan.

¹³Senas, pemerintah atakam tastu ipit. Wore, armat ipitam, Apolosam, pak pi bajat, jati fiak aememey. Are era waut pak apok baemem-ombar.

¹⁴Me daoweam akot pak baem baememtas. Erarawa are abatoomep pak kupis batetamtas. Are bambi baemap-ombar.

¹⁵Me dere takan aemaporom owe takes selamat atakam wora akorommanis. Dare Yesus Kristus ajamkaimas owe afaimemarom. Wonom selamat atakam era owe aesimtamey. Allah asan akot tare takes baemtan.